MFANANO 18 - Bibilia Kui Mdedie fo Kimochi

¹ Molekana na wodoe naishiha mbonyi tsake amonyi; Nekelimbana na orio iwawaso licha.

² Tondo lekechihiṟo nyi imanya pfo; Indi mrima foke fumanyike na pata.

³ Ulya alasumhanyi kacha-le, wuminyi wowecha nawo; Hamu na wusutsu na ihutsio owingo.

⁴ Madedo ha dumbu lya mndu hai cha mṟinga fo oṟoo lo nduwa. Kimeda kiitsye msanjika; soka ya wuṟango.

⁵ Iidikya kyamu kya alai na wusumhanyi chi kichapfo; Manya idetsa mndu o wusumhanyi mengenyi.

⁶ Dumbu lya tondo liichi iṟiinga, Nekelaha ngapo na dumbu.

⁷ Dumbu lya tondo nyi ikunyamaṟa amonyi, Na madedo hake nyi mdeho fo moo foke

⁸ Madedo ha mndu o mboru hai cha nyama tselya; Hekesoka itane ndeunyi kya mba.

⁹ Ulya ai mdoko iṟundenyi lyake, Nyi odoe o mnyamaṟi.

¹⁰ Rina lya Mndumii nyi omombo lo pfinya; Mndu o wusumhanyi nyekedichya kakaa kipuo.

¹¹ Masaa ha msuṟi nyi mṟi foke fo pfinya; Nyi cha omombo luleshi mahionyi hake.

¹² Kulamewade inyamaṟika mrima fo mndu fokushela; Kulamewade wuindi kosonguo ikunyiiṟa.

¹³ Ichu mohaluo alameicho, Nyi utondo na sonu tsake.

¹⁴ Mrima fo mndu fochikarishya wufafa woke; Indi ngoo injisoke fowa nyiu echiikarishya?

¹⁵ Mrima fo mlaanyi fochiinengo imanya; Kudu ko mndu mṟango kushiha imanya mbonyi.

¹⁶ Shisa sha nnga shainenga mndu mwaanya Nekeendo oshangunyi lo wanene.

¹⁷ Motambahana ikuuta handu kui ideda nekewono nai mcha; Indi wamṟasa oke nekecha kamṟisa.

¹⁸ Kuṟukuhya kodumbuo marekyano; Kodumbuo madedo ha wanene.

¹⁹ Manowama alesuo nyi ai muumu kota mṟi fo pfinya; Na marekyano cha wuimi wo omombo.

²⁰ Ndeu ya mndu yechiichuṟo nyi ndunda tsa dumbu lyake Nechiihuda shilimu sha dumbu lyake.

²¹ Opfu na moo shii pfinyenyi ya olimi; Na iwo wakundi wechilya ndunda tsake.

²² Mowona mka na kuwonya kindo kicha Nao nakuwonya osu ko Mndumii

²³ Mkiwa neketerewa Mndumii; Indi msuṟi nekehaluo na wulang'a.

²⁴ Mosanya wambuya wafoi nyi odetso loke amonyi; Indi kuwode mbuya ekeoshana na mndu kota manomae.