MFANANO 16 - Bibilia Kui Mdedie fo Kimochi

¹ Iṟeheṟa mbonyi nyi lya mndu o wandu; Indi iinutsya na dumbu lyawuka ko Mndumii.

² Njia tsose tsa mndu tsitsicha oshangunyi loke amonyi; Indi Mndumii nekehesha ngoo tsa wandu.

³ Dambikya Mundumii maṟunda hapfo; Na makusaṟo hapfo hechiwanga.

⁴ Mndumii nawikie orio kindo kui makusaṟo hake. Ee da, na wawicho kui mkonu fo wuwicho.

⁵ Orio msa awode mrima fo orikiki nyi asuiṟie Mndumii, Nyi lohi, echida alamhoṟwo pfo.

⁶ Kui osaṟio na lohi wuwicho wochisanjo; Kui iindia Mndumii wandu wechikuṟisa na wuwicho.

⁷ Njia tsa mndu tsikachihiṟa Mndumii, Ma wakituwa wake wechisanza nao.

⁸ Nanga masaa kitutu hamu na wulohi, Kota masaa hafoi hamu na wutahachi.

⁹ Mrima fo mndu fokusaṟa njia tsake; Indi Mndumii nekesongoya njotende tsake.

¹⁰ Idumbuo madedo lii dumbunyi lya mangi; Dumbu lyake lyechideko mwaanduyepfo.

¹¹ Kiheo kehesha kya lohi na mahi hake nyi sha Mndumii, Maho hose ha kikunjenyi nyi iṟunda lyake.

¹² Wamangi wakawuta shilai lohi nyi kiwicho; Kipfa loṟika lo wuchili lochiwanga na wulohi.

¹³ Dumbu lya lohi nyi sia ya wamangi; Na nyi akundi ulya modeda kya wusumhanyi.

¹⁴ Nyashi ya mangi nyi wadume wa opfu; Indi mndu o wusumhanyi nechiioloṟa.

¹⁵ Kuwode moo kiidi kya sa ya meso ha Mangi, Na isaṟia lyake cha ipuchi lya kisie.

¹⁶ Chi nanga iwada wuṟango kota sahapu? Ee da, nanga isambuṟa imanya kota fesa.

¹⁷ Njia njinene ya mndu o wusumhanyi nyi ilekana na mawicho; Ichu mowada njia yake nyi aringa moo foke.

¹⁸ Orikiki losongoya orumatso; Na ngoo yekapa kawi yasongoya ioloka.

¹⁹ Nanga owada mrima fo ikunyiiṟa hamu na mkiwa, Kota ihawa shiende shidenyi hamu na wa orikiki.

²⁰ Mokusaṟa idedo nyi echiwona mecha; Na orio aidikie Mndumii nawode nanga.

²¹ Awode wuṟango mrimenyi nelaho nyi menyi wulaanyi; Mlodo fo madedo fokeengeṟa wuṟango.

²² Imanya nyi soka ya moo ko ulya aichi; Indi ilosho lya watondo nyi wutambashi wowo.

²³ Mrima fo mndu mṟango fuilosha dumbu lyake; Foengeṟa wuṟango wo dumbu lyake.

²⁴ Madedo hechikiṟa hai cha iwuwu lya wuki; Lyeloda moonyi, na oru mafuonyi.

²⁵ Kuwode njia yewono ii njicha oshangunyi lo mndu; Indi ifurumia lyayo nyi opfunyi.

²⁶ Mbihu fo mndu mṟundi nyi iṟunda; Kipfa dumbu lyake lyemtewa napfuṟukane.

²⁷ Mndu alawaṟi kindo nyekesuma rina lya wunyamaṟi; Dumbunyi lyake kuwode modo forumatsa.

²⁸ Mndu mkari nawode wuṟiingi; Na mndu o mboṟa nekepaṟa mbuya.,

²⁹ Mndu mlang'a nekelemba wodoe, Kamduo njia ilai njicha.

³⁰ Motsingiṟa nekehia mawicho, Mopfuṟana dumbu nekewuta mawicho.

³¹ Mdo fo mhasa nyi oṟo ya kiṟumi, Kokoya fowono kiidi kya wusumhanyi.

³² Alawode nyashi ya kitusu nyi amcha kota mbahanyi; Na mndu moidima mbihu foke kota mowinza mṟi.

³³ Kuṟu kuhya kokekumbo kilemionyi kya nguwo; Indi mwaanduye yake yose nyi ya Mndumii.