MFANANO 15 - Bibilia Kui Mdedie fo Kimochi

¹ Ihaluo ko osaṟe koilacha nyashi, Indi idedo lyewawiṟa lyekeengeṟa nyashi.

² Olimi lo wuṟango lokededa wulaanyi necha; Indi madumbu ha matondo hekepusuo wutondo.

³ Meso ha Mndumii hakeri orio handu; Hechiṟisa mcha na mbicho.

⁴ Olimi lucha nyi ikidi lya moo; Indi olimi lo wongo lokefunja mrima.

⁵ Tondo lisuo idedio nyi ndee, Indi ulya moindia wuwawaso nyi ai mṟango.

⁶ Mmba ya mndu o wusumhanyi nyi kuwode kisa king'anyi; Indi mndu mbicho nyekesambuo na wukiwa.

⁷ Dumbu lya mndu o wusumhanyi lyekelosha mecha; Indi mrima fo tondo fochiwuta fudo pfo.

⁸ Mwano fo mndu mbicho fuwichuṟye Mndumii; Indi shiterewo sha mndu mhoṟotsu nyi sia yake.

⁹ Njia ya mndu mbicho nyi iwichuṟye Mndumii; Indi nyi akundi mndu ekeosha mecha.

¹⁰ Ngapo ing'anyi nyi ya ulya moda njia njicha; Na ulya mosuo idedio nyi echipfa.

¹¹ Ko Waṟumu na inyamaṟika shi kitaṟe oshangunyi lo Mndumii Chi ngoseṟa mnu mrima ya wandu?

¹² Awode kitaluo akundi idedio pfo; Manya ekehenda na waṟango pfo.

¹³ Mrima mlalutsu fochihiṟa oshangu; Indi fowa ya mrima yekefunja ngoo.

¹⁴ Mrima fo mndu aichi fokeshiha wuṟango; Indi dumbu lya tondo lyelya wutondo.

¹⁵ Mandi hose mndu molya wukiwa nyi ai mbicho; Indi ikunyiiṟa mrimenyi nyi mfuho fo mlungana.

¹⁶ Iwada masaa maangu na iindia Mndumii; Nyi kicha kota masaa hafoi kimu na wukiwa.

¹⁷ Kando ka maṟa handu hawode ikunda; Nyi kicha kota mbe njinoru hamu na isuyana.

¹⁸ Mndu o nyashi nekeichuṟa ngapano; Indi ulya alamwitoṟye nyashi nyekeende olele.

¹⁹ Njia ya mndu mdoko nyi mfiṟiha fo msha, Indi ohendo lo mndu mhoṟotsu lochiwa njia njilandari.

²⁰ Mana ai mṟango nekechihiṟa ndee; Indi ulya tondo nekepiṟa mae.

²¹ Wutondo nyi sia ko ulya awode oṟuṟe; Indi ulya ai mṟango nekehoṟotsa ohendo loke.

²² Kulawode chila makusirio hechitsitsa; Indi kui chila ya wafoi hechiwanga.

²³ Mndu nekechihiṟo nyi mhaluye fo dumbu lyake; Na idedo lyechidedo kiheri kisumhanyi nyi lilicha cha iki.

²⁴ Mndu awode wuṟango ohendo loke lo moo lochihenda huye; Kundu nawuke ko waṟumu shi.

²⁵ Mndumii nechikuṟuo mba ya mndu o orikiki; Indi nechihoṟotsa mṟasa fo mkusu.

²⁶ Chila njiwicho isuiṟye Mndumii, Indi madedo hachihiṟye nyi mecha.

²⁷ Molanga fesa nyiekelisa mba yake amonyi wukiwa; Indi mosuo iinengo nyi echikaa na moo.

²⁸ Mrima fo mndu mhoṟotsu fokusaṟa chando echihaluo; Indi dumbu lya walasumhanyi lyekepusuo wuwicho.

²⁹ Mndumii nai kuleshe na walai na wusumhanyi; Indi nekeicho shiterewo sha wenyi wusumhanyi.

³⁰ Iwaa lya meso lyechihiṟa mrima. Mbonyi tsa sia tsenuṟisha mafuo.

³¹ Kudu kochiadanyia owingo lo lohi; Kochikaa kiidi kya waṟango.

³² Moleha wuwawaso nyi amina moo foke amonyi; Indi ulya moadanyia owingo nyi echioṟa wuṟango.

³³ Iindia Mndumii nyi wuwawaso wo wuṟango; Kisongoye kiṟumi nyi ikunyiiṟa.