MFANANO 14 - Bibilia Kui Mdedie fo Kimochi

¹ Orio mndu mka mṟango nekewika mba yake; Indi ulya ai tondo nekeisanja na mawoko hake amonyi.

² Ichu ekechumia kiidi kya wusumhanyi nyi aowoye Mndumii; Indi ichu awode okachu kiidi kyake nekemmina.

³ Dumbunyi lya mndu mtondo kwipfo olio lo orikiki; Indi dumbu lya wandu wecha lyekeringa.

⁴ Mfiṟiha fui mwiili ili fulawode mmbe; Indi pfinya tsa mmbe tsiwode kiira king'anyi.

⁵ Mṟingishi mhendeli echihamba wongo pfo; Indi mṟingishi o wongo, mṟufu foke nyi wongo.

⁶ Mndu mpiṟi nekeshiha wuṟango, nalawuwone; Indi imanya lii lyangu ko mndu akundi imanya.

⁷ Dicha oshangunyi lo tondo; Kipfa ochiwonaho idedo lyemanya pfo.

⁸ Wuṟango wo mndu mlaanyi nyi imanya njia yake; Indi wutondo wo matondo nyi wulembi.

⁹ Matondo hekemina owingo; Indi kuwode ikundia ko wasumhanyi.

¹⁰ Mrima fuichi iwawio lya mbihu, Manya mhenu echisonja manya sia yake pfo.

¹¹ Mmba ya mndu mbicho yechiwunduyo; Indi ihema lya mndu asumhanyi lyechiwikyo ona.

¹² Kuwode njia iwonyo ke isumhanyi oshangunyi lo mndu, Indi ifurumia lyayo nyi opfu.

¹³ Ma kiheri keseka-le, mrima fokesokyonyi fowa; Na ifurumia lyeseka nyi wulemeri wo mrima.

¹⁴ Moilachika mrimenyi nyekeihuda ohendo loke amonyi, Mndu o wusumhanyi nyekechihiyo kiidi kyake.

¹⁵ Isembo lyekeidikya oriyo idedo; Indi mndu mṟango nekeambuya mnu chandu aihenda;

¹⁶ Mndu mṟango nekeowuo, kadicha wuwicho; Indi tondo liwode ikuirinyisha na isohuo mondu.

¹⁷ Ichu modosa nyashi ya nduika nechiwuta wutondo; Na mndu o mtambo nyi echiwingo.

¹⁸ Matondo hechioṟa wutondo; Indi waṟango wechiṟiko oṟo ya wulaanyi.

¹⁹ Wawicho wechipfira ndi oshangunyi lo wucha, Na walai na wusumhanyi kichuminyi kya wasumhanyi.

²⁰ Mndu mkiwa nasuikie ma ko wamṟasa wake, Indi msuṟi nawode wambuya wafoi.

²¹ Ichu momina manomaye nawuta wunyamaṟi, Indi ichu mosaṟia mkiwa nawode nanga.

²² Ngesa wekedeko iwa wekusaṟa mawicho? Indi isaṟia na lohi nyi shii ko wekusaṟa mecha.

²³ Orio kiidi kya iṟunda kuwode kiira; Indi madedo ha dumbu haende kiira-pfo.

²⁴ Oṟo ya wenyi wuṟango nyi masaa hawo; Indi wutondo wo matondo nyi wutondo tupu.

²⁵ Mkaṟa o lohi nyi echikiṟa moo ya wandu; Indi modeda wongo nyekelemba.

²⁶ Iindia Mndumii nyi kikusiryo kiwanzi; Wana wake wewona kodichya.

²⁷ Iindia Mndumii nyi soka ya moo; Kundu nokushowe na mdeho fo opfu.

²⁸ Wuitoṟi wo mangi nyi mfoeṟa fo wasoṟo, Indi wandu waangu nyi inyamaṟika lya mnene owo.

²⁹ Alai mwangu idosa nyashi nyi aichi shifoi; Indi awode nduika nyi ekeṟumisha wutondo.

³⁰ Ngo injicha nyi moo fo mbihu; Indi lango nyi mafuo maporu.

³¹ Mowonyia mkiwa nyi imina mombika, Indi mosaṟiya walya wahuṟi wekemiindiya.

³² Mndu mbicho nyechikumbalyo kipfa kya wuwicho woke, Indi mhendeli nakusirye kiidi kya ipfa lyake.

³³ Wuṟango wui kiidi kya mlaanyi, Indi shilya shii kiidi kya matondo shimakiye.

³⁴ Wulohi wochiira Isanga; Indi wunyamaṟi nyi sonu ya wandu wose.

³⁵ Ikundya lya mangi lii ko isanga lyechiwuta na wuṟango; Indi nyashi yake yechihoya ichu moende wusutsu.