MFANANO 13 - Bibilia Kui Mdedie fo Kimochi

¹ Mana mṟango nekeadanyia oloho lo ndee; Indi ulya momina ekeadanyia idedio pfo.

² Mndu nechilya mecha kui ndunda tsa dumbu lyake; Indi moo fo mndu mbicho fochilya ikuiwita.

³ Ichu moringa dumbu lyake naringa mbihu foke; Kyaindi ichu mopfunuo dumbu lyake nechiwona inyamaṟika.

⁴ Mbihu fo mndu mdoko fulangie elewona kindo; Indi mbihu fo mpfuṟukanyi fochinuo.

⁵ Menyi wusumhanyi nasuo ideda wongo; Indi mndu mbicho mofurunja, nechisonu.

⁶ Wulohi wokeringia ulya mhoṟotsu kiidi kya njia yake; Indi wawicho wokeolotsa mndu mnyamaṟi.

⁷ Kuwode mndu mokusuṟisha, indi awode kindo pfo, Kuwode mndu mokuhaluo mkiwa, indi nawode masaa,

⁸ Njoko ya moo fo mndu nyi wusuṟi woke; Indi kuwode keowesha mkiwa pfo.

⁹ Sa ya mndu o wusumhanyi yechiwaa mnu; Indi taa ya mndu mbicho yechiruma.

¹⁰ Orikiki lochiende marekiano; Indi wuṟango wochikaa na wechila.

¹¹ Masaa halewono owinyi hechinyia; Indi mosambuo kitutu kitutu nechiengeṟiyo

¹² Kilya kiwedio kilache owinyi, mrima fokeluo; Indi kilya mndu ahuṟi kakiwona, nyi ikidi lya moo.

¹³ Orio momina idedo nakuendie inyamaṟika; Indi ulya aowoye iwawaso nechiambia wueri.

¹⁴ Iwawaso lya mndu mṟango nyi soka ya moo, Kundu nalekane na mdeho fo opfu.

¹⁵ Imanya licha lyekeende ikundika, Indi njia ya mkituwa yekeraha.

¹⁶ Orio mndu mṟango nekeṟunda na wulaanyi; Indi tondo lyekeola wutondo.

¹⁷ Mdume mbicho nekeoloka madekonyi Indi mdume mhendelyi nyi oru.

¹⁸ Wukiwa na fowa shekooya ichu alakundi itutumo, Indi ichu moindia mawawaso nechiichiko.

¹⁹ Kilya kilewoneka kekeloda kiidi kya ohendo lo mndu, Indi ikuṟisa na wawicho nyi kisukie matondo.

²⁰ Oshana na waṟangonowe mṟango, Indi mbuya ya matondo yechiwawio.

²¹ Wuwicho wokesahya wanyamaṟi Indi mndu o wusumhanyi nechitao mecha.

²² Mndu mcha nechideea wachuku wake kyooṟa, Na masaa ha mdeko nyi kisa kya mndu o wusumhanyi.

²³ Kando kafoi kekewoneka kui idema lya mkiwa, Indi shiipfo shinyamaṟika kipfa kya iwonyia.

²⁴ Icho elechiwada olio loke nasuo mana oke, Indi icho amkundi nekemkanga owinyi.

²⁵ Mndu o wusumhanyi nekelya kaihuda; Indi mndu mbicho nechiwado nyi njaa inga'nyi.