MFANANO 12 - Bibilia Kui Mdedie fo Kimochi

¹ Orio msa akundi kiloshyo nyi akundi wuṟango; Indi ulya asuo idedyo nyi ai cha indo lya ngeṟenyi.

² Mndu mcha nechikundika ko Mndumii; Indi mndu o mtambo nechianduyo nyi Mndumii.

³ Mndu echiwanga kui njia ya wuwicho pfo; Itsinde lya mndu o wusumhanyi lyechiwutoho manta pfo.

⁴ Mka mcha nyi oṟo ya mii oke; Indi mosutsa nyi kimu na ipuo mafuonyi.

⁵ Makusaṟo ha mndu mcha nyi wuindi; Indi makusaṟo ha mndu mbicho nyi ngafu.

⁶ Madedo ha wandu wawicho nyi iola samu; Indi dumbu lya wahoṟotsu mrimenyi lyechiwakiṟa.

⁷ Wawicho wekesaramaya, ma waihose pfo; Indi mba ya wasumhanyi yechiwanga.

⁸ Mndu nechiṟumisho kipfa kya wuṟango woke; Indi mndu o mrima fo okachu nechimino.

⁹ Nanga mndu ulya momino, kokoya awode isinga, Kota mokudosa kokoya nahuṟi kando.

¹⁰ Mndu mcha nakusaṟa kya moo fo mbe ang'u mburu tsake, Indi isaṟia lya mndu mbicho nyi wuneesi.

¹¹ Modema njauha yake nechiwada shelya shimoṟi; Indi moosha mbonyi tsa wutondo amṟango pfo.

¹² Alai mcha nekelanga ndusu tsa maṟaushi tsa wawicho Indi itsinde lya wecha lyekeṟaa ndunda.

¹³ Deko lya dumbu nyi mdeho fo wawicho; Indi mndu o wusumhanyi nechiwuka wukiwenyi.

¹⁴ Mndu nechiihuda mecha kui ndunda tsa dumbu lyake, Na mndu nechiwihiṟyo mawuto ha mawoko hake.

¹⁵ Njia ya mndu tondo injihoṟotsu mesonyi hake amonyi; Indi mndu ulya mṟango nekeadanyia oloho.

¹⁶ Nyashi ya tondo yekemanyika faṟa; Indi mndu o osaaṟe nekeṟika sonu.

¹⁷ Modeda madedo ha lohi nyeketambaṟuo wusumhanyi; Indi mṟingishi o wongo nekededa mtambo.

¹⁸ Kuwode modeda alakusaṟa, cha motocha na oshu; Indi olimi lo wusumhanyi nyi oru.

¹⁹ Dumbu lya lohi lyechiwanga maheri hose, Indi olimi lo wongo lo kioweṟe.

²⁰ Wulembi wui mrimenyi ya wekusaṟa wuwicho, Indi weitsaho ofoṟo, kowo kuwode sia.

²¹ Mndu mhoṟotsu echikooyana na opfu loose pfo Indi wewuta mawicho wechikooyana na mawicho.

²² Madumbu ha wongo nyi hasuiṟye Mndumii, Indi wewuta wuhendeli nyi sia yake.

²³ Mndu menyi wulaanyi nyi awode wuṟango; Indi mrima fo tondo fokeonguo wutondo.

²⁴ Owoko lo mndu mpfuṟukanyi lochiitoṟya; Indi mndu mdoko nechitoso okamba.

²⁵ Mndu amsokie fowa, mrima foke fochihongoma; Indi idedo licha lechichihiṟa.

²⁶ Mndu mhoṟotsu nechisongoya odoe; Indi walya walai wahoṟotsu wechidekesha.

²⁷ Mdoko echikoṟa shilya alasie pfo; Indi mndu mpfuṟukanyi nawode masaa ha wuhuru.

²⁸ Kiidi kya njia tsa lohi kuwode moo; Ma kuwode opfu ohendonyi loke pfo.