MFANANO 11 - Bibilia Kui Mdedie fo Kimochi

¹ Ratili yelemba nyi kisuiṟye Mndumii; Indi shiheo shiṟinganyi shikemchihiṟa.

² Hacheye orikiki hondu sonu ikeri; Indi wuṟango wukukerye na wekunyiiṟa.

³ Wusumhanyi wo wenyi wucha wochiwasongoya, Indi okachu lowo lo wuṟiingi lochiwarumatsa.

⁴ Masaa heketarama mkonu fo kiwi pfo; Indi wulohi wochiashuo mndu na opfu.

⁵ Wulohi wo mndu mhendeli wochimloṟa njia yake; Indi mndu mbicho nechiolotso nyi owicho loke.

⁶ Wulohi wo wahendeli wochiwakiṟa, Indi waṟiingi wechiwado ipfo mtambonyi yawo wawenyi.

⁷ Mndu mbicho kapfa, kiwedio kyake kyawedeka; Na kikusiryo kya wawicho kyasaramaya.

⁸ Menyi wulohi nechikiṟo mkonu fo kiwi, Na mndu mbicho nechiwado handu hake.

⁹ Alaidikie Ruwa nechidetsa wamṟasa oke na dumbu lyake amonyi; Indi wenyi wusumhanyi wechikia na wuṟango.

¹⁰ Wandu wecha wakawemba, mṟi fokechihiyo; Wawicho wakasaramaya, wandu wekekapa ngululu.

¹¹ Mṟi fokeṟumisho nyi mboṟa ya wenyi wusumhanyi, Indi mṟi foketandausho kui dumbu lya wawicho.

¹² Mndu alai mṟango nekepiṟa manomae; Indi mndu aichi kindo neketsia sau.

¹³ Mndu o sheeṟe kahaaya nechihamba kiṟike; Indi mndu o mrima mhendeli nekeṟika shindo.

¹⁴ Kulawode chila oruka lochioloka; Indi mfoeṟa fo wechila kokewada okiṟo.

¹⁵ Mowiia mhenu mkaṟa na kaki nechilya wukiwa; Indi mosuo wukaṟa nai kipuo.

¹⁶ Mndumka mpfudi nekeindiyo maheri hose; Na wandu walang'a wewada masaa mkonu yose.

¹⁷ Menyi isaṟia nekewuta shicha; Mlang'a nekewinyisha mbihu foke.

¹⁸ Mndu mbicho nechiambya wueri wo wulembi; Mowaaya lohi nawode wueri wokusirya.

¹⁹ Wulohi woafukia moo; Moosha mawicho naosha opfu loke amonyi.

²⁰ Mowuta wuwicho mrimenyi nyi kiwichuṟye Mndumii; Walya wahoṟotsu kiidi kya njia tsawo wechimchihiṟa.

²¹ Nyi lohi mndu mbicho echiuṟa ihoṟwo pfo; Indi oshari lo wenyi wucha wechikia.

²² Cha rachi ya sahabu injimase mbuo ya nguwe, Nyi wudo mndu mkamcha kui oshangu alai mṟango.

²³ Kilya kii kikunde nyi mndu o wusumhanyi nyi shicha tupu; Indi iwedya lya mndu mbicho nyi mosiro.

²⁴ Kuwode moola, indi kaengeṟyo ngoseṟa; Kuwode moima kilai lohi, indi nechikaa naeṟeṟe.

²⁵ Mbihu fo mndu mleki fochinuo; morutsa nechirutso amonyi.

²⁶ Moima wandu mso, wandu wemsesa; mokumba mso, ona lochikaa mdohu koke.

²⁷ Moshiha mecha ko pfinya tsose nashiha wusumhanyi; moshiha ngataṟa, tsechimchea.

²⁸ Ichu mokusirya masaa hake nechioloka; mndu o wusumhanyi nechileheka cha iṟa.

²⁹ Molisa mba yake wukiwa nechioṟa otanu; Mndu tondo nechiwa isinga lya mndu awode mrima fo wuṟango.

³⁰ Shilimu sha mndu mcha nyi ikidi lya moo; Na mndu mṟango nekekuruo mrima ya wandu.

³¹ Kuambuye, mndu o wusumhanyi nechitao aa wuyanenyi, Ngesa mbicho na mdeko chi sa kafoi mnu?