MFANANO 10 - Bibilia Kui Mdedie fo Kimochi

Madedo ha wuṟango ha Solomoni

¹ Mana awode wuṟango nekechihiṟa ndee; Kyaindi mana ai tondo nyi mhanda ko mae.

² Kisa kya wuwicho ketarama kindo pfo; Indi wulohi wochiashuo mndu opfunyi.

³ Mndumii echilekia mndu o wusumhanyi napfe njaapfo, Indi lango ya mndu mbicho nechiikumbalyia kuleshe.

⁴ Moṟunda wokulefuo nechiwa mkiwa; Indi moṟunda na pfinya nechiwa msuṟi.

⁵ Mosanyia kiheri kya kwari nyi mana mṟango, Kyaindi mohombia kiheri kya shilimu nyi mana mosutsa.

⁶ Ona lochikaya mndu o wusumhanyi mdohu koke, Kyaindi wulang'a wokeshinga dumbu lya mndu mbicho.

⁷ Ikumbuo wenyi wusumhanyi liwode ona, Kyaindi rina lya mndu mmbicho lyechipuo.

⁸ Msa mṟango mrimenyi nechiambilia iwawaso, Kyaindi tondo liwode madedo hafoi lyechioloka.

⁹ Mohenda kui wusumhanyi nechihenda kipuo; Kyaindi modetsa ohendo loke nechimanyika.

¹⁰ Mokemya na riso nechiende fowa; Kyaindi tondo liwode madedo hafoi lyechioloka.

¹¹ Dumbu lya mndu o lohi nyi soka ya moo; Kyaindi wulang'a wochishinga dumbu lya mndu mmbicho;

¹² Isuana lyechiende wuṟiingi; Kyaindi ikundana lyekeṟika madeko hose.

¹³ Wuṟango wokewono dumbunyi lya mndu aichi; Kyaindi olyio luwaṟi mhongo fo ulya alaichi.

¹⁴ Wandu wawode wuṟango wekewika kisa kya wulaanyi, Kyaindi dumbu lya isembo nyi orumatso lui hafui.

¹⁵ Masaa ha msuṟi nyi mṟi foke fo pfinya; Isaramaya lya wakiwa nyi wukiwa wowo.

¹⁶ Iṟunda lya mndu o wusumhanyi liloṟa moo; Shilimu sha wawicho shiolongia wunyamaṟi.

¹⁷ Moidikia ngapo nyi echikaa njienyi ya moo; Kyaindi moda mawawaso nedeko.

¹⁸ Moṟika nyashi nawode dumbu lya wongo, Na ichu mohaaya nyi tondo.

¹⁹ Handu kuwode madedo hafoi kochiwuṟika wuwicho pfo, Kyaindi ichu mokanga dumbu lyake namṟango.

²⁰ Olimi lo mndu o wusumhanyi nyi cha fesa njisambuṟe, mrima fo mndu mbicho fuwode kindo pfo.

²¹ Dumbu lya mndu o wusumhanyi lyeihutsa wafoi, Kyaindi matondo hekepfa kipfa halaichi kindo.

²² Ona lo Mndumii lokesuṟisha, Ma ekesanza nalo fowa pfo.

²³ Ko tondo iwuta mawicho nyi kimu na temo; Indi mndu aichi nyi awode wuṟango.

²⁴ Mndu alai na wusumhanyi kaowuo kindo nkyo kemchea; Wenyi wusumhanyi wechiinengo shilya wahuṟi.

²⁵ Kiwiriwiri kikameida alai o wusumhanyi aipfo sepfo, Kyaindi menyi wusumhanyi nyi otende lo mlungana.

²⁶ Cha mṟinga fotarang'aa mahehonyi, na cha mtsu mesonyi, Nyi wudo ai mndu mdoko ko iwo wemduma.

²⁷ Iindia Mndumii lyekeengeṟa mkonu ya mndu, Kyaindi maaka ya waiwuta sha wukika yechinyiiṟo.

²⁸ Kikusiryo kya wasumhanyi kechiwa sia; Kyaindi kikusiryo kya walasumhanyi kechideka.

²⁹ Oshangu lo Mndumii nyi kidichyonyi kya wasumhanyi; Kyaindi nyi inyamaṟika ko wewuta sha wukika.

³⁰ Mndu o wusumhanyi echiwutoho mlungana pfo; Kyaindi wewuta wunyamaṟi wechideeyo oruka pfo.

³¹ Dumbu lya mndu o wusumhanyi lyekededa wuṟango; Kyaindi olimi lo orikiki lochifurunjo.

³² Dumbu lya mndu o wusumhanyi liichi shilya sheidikio; Kyaindi dumbu lya walai wasumhanyi lyededa odetso.