MAWOOKIONYI 7 - Bibilia Kui Mdedie fo Kimochi

Mfu fung'anyi

¹ Mndumii kawia Noe, “Henda kuidie na ipfo safinenyi iyo na wa kanyi kopfo wose; kyamba kunu kiidi kya wanduwa na iyo njikuwonyiho ui mcha sumhana na inyi.”

² Noitse napfo mando hai na moo mfungade mfungade iho hai maheṟemtsu; lya kika na lya kiumi; na kya iho halai maheṟemtsu noitse napfo hawi hawi lya kiumi na lya kika,

³ na malehe ha ruwehu noitse napfo mfungade mfungade ha kika na ha kisoṟo kundu haalutse hengi iya orukenyi.

⁴ Kipfa kukamesia mfiri mfungade njechiende mvuo iya orukenyi, mkonu makumi haana kio na mfiri na orio kindo kii na moo ndekiwumba iya isangenyi njechikirumatsa.

⁵ Noe kawuta chandu alembawasa.

⁶ Nao Noe nyi we mndu o maaka mahana haṟandaṟu (600) kiheri kyo mfu fung'anyi fo mṟinga fulecha orukenyi.

⁷ Noe kaida na kulya safinenyi o, na wana wake, na mka oke na walyi wa wana handu hamu nao kipfa kya mfu fulya fo mṟinga.

⁸ Na kiidi kya mando maheṟemtsu, na halya halai maheṟemtsu na malehe na shose shekekukuruo wanda,

⁹ shikaida na kulya safinenyi kundu Noe ai, na wawi wawi, mii na mka, chandu Ruwa awewawasie Noe.

¹⁰ Nalyo kikawa mkonuyo mfungade yamesia mfu fo mṟinga fukacha orukenyi.

¹¹ Nalyo maaka fo mahana haṟandaṟu ya moo fo Noe, merifo kawi, mkonu fo ikumi na mfungade fo meri fo, soka tsa mṟinga tsa mapichi hang'anyi tsikaṟuhusuka na pfinya, shiṟoṟi sha ruwehu shikaṟuhusuka.

¹² Mvuo ikakapa orukenyi mkonu makumi haana (40), mfiri na kio.

¹³ Mkonu fulya Noe kaida na kulya safinenyi, o na wana wake Shemu, Hamu na Yafeti na mka o Noe, na walyi wa wana waṟaṟu handu hamu nao;

¹⁴ wo na orio indo lya nja kwi mbaṟi yaho, na orio indo lya mba kui mbaṟi yaho, na orio indo lyekukuruo wanda hekekukuruo iya orukenyi kui mbaṟi yakyo, na shilya shekerunduka kui mbaṟi yasho, na orio mbaṟi yose ya malehe.

¹⁵ Shileida na kulya safinenyi kundu Noe ai, shiwi shiwi sha orio kiwode mbihu kii na mumuyo fo moo ipfo kiidi.

¹⁶ Shileida napfo kya kiumi na kya kika orio shiwumbe shilya Ruwa awewawasie; Mndumii kamshingia kulya mba.

¹⁷ Mfu fulya fulekaa orukenyi mkonu makumi haana (40) mṟinga fukaengeṟeka fukairia safina ikakaa orukenyi.

¹⁸ Mṟinga fukawada pfinya, fukaengeṟeka mnu orukenyi; safina iya ikakaa huya mṟinga.

¹⁹ Mṟinga fukawada pfinya ing'anyi mnu nakamu orukenyi fukashikya mafumvu maleshe hose ha kunu orukenyi.

²⁰ Mṟinga fukawada pfinya, tane foshikya mafumvu fukaida handu ha mita mfungade na kenga.

²¹ Shose shii na moo shekechumia shikapfa, malehe na shiuma, na mando ha nja, na orio kindo kekeafuo wanda kyose na orio mndu.

²² Na orio kindo kiwode mṟufu fo moo fo mbuonyi kikawepfa, na orio kindo kiwei handu hahadutsu.

²³ Orio kindo kii na moo orukenyi kikaarisio kuleshe wokia mndu o wandu tane shiuma, na kekeafuo wanda, na shilehe sha ruwehu, shilekombetso kombi iya orukenyi; Noe katsuhaa amonyi handu hamu na iwo wai nao kiidi kya safina.

²⁴ Mṟinga fukawada pfinya orukenyi mkonu ihana na makumi hatanu (150).