MAWOOKIONYI 6 - Bibilia Kui Mdedie fo Kimochi

Wunyamaṟi wo mndu

¹ Nahong'u lilya wandu walewooka ipfumbuka iya orukenyi na wana wa kika walefeo kiidi kyawo;

² wana wa Ruwa walewona wanawo wa kika wa wandu ke nyi wawecha; wakakudaya waka, chandu wakukundia isambuṟa.

³ Mndumii kahamba; Mumuyo foko fochiwinganase na mndu o wandu manta-pfo; cha kipfa nyi ai nyama; ko ikyo maaka yake yechiwa nyi maaka ihana na makumi hawi (120).

⁴ Na Manefili nyi kunu wuyana wawei kiheri-kyo; lyefurumia wana wa Ruwa wakakusanza na wana wa kika wa wandu, wakafee nawo shiwana; iwa kacha nyiwo wawei ngohoda wandu wawode kiṟumi.

⁵ Mndumii kawona wunyamaṟi wo wandu nyi wung'anyi mnu wuyanenyi na orio kindo mndu aikusaṟa mrimenyi foke nyi kiwicho mkonu yose.

⁶ Mndumii kailacha mahiyo, kawado nyi fowa mrimenyi kipfa kya mndu o wandu alemwuumba iya wuyana.

⁷ Mndumii kahamba, “Wandu-wa ndewumba njechiwarumatsa iya orukenyi, mndu o wandu na mando ha nja na hekekukuruo wanda na malehe ha ruwehu; kipfa ngailacha mahiyo kya ili njilehawumba.”

⁸ Kyaindi Noe kawona osaṟio ko Mndumii-Ruwa.

Noe

⁹ Iki nyi kishari kya Noe. Noe nawei mndu o wusumhanyi, mhendeli ipfo kisharinyi kyake; Noe kawa mhendeli kachumia ai na Ruwa.

¹⁰ Noe kafee wana wa womi waṟaṟu: Shemu, Hamu na Yafeti:

¹¹ Wuyana wukanyamaṟika oshangunyi lo Ruwa wukaichuo wunesi.

¹² Ruwa kaambuya wuyana, ate wunyamaṟikie kipfa orio mndu nyi akufurunjia kyama kyake iya wuyanenyi.

¹³ Mndumii kawia Noe, “Mtsitsionyi fo orio msa awode mbihu fui oshangunyi loko, kipfa waichuṟa wunesi kunu wuyana; njechiwarumatsa handu hamu na wuyanawu.

¹⁴ Kehenda ikusungusiang'u safina ya mashiidi ha mvinje. Uidumbwo dumbwo shiṟiha ipfo kya mba. Uiṟinde na kimia ipfo kya mba na kya nja.

¹⁵ Nyi wudi ochiliwika: mita mahana haṟaṟu (300) wuleshe wo safina, mita makumi hatanu, (50) wulandari woyo; na mita makumi haṟaṟu (30) wulesho wo huye.

¹⁶ Nowike-pfo kiende sa, king'anyi handu ha owoko lumu, nowike na mongo ipfo owarinyi lo safina, nowikepfo makai, haṟaṟu: lya wanda, lya kawi na lya kaṟaṟu.

¹⁷ Ambuya, njiende mfu fo mṟinga kunu orukenyi, njikombetsa orio kindo kiwode mbihu na moo, kilawonose iya shi ya ruwehu; Orio kindo kii na moo iya kechipfa.

¹⁸ Kya indi njechiwikaho mkundana foko na iyo sa mbanzi; na iyo nochiida na ipfo safinenyi, iyo na wana wapfo na mka opfo, na walyi wa wana wapfo handu hamu na iyo.

¹⁹ Na orio kindo kiwode mbihu kii na moo kyose, wawi wawi wa orio mbaṟi nochiwaitsa na ipfo safinenyi, nowaiṟiche handu hamu na iyo; orio lya kisoṟo na lya kika.

²⁰ Nyi wawi wawi wa orio shindo shekerunduka kui mbaṟi yasho, na orio kindo kekekukuruo wanda kui mbaṟi yasho shechicha na kopfo, kundu noshisuṟume.

²¹ Nochisanyia orio mbaṟi ya shelya shekelio, nosuṟume nakyo kechiwa kelya kyanu na kyaho.”

²² Nyi wudo Noe aleṟunda, isho shose chando Ruwa alemtutuma, isho nyisho aleshiṟunda.