MAWOOKIONYI 49 - Bibilia Kui Mdedie fo Kimochi

Yakobo awikia wana wake ona

¹ Yakobo kalaha wana wake, kahamba, “Kusanzienyi handu hamu, kundu njimuwie shindo shechimuhoya mkonu yechicha.

² Kusanzienyi, muicho lanye wana wa Yakobo njiadanyienyi Israeli, ndeanu.

³ Reubeni, ui mana oko mmbee, Pfinya tsako, na wuilewetsi wo wuidimi woko, nuelewetsie wengi kui wunene na pfinya.

⁴ Nutoolie mṟasa cha mfu fo mṟinga, na kulawadese wunene, Kipfa kuledooya kitaṟenyi kya ndeo, Kokiterefutsa; nalekidooya kitaṟa kyako.

⁵ Simeoni na Lewi nyi wana wa mka. Njoshu tsawo nyi shisha sha wutimbiri.

⁶ Mrima foko, kulaide na kiidi kya kiṟike kyawo, Wulole woko, kulakulunge na kisanzio kyawo, Kyamba kiidi kya tuuke yawo walewaha mndu, Na kui orikiki lowo waledumbuo mri fo mmbe;

⁷ Tuuke yawo na iseso, kyamba iwenjiwawo, Na nyashi yawo, kyamba ilawewode makulili. Njechiwahawa kiidi kya Yakobo, Njechiwapaṟatsana kiidi kya Israeli,

⁸ Yuda, wana wa mayo wechikuichika, Owoko lopfo lochikaa nzingonyi ya wakituwa wapfo. Wana wa ndeo wechikuaramia.

⁹ Yuda nyi ialea lya miiso (simba) Kuwuka kilasionyi, mana oko, noledopfo. Nalearama kakulaṟa wanda cha miiso, Na cha miiso njika; nyiu echimwamtsa?

¹⁰ Ndichi ya wumangi yechilekana ipfo ko Yudapfo. Manya mowika mawawaso madendenyi hakepfo. Na kuwede nache Ichu, menyi uikolonyi. Ichu mkambo ya wandu wechimwindia.

¹¹ Nechipfunga nzoi yake kidinyi kya msabibu, Na ihache lyake lya nzoi kidinyi kya msabibu mcha. Nasanjie nguo tsake na mpfinyo, Na maṟao hake na samu ya msabibu.

¹² Meso hake hechifana kimaande kui mpfinyo, Na maheho hake hechiila cha maruwa.

¹³ Zebloni nechikaa mbai ya ipalyipalyi, Nechiwa mbai ya ipalyipalyi cha handu heleṟia merikebu. Na mṟasa foke fochiwa mbai ya Sidoni.

¹⁴ Isakari nyi nzoi iwode pfinya. Ekekulaṟa kiidi kya mapo ha machondi;

¹⁵ Nalewona ke handu hesia moo nyiho hecha, Na oruka ke nyi lulucha, Kaaramtsa koso lyake lyiduo mhanda, Kawa isinga ko maṟunda maumu.

¹⁶ Dani nechianduya wandu wake, Cha umu o mkambo fo Israeli;

¹⁷ Dani nechiwa njoka mtandarenyi, njoka ya wuṟoi mbai ya njia. Ekeimada mbahachu tsa frasi, kundu msa echiidoya nechiho na mhongo.

¹⁸ Okiṟo lopfo njileluwedia, Hoi Mndumii-Ruwa.

¹⁹ Gadi ichekeṟo lechimṟingichia, Kyaindi nechiwaṟingichia wo mṟasa kitsinano.

²⁰ Aseri, kelya kyake kechiwa kinoru. Nao nechilekia sha nnga sha wumangi.

²¹ Naftali nyi mburu ya nja njika ilanjipfunge; yekeshaa shidahina shicha.

²² Yosefu nyi ikidi lya oṟuwe liikumbia, ikidi lyitutu likumbia kufui na soka, maṟamba hake hakualie mawandenyi.

²³ Welasa na mfi walembutia shiwawo kuinyashi. Wakamkumbia, wakamsukiṟa mnu iki kiwicho.

²⁴ Kya indi wuda woke wukakaa wuwanzi. Mawoko hake hakawada pfinya, Kui mawoko ha mopfinya o Yakobo; Kui rina lya mlisi, nyio iṟaṟa lya Israeli.

²⁵ Ee-da kui Ruwa o ndeo nyio echikutarama. Na kui Ruwa Menyipfinya echikuwikia mboṟa. Kui mboṟa tsa ruwehu huye. Mboṟa tsa mṟingenyi kundu kuṟungukie kui wanda, mboṟa tsa mawee na tsa wusunyi.

²⁶ Mboṟa tsa ndeo, tsiidie mboṟa tsa mafumvu ha mlungana; Shindo shiwode kiweṟe sha mafumvunyi ha mlungana; Huya ododo lo mdo foke icho Shikekaa huya mdo fo Yosefu, huye ya ichu awemletsane na wana wa mae.

²⁷ Benyameni nyi kite kya ngeṟenyi ekeranduo randuo, ngamenyi nechilya shilya alewada, na kyukanyi nechihawa shilya aleende shidenyi.”

²⁸ Itso nyitso mbaṟi tsa Israeli ikumi na tsiwi. Na isho nsho ndeawo alewawia, na iwawikia mboṟa; kui umu umu kui mboṟa yake alewawikia.

Opfu lo Yakobo

²⁹ Kawawawasa, kechihamba, “Inyi njihenda isanyio handu hamu na wandu wako; munjiṟike hamu na wande wako, opangenyi lui demenyi lya Efroni, Mhiti;

³⁰ kulya opangenyi lo dema lya Makipela, liambuyanyi na Mamre orukenyi lo Kanaani, sa Abrahamu alelihuṟa handu hamu na dema lya Efroni Mhiti, hawe handu hake heṟika wandu.

³¹ Npfo kundo waleṟika Abrahamu, na mka oke Sara napfo waleweṟika Isaki na mka oke Rebeka, na inyi napfondo njileṟika Lea;

³² dema na opanga lyiipfo lilehuṟo ko Wahiti.”

³³ Nahong'u Yakobo kekimarisa iwawasa wana wake, kairia madende hake kitaṟenyi, kapfa, kasanzio handu hamu na waku wake.