MAWOOKIONYI 45 - Bibilia Kui Mdedie fo Kimochi

Yosefu akumanyisha ko wana wamae

¹ O Yosefu alaidime itirisia oshangunyi lo iwo wose wawehoṟoki hafui nao. Kakoṟoṟoma, kechihamba, Orio mndu nakure iya oshangunyi loko. Manya kulehoṟoka mndu hamu nao, kiherikyo Yosefu alekuloṟa na wana wa maepfo.

² Kalesha ṟu lyake kafihiṟa, nawo Wamisri wakaicho. Wandu wa mba ya Farao wakaicho.

³ Yosefu kawia wana wa mae, “Inyi nyio Yosefu; wande oko na akeri na moo?” Manya wana wa mae walaidime imhaluo, kyamba walewado nyi wuowu oshangunyi loke.

⁴ Yosefu kawia wana wa mae, Kenjonyi hafui na inyi; naho, wakatikiria, kahamba, “Inyi nyi Yosefu, mano mayanu, sa mlenjikumba ihenda Misri.

⁵ Kyasia wulalu, mulawado nyi fowa, manya mulakangaṟike mrimenyi yanu, kya injikumba kunu; kyamba Ruwa nalenjidika oshangunyi lonu iringa moo ya wandu.

⁶ Cha kipfa maaka ii iwi kulewada njaa orukenyi, na kuipfose maaka ingi itanu ilawode idema ma isambuo.

⁷ Ruwa nalenjisongoṟa imteseheṟia mtsuhaṟo kunu orukenyi, na imukiṟa nyo kui okiṟo lung'anyi mnu.

⁸ Kyasia chinyo mulenjidika kunupfo, shile nyi Ruwa; kanjiwika cha wande ko Farao, na mndumii kiidi kya mba yake yose, na mchili kunu orukenyi lose lo Misri.

⁹ Kambiṟenyi owinyi, muhendie wande, mukemmbia, “Mana opfo Yosefu nyi wudi ahamba, ‘Ruwa nalenjiwika mndumii kunu Misri kose, kyasia kesokang'u, kulatirime.

¹⁰ Na iyo nochikaa orukenyi lo Gosheni, nochikaa kufui na inyi, iyo, na wana wapfo, na wana wa wana wapfo, na shuma shapfo, mmbe tsapfo, na shose uwode.

¹¹ Mkomcha na kunu Gosheni, njechiidima imuambuya necha. Kyamba kutsuhee ho maka ingi itanu ya njaa, na inyi njikundi iyo na mba yapfo na shuma shapfo shipfe na njaa pfo.’”

¹² Na keambuya, meso hanu hawonyi, na meso ha mano wama Benyamini, ke nyi dumbu lyako likeri ideda nanyo.

¹³ Nanyo mochiwia wande oko mbonyi tsa kiṟumi kyako kyose kunu Misri, na kya shose mleshiwona; itikenyi owinyi muende wande oko na kunu.

¹⁴ Kaolokia mano mae Benyameni nzingonyi, kafihiṟa nao Benyameni kawefihiṟia nzingonyi yake.

¹⁵ Kahekia momu wana wa mae wose, kafihiṟa nawo, lyefurumia, wana wa mae wakakapa nao sumu.

Farao alaha Yakobo nahende Misri

¹⁶ Mbonyi tsikamanyika kanyi ko Farao ke, “Wana wa mae wa Yosefu wamecha.” Kikawa kicha oshangunyi lo Farao, na oshangunyi lo masinga hake.

¹⁷ Farao kawia Yosefu, “Wia wana wa mayo, ‘Wikenyi mudi; kapisenyi nzoi tsanu na mhandayo, mukure muhende orukenyi lo Kanaani;

¹⁸ numa muende ndeanu, na wandu wa kanyi konu, munjicheye; na inyi njechimuinenga ora lucha lo Misri, nanyo mochilya shinoru sha orukalu.’”

¹⁹ Na iyo nowawaso; wikenyi mudi, irenyi makari kuwuka Misri kipfa kya wana wanu watutu na waka wanu, muonduo na ndeanu, muche.

²⁰ Manya mlakuwinyishe kya shindo shanu, kyamba mecha ha oruka lo Misri hose nyi hanu.

²¹ Nyi wudo wana wa Israeli walewuta. Yosefu kawainenga makari chando Farao alewawasa, kawainenga na kichawu kya njienyi.

²² Kawainenga orio mndu nguo tseilacha; kyaindi Benyameni, nalemnenga fesa mahana haṟaṟu (300) na mṟae itanu yeilacha.

²³ Na ndeawo kamdikia ishi; nzoi ikumi tsirie mecha ha Misri, na nzoi njika ikumi tsirie Ngano na mkate, na kichawu kya ndee kya njienyi.

²⁴ Yosefu kasamana na wana wa mae, wakakuhendia; nao kawawia, “Mulaloyane ipfo njienyi.”

²⁵ Wakakure Misri, wakashika orukenyi lo Kanaani ko ndeawo Yakobo.

²⁶ Wakamnenga mbonyi, wehamba, “Yosefu nai na moo; nao nyio mchili orukenyi lo Misri lose.” Mrima foke fukasinyia, kipfa alalewaidikia.

²⁷ Wakambia madedo hose ha Yosefu, alewawia; na kekiwona makari Yosefu alehadika, kundu hamduo, mrima fo ndeawo Yakobo fukaṟuka.

²⁸ Israeli kahamba, “Kishikieng'u! Mana oko Yosefu nawei na moo; njechihenda, njiwonane nao njilamepfe.”