MAWOOKIONYI 44 - Bibilia Kui Mdedie fo Kimochi

Kirahu kyakoyo ko Benyameni

¹ Kawawasa ulya mohoṟokia mba yake kechihamba, “Ichuṟa makunyia ha wandu wa kelya chandu weidima iduo, nowike na fesa tsa orio mndu ipfo momunyi ya ikunyia lyake.

² Na kikombe kyako, kikombe kilya kya fesa, nokiwike momunyi fo ikunyia lya ulya mtutu handu hamu na fesa ya Ngano yake.” Nao kawuta chandu Yosefu alemmbia.

³ Ngamenyi koikitambaṟuka, wandu wo wakainengo momu wo na nzoi tsawo.

⁴ Na wekikure kulya mṟinyi, ma walameshika haleshe mnu, Yosefu kawia ulya mohoṟokia mba yake, “Kure, nooshe wanduwa, na iyo komewakoya, wawie, ‘Nki ili motaa mawicho ko mecha?’ Nki ili moiwa kikombe kya mndumii oko.

⁵ Ngesa! Kikombe-ki chi kilya mndumii oko ekenyoya? Nao nkyo ekelasha nakyo. Mulewuta owicho ili mletana mudo.”

⁶ Kawaosha numa, kawakoya, na iwawia madedo ho.

⁷ Wakambia, “Nki ili mndumii oko aihamba madedo cha iho? Manyale! Masinga hapfo walawute wado.

⁸ Ambuya fesatso luletsiwona momunyi ya makunyia hadu, lulekuendiese luwuka orukenyi lo Kanaani. So luidimese luda iiwa fesa ang'u sahapu kanyi ko mndumii opfo?

⁹ Icho echikoya ai nakyo kiidi kya masinga hapfo na napfe, naso daa lochiwa masinga ha mndumii oko.”

¹⁰ Kahamba, “Nahong'u kiwe kido chandu mohamba, Mndu echikoyo ai nakyo nechiwa isinga lyako; nanyo mochikaa mlawode mti.”

¹¹ Wakapfuṟukana owinyi, wakasotsia wanda orio mndu na ikunyia lyake, na ipfunguo orio mndu na ikunyia lyake.

¹² Nao kawalia kawokia ko ulya ang'anyi na imarisia na ko ulya mtutu. Kikombe kikawono ikunyienyi lya Benyameni.

¹³ Wakaranduo nguo tsawo, wakahekia orio mndu mhanda foke huya nzoi yake, wakawuya na mṟinyi.

¹⁴ Yuda na wana wa mae wakacha na kanyi ko Yosefu, nao amonyi naweipfo, nawo wakamwolokia wanda na kyamu.

¹⁵ Yosefu kawawia, “Nkindo kiki iki mlekiwuta? Mlemanya ke mndu cha inyi njechiidima ilasha?”

¹⁶ Yuda kahamba, Luwie kiki mndumii oko? Ludede luda? Lukauwalie luda wusumhanyi? Ruwa amewona wuwicho wo masinga hapfo. Ambuya, so lui masinga ha mndumii oko, so na icho sa kikombe kilekoyo owokonyi loke.

¹⁷ Kyaindi kahamba, “O manyale, njilawute njidi msa kikombe kilekoyo owokonyi loke, nyio echiwa isinga lyako. Nanyo kuhendienying'u ko ofoṟo ko ndeanu.”

Yuda adeda kya Benyameni

¹⁸ Nalyo Yuda kamsembelia, kahamba, “Hoi mndumii oko, isinga lyapfo lyikekudedia idedo limu madunyi ha mndumii oko, manya nyashi yapfo ilanjiakie isinga lyapfo, kyamba iyo nyi kimu na Farao.

¹⁹ Iyo mndumii oko kuleluwesa so masinga hapfo, kochihamba, ‘Ngesa muwode ndeanu, ang'u wana wa mayanu?’

²⁰ Lukaakuwia iyo, mndumii oko, Luwode ndeadu, nao nyi mmeku, na mana o wukunyi namtutu, na mana mae nalepfa; natsuhee ho o amonyi o wusunyi wo mae, na ndee namkundi.

²¹ Koluwia so masinga hapfo, ‘Meendenyi na koko, kundu meso hako hamwambuye.’

²² Lukaakuwia, mndumii oko, ‘Manakecho eidima ida ndeepfo, kipfa kada ndee, ndee nechipfa.’

²³ Koluwia masinga hapfo, ‘Alamesoke mano mayanu-cho mtutu hamu nanyo, mochiwonase kyamu kyakopfo.’

²⁴ Naho lilya lulehenda ko isinga lyapfo wande oko, lukambia madedo hapfo, mndumii oko.

²⁵ Nahong'u ndeadu kadeda, ‘Wuyenyi napfo mkeluhuṟia kelya sa kitutu.’

²⁶ Lulehamba, ‘Loidima ihendapfo; mano mayadu mtutu ai hamu naso, lochisoka; kyamba lochiidima iwona kyamu kya mnduchopfo, mano mayadu mtutu alamekae naso.’

²⁷ Isinga lyapfo, ndeako, kaluwia, ‘Muichi ke mka oko nalenjiwonyia wana wawi; umu nalewuka koko.’

²⁸ Na inyi ngahamba, ‘Nkya lohi naleranduyoranduyo manya njilembonase wokia ilyopfo.

²⁹ Na mukanjisokase na ichu, na ngataṟa tsikamhoya, mochisotsia mhasa yako na fowa kipfunyi.’

³⁰ “Kyasia, ngahenda ko isinga lyapfo wande oko, na manakechu alarianyi hamu naso, na chandu mrima foke fuwadanyi na mrima fo manakechu

³¹ kechiwa ili echiwona ke manakechu ai nasopfo, nechipfa; na masinga hapfo wechisotsia mhasa ya isinga lyapfo, ndeadu, na fowa kipfunyi.

³² Kyamba isinga lyapfo, lilekuwika mkaṟa o manakechu ko wande, njechihamba, ‘Njilamembihiṟe na kopfo, njechiwada mti ko wande oko mkonu yose.’

³³ Kyasia, wulalu ngakuterewa ukudeye inyi isinga lyapfo njikae handu ha manakechu njiwe isinga lya mndumii oko; na manakechu umlekie nahende hamu na wana wa mae.

³⁴ Kyamba njechiidima njida ihendia wande, na manakechu alarianyi na inyi? Ngaowuo Njilache iwona mawicho hechihoya wande oko.”