MAWOOKIONYI 42 - Bibilia Kui Mdedie fo Kimochi

Wana wa mae wa Yosefu wahenda Misri

¹ Kyasia Yakobo kekiicho ke kuwode ngano kulya Misri, Yakobo kawia wana wake, “Nki ili muiambuyana?”

² Kahamba, “Ambuya, ngameicho ke kuwode ngano kulya Misri; sokenyi napfo muluhuṟiepfo kelya lukie moo lulapfe.”

³ Wana wa mae wa Yosefu ikumi wakasoka na Misri kundu wahuṟepfo ngano.

⁴ Kyaindi Benyameni, mano mae o Yosefu, Yakobo alemduma na wana wa maepfo, kyamba nalehamba, Nalahoyo nndenga.

⁵ Wana wa Israeli wakacha wahuṟe kelya kiidi kya iwo walecha, cha kipfa kuwewode njaa orukenyi lo Kanaani.

⁶ Nao Yosefu nawei mchili o oruka, nyio aweiwakumbia wandu wose wa orukenyi. Na wana wa mae wa Yosefu wakacha, wakaarama wanda na kyamu oshangunyi loke.

⁷ Yosefu kawona wana wa mae, kawamanya indi kakuhaluo cha mhenu kowo. Kadeda nawo kui madedo hepooma, kawawia, “Nyo nku mowuka?” Wakahamba, “Lowuka orukenyi lo Kanaani, luche ihuṟa kelya.”

⁸ Yosefu kamanya wana wa mae, indi wo walammanye.

⁹ Yosefu kakumbuo ndodo tsilya alewalodia. Kawawia, “Nyo nyi weṟisa, mocha kundu muwone kiṟike kya orukalu.”

¹⁰ Wakambia, “Manyale, mndumii, masinga hapfo locha kundu luhuṟe kelya.

¹¹ So lose lui wana wa mndu umu, lui wandu wa lohi; masinga hapfo chi weṟisapfo”

¹² Kawawia, “Chi wudopfo, mocha kundu muwone kiṟike kya orukalu.”

¹³ Wakambia, “So masinga hapfo lui wana wa mka ikumi na wawi, wana wa mndu umu kulya orukenyi lo Kanaani; na manndu odu nakeri na ndeadu inu, na umu aipfopfo.”

¹⁴ Yosefu kawawia, “Nyi wudo ngamuwia, njechihamba, Nyo nyi weṟisa.”

¹⁵ Mochimanyika mudi; So Farao, mochikure iyapfo, shile mananucho mtutu acha na iya.

¹⁶ Dumenyi umu onu nahende naende manomayanu nanyo mochipfungo, tane madedo hanu haṟingishio, kokoya muwode lohi nyo; shila wudo, so Farao nyo nyi weṟisa.

¹⁷ Kawawika wose kipfungonyi mkonu iṟaṟu.

¹⁸ Yosefu kawawia mkonu fo kaṟaṟu, “Wikeni mudi, mukie, kyamba ma inyi nji mhendeli o Ruwa.

¹⁹ Kokoya nyo na wa lohi, mano mayanu umu napfungo kipfungonyi, nanyo hendenyi muduo Ngano kipfa kya njaa ya kanyi konu,

²⁰ mukenjiendie mano mayacho mtutu; kudo madedo hanu hechiṟingishio, manya mochipfapfo.” Nyi wudo walewika.

²¹ Wakawiana, “Lohi so luledekio mano mayadu kyamba lulewona wukiwa wo mrima foke, lilya aletuterewa, manya lulaandanyie; ko ikyo wukiwawu wolukoya.”

²² Reubeni kahaluo, kawawia, “Njilemuwia, njechihamba, manya mulanyamaṟie manakechu, manya mulaicho; ko ikyo samu yake yakundose.

²³ Ma walamanye ke Yosefu nawaichuo, kyamba kuwewode motambahaluo kiidi kyawo.

²⁴ Kateshukia handu haleshe nawo kafihiṟa; numa kawawuuyase, na ideda nawo, kairaho Simeoni kiidi kyawo kamkumba kipfungonyi mesonyi hawo.”

Wana wa mae wa Yosefu wawuya na kanyi

²⁵ Yosefu kawawasa shikunja shawo shiichuṟo Ngano, na iwihiṟia orio mndu pesa tsake ipfo ikunyienyi lyake, na iwainenga kelya kya njienyi.

²⁶ Na wudo walewawutia wakahekia Ngano yawo huya nzoi tsawo wakakurepfo.

²⁷ Umu owo kapfunguo ikunyia lyake kundu nainenge nzoi yake kelya wai mmbenyi ya wahenu, kawona pesa tsake; ate, tsikeri o momunyi ya ikunyia lyake

²⁸ Kawia wana wa mae, “Pesa tsako ngawihiṟio, ambuya aitsi tsi kunu ikunyienyi lyako.” Mrima yawo ikauma ndadia, wakaembeṟukiana wechidedema, wakahamba, “Nkiki iki Ruwa aluwutia?”

²⁹ Wakacha na ko ndeawo Yakobo, kulya orukenyi lo Kanaani, wakambia mbonyi tsilewahoya, wechihamba,

³⁰ “Mndu ulya ai mndumii o oruka nalededa naso ko madedo helupomia, kalutana lui weṟisa oruka.

³¹ Lukaambia, so lui wandu wa lohi, manya chi weṟisapfo.”

³² So lui wana wa mka ikumi na wawi, wana wa ndeadu. Umu aipfopfo, na manndu odu nai na ndeadu inu kulya orukenyi lo Kanaani.

³³ Mndu ulya, mndumii o oruka, kaluwia, “Ko njia ii njechimumanya kokoya mui wandu wa lohi; denyi mano mayanu umu kunu koko, duonyi Ngano kipfa kya njaa kanyi konu, mukuhendie.

³⁴ Mkenjiendie mano mayanu mtutu; lyondi njechimanya kokoya mulai weṟisa, indi nyi wandu wa lohi, kyasia njechimuwihiṟia mano mayanu, nanyo mochikapa mbucha kunu orukenyi.”

³⁵ Kukashikia wechiletsa Ngano kuwuka makunyienyi hawo, ate! Kikuchu kya fesa ya orio mndu ikeri ipfo ikunyienyi lyake. Nawo wekiwona kikuchu kya fesa tsawo, wo na ndeawo wakaowuo.

³⁶ Ndeawo Yakobo kawawia, “Muleira wana wako iya; Yosefu aipfopfo, manya Simeoni aipfopfo, na Benyameni, nao mukundi imuduo; mbonyi tso tsinjihoya inyi.”

³⁷ Reubeni kawia ndee, kahamba, “Kuwahie wana wako wawi kokoya njilawihiṟa Benyameni na kopfo; mmbike mawokonyi hako, na inyi njechimmbihiṟa na kopfo.”

³⁸ Kahamba, “Mana oko echisoka nanyopfo, kyamba mana o mae nalepfa, nao kadeoho amonyi; mawicho hakamhoya ipfo njienyi kundu muihenda, lyondi mochisotsia mhasa yako kui fowa mṟasa ipfa lyako.”