MAWOOKIONYI 41 - Bibilia Kui Mdedie fo Kimochi

Yosefu oshangunyi lo Farao

¹ Kikashikia, mtsitsionyi fo maaka iwi iichuo, Farao kalodia ndodo; ambuya nahoṟoki mbai ya meda fo Nili.

² Atsilya mmbe mfungade njicha, tsinjinoru tsado tsiwuka kulya medeni, tsikalya maṟa.

³ Na atsilya mmbe tsingise mfungade tsikado numa ya tsilya tsiwuka medeni fo Nili, njiwicho, njipootse, tsikahoṟoka kufui na mmbe tsilya tsingi wambaṟa ya meda.

⁴ Numa mmbe tsilya njiwicho njipootse tsikameṟa mmbe tsilya mfungade njicha, njinoru. Nohong'u Farao kakure madonyi.

⁵ Kalaa, kalodia. Se ndodo lya kawi. Ambuya, mahaa mfungade hadooye kiidi kya ishaku lyimu, hang'anyi mecha.

⁶ Na ambuya-se mahaa mfungade masise, hamaumiṟe nyi otanu lo ora lo ngamenyi hakakumbia numa yaho.

⁷ Naho mahaa halya masise mfungade hakameṟa mahaa halya mfungade hang'anyi haṟee. Nahong'u Farao kakure ate nyi ndodo tupu.

⁸ Tane ngamenyi ngoo yake ikaeṟewe; kaduma wandu walahe wahanga wose wa Misri, na wandu wose wawode osaṟe wakeripfo. Farao kawaongoya ndodo yake, ma kulawoneke sa aleidima itambahaluya Farao mbonyitso.

⁹ Kyasia mnene o werutsa mangi mvinyo kawia Farao kechihamba, “Ngamekumbuo madeko hako inu.”

¹⁰ Kiheri Farao alesuuya masinga hake nyashi, kanjiwika njipfungo kanyi ko mnene o waskari, inyi na mnene o wekahaṟa mkate.

¹¹ Lukaalodia ndodo kio kimu, inyi nao; orio mndu kui otambahaluo lo ndodo yake.

¹² Na ipfo hamu naso kuweipfo na manake Mwebri, mṟundi o mnene o Waskari, lukamwongoya, nao kalutambahaluya ndodo tsadu; katambahaluya orio mndu chando ndodo yake iwei.

¹³ Kikawewa kido chando alelutambahaluya, nyi wudo kilewewa; inyi ngawihiṟio kiṟundionyi kya ko, nao nalemaso.

¹⁴ Nlyondi Farao aleduma wandu, kalaha Yosefu wakamwende faṟa kuwuka kipfungonyi. Yosefu kamaa ioda, kailacha nguo tsake, na iida na ko Farao.

¹⁵ Farao kawia Yosefu, “Njilelodia ndodo, ma kuipfo aidima injitambahaluyapfo; na inyi ngaicho mbonyi tsapfo, ke komeicho ndodo, nokeidima iitambahaluo.”

¹⁶ Yosefu kahaluo Farao, kambia, “Chi inyipfo; Ruwa nechiinenga Farao oloho lo ofoṟo.”

¹⁷ Farao kawia Yosefu, “Kiidi kya ndodo yako njiwehoṟoki mbai ya meda fo Nili;

¹⁸ na ambuya, mmbe mfungade tsido medeni fo Nili, njinoru, njicha tsechikulia maṟa, mecha.

¹⁹ Numa ambuya mmbe tsingi mfungade tsikado numa yatso, njipootse, njiwicho mnu; manjilemewone mbe tsa mbaṟeyo kunu urukenyi lo Misri pfo.

²⁰ Na mmbetso mfungade njipotse na njiwicho, tsikameṟa mmbe tsilya mfungade tsa kuwoka, tsilya njinoru.

²¹ Na tsametsimeṟa tsilamanyike ke tsamelya, indi tsilewa njiwicho cha kuwooka. Nahong'u ngakure.

²² Nahong'u ngawona-se kiidi kya ndodo yako, aiha, mahaa mfungade haleoṟa kiidi kya ishaku limu, mecha, haichuo.

²³ Na aiha mahaa mfungade masise mafila, haleumiṟo nyi otanu lo ora lo ngamenyi, hakaoṟa numa ya iho.

²⁴ Mahaa halya hai mafila hakameṟa mahaa halya mfungade mecha. Na inyi ngawia wahangawo ma kuwode msa aleidima injiloṟa kitewe kyayopfo.”

²⁵ Yosefu kawia Farao, “Ndodo yapfo nyi imu tupu, Ruwa nalekuloṟa Farao chando arie ikuwutia mkonu ya afui.

²⁶ Mmbe tsilya njicha mfungade nyi maaka mfungade; na mahaa halya mfungade mecha nyi maaka mfungade. Ndodo nyi imu.

²⁷ Mmbe tsilya mfungade njifari njiwicho tsiledo numa ya itso nyi maaka mfungade; na mahaa halya mfungade mafila hamaumiṟe nyi otanu lo ora lo ngamenyi hechiwa maaka mfungade ya njaa.

²⁸ “Nyi wudo chando njilewia Farao, ke Ruwa nakuloṟa shindo echiwuta mafiri ha ha wulalu.

²⁹ Ambuya, kuicha maaka mfungade ya mboṟa, orukenyi lo Misri lose.

³⁰ Numa kuche maaka mfungade ya njaa numa yake; na mboṟa iya yechihadimo orukenyi lo Misri, na njaa yechinyamaṟa oruka.

³¹ Manya mboṟa yechimanyikase kunu orukenyi-pfo kipfa kya njaa yechicha lyefurumia kyamba yechiwa njiwawo mnu.

³² Na ndodo ya Farao ili ilecha makamba hawi, nyi Ruwa aleliṟingishia idedolyo, na Ruwa nailiawutsia owinyi.

³³ Kyasiang'u Farao nakekuwalia mndu awode wuṟango na osaaṟe nammbike huya oruka lo Misri.

³⁴ Farao nawute adi, nawikese wehoṟokia orukalu, wakeira kienga kya katanu kiidi kya Misri, ko maaka ii mfungade ya mboṟa.

³⁵ Wakesanya shelya shose sha maaka ii njicha ikeri icha, waleṟie kisa kya Ngano owokonyi lo Farao, wakiringe kiwe kelya kya mṟinyi.

³⁶ Na kelya kyo kechiwa kisa kya oruka kipfa kya maakayo mfungade ya njaa, yekaa iche orukenyi lo Misri, oruka lulanyamaṟo nyi njaa.”

Yosefu awiko msongoru

³⁷ Oloholo lukachia mesonyi ha Farao, na mesonyi ha masinga hake hose.

³⁸ Farao kawia masinga hake, “Luendeku mndu cha ichu, awode Mumuyo fo Ruwa kiidi kyake?”

³⁹ Farao kawia Yosefu, “Kyamba Ruwa amekumanyisha isho shose, kuwode msa awode wuṟango na osaaṟe cha iyopfo.

⁴⁰ Kyasia iyo nochiwa mokalia oruka loko, na kui idedo lyapfo wandu wako wechichilio. Nyi loṟikehu lo wuitoṟi tupu njechiwa mnene kota iyo.”

⁴¹ Farao kawia Yosefu, “Ambuya, ngakuwika huya oruka lose lo Misri.”

⁴² Farao kawuta pete yake ya mhuri o wokonyi loke, kaiwika owokonyi lo Yosefu; kamṟika maṟao ha nguo mecha, na immbikia mshe fo sahapu nzingonyi yake.

⁴³ Kamdosia ikarinyi lyake lya kawi awei nalyo. Na wandu wakawika kitohio mbele yake, “Pfirenyi ndi.” Ko ikyo kammbika huya oruka lose lo Misri.

⁴⁴ Ngoseṟa Farao kawia Yosefu, “Inyi nyi Farao, na shile iwawaso lyapfo, mndu nalairie owoko manya kudende kunu orukenyi lose lo Misri.”

⁴⁵ Farao kadumbuya Yosefu rina nyi Safenath-panea; kamwalikia mka Asinati, mana o waka o Potifera, mkohanyi o Oni. Yosefu kachumia ipfo na ipfo orukenyi lose lo Misri.

⁴⁶ Nao Yosefu nawewode maaka makumi haṟaṟu, kiheri alehoṟoka oshangunyi lo Farao, mangi ya Misri. Yosefu kakure oshangunyi lo Farao, kachumia orukenyi lose lo Misri.

⁴⁷ Kikawa ke kiheri kya maaka iya mfungade ya mboṟa oruka lukawona shifoi.

⁴⁸ Kasanyia shelya shose sha maaka iya mfungade kulya orukenyi lo Misri. Kawika shelya mṟinyi; kelya kya madema hatengetie orio mṟi, kakiwika ipfo mṟinyi.

⁴⁹ Yosefu kasanya Ngano cha msanga fo mbai ya ipalyi palyi, shifoi mnu, tane ada alaitala, kyamba shilawewode iitala.

⁵⁰ Maaka ya njaa ilamecha, Yosefu kafeo wana wawi, sa Asinathi, mana o Potifera, mkohanyi o Oni, alembonyia.

⁵¹ Yosefu kadumbuya rina mana ulya mmbe nyi Manase , kyamba nalehamba, “Ruwa amenjiinenga ihadima mawina hako hose, na mba yose ya wande.”

⁵² O kawi kamdumbuya rina nyi Efraimu, kyamba nalehamba, “Ruwa amennenga wufee orukenyi lo matuuro hako.”

⁵³ Maaka iya mfungade ya iihuda ikasia kulya orukenyi lo Misri.

⁵⁴ Ikawoka icha maaka iya mfungade ya njaa, chando Yosefu elewehamba. Kukacha njaa njorukenyi, indi orukenyi lo Misri kuwewode kelya,

⁵⁵ Na oruka lose lo Misri lokiwona njaa, wandu wakafuhia Farao nawainenge kelya. Farao kawia Wamisri, “Hendenyi ko Yosefu; chandu echimuwia, kewewutenyi.”

⁵⁶ Kukaho njaa wuyanenyi kose da; Yosefu kapfunguo shikumbi shose, kakumbia Wamisri. Kyamba njaa ilerohia orukenyi lo Misri.

⁵⁷ Ngoseṟa Wandu wa njoruka wakacha na Misri ko Yosefu; kundu wahuṟepfo ngano; kipfa kya njaa ilerohia mnu wuyanenyi kose.