MAWOOKIONYI 40 - Bibilia Kui Mdedie fo Kimochi

Yosefu atambahaluo ndodo

¹ Kekishika, numa ya mbonyitso, morutsa mangi ya Misri mvinyo na mokahaṟa mkate oke, wakanyamaṟia mndumii owo, mangi ya Misri.

² Farao kaichio nyashi kipfa kya waṟundi wo wawi.

³ Kyasia kawawika kipfungonyi handu hamu na Yosefu.

⁴ Wakakaa kipfungonyi ko mfiri njiangu, na Mnene o waskari waringi wa mangi katana Yosefu nawahoṟokie, wakakaa kipfungonyi ko mfiri njiangu.

⁵ Kio kimu wakalodia ndodo wa wawi, orio mndu na ndodo yake, na ndodo tsawo tsiwefananyi-pfo.

⁶ Yosefu kawachea ngamenyi, kawawona wai wasokie nyi fowa.

⁷ Kawesa waṟundiwo wa Farao, wawei hamu nao ipfo kipfungonyi, kanyi ko mndumii oke, kahamba, “Nki ili shamu shanu shiwodo nyi fowa inu?”

⁸ Wakambia, “Lulelodia ndodo manya luwode msa aidima ilutambahaluyapfo.” Yosefu kawawia, “Itambahaluo chi iṟunda lya Ruwa? Hoinyi kenjiwienyi ndodo tso tsanu.”

⁹ Mnene o werutsa mvinyo kaongoya Yosefu ndodo yake; kambia, “Ndodo yako njilelodia nyi kuwewode msabibu oshangunyi loko.

¹⁰ Na kulya msabibunyi kuwewode maṟamba haṟaṟu, nafo fui cha ili fuialuka, fukawaṟa shiwaṟo, shimanja shake shikaende ndunda tsamewiṟa.

¹¹ Na kikombe kya Farao kiwei mawokonyi hako, ngaira ndunda tsilya tsa msabibu, ngatsikamia kikombenyi kya Farao, ngainengya Farao kikombe owokonyi loke.”

¹² Yosefu kambia, “Otambahaluo loyo nyi ilu. Maṟamba haṟaṟu nyi mkonu iṟaṟu.

¹³ Mkonu iṟaṟu ikamsia Farao nechikukumbuo, naikuwihiṟa na kiṟundionyi kyapfo; na iyo nochiinengia Farao kikombe owokonyi loke, chando kiwei ili kuwoka.

¹⁴ Kyaindi nonjikumbuowo na inyi, ili ochiwona mecha, nonjiwutie wuhoya, ngakuterewa, nonjikumbuowo ipfo ko Farao, na injiwuta kunu kiidi kya mba i ya wupfungo.

¹⁵ Kipfa kya lohi njileiwo kuwuka orukenyi lo Waebri; manya iya daa njiwutie kindo kyose kiwicho tane wanjiwika kipfungonyipfo.”

¹⁶ Mnene o walya wekahaṟa mkate kekiwona ke otambahaluolo nyi lo mecha, kawia Yosefu, “Na inyi-da njiwewei kilodionyi kya ndodo yako; na ambuya, kuwode mapongo haṟaṟu ha mkate miili huya mdo foko.

¹⁷ Na kulya ipogonyi lo huye, luwewode orio mbaṟi ya kelya kya Farao, maṟunda ha wekahaṟa mkate kyaindi; shilehe shikalya shelya shilya sha ipogonyi huya mdo foko.”

¹⁸ Yosefu kahaluo, kechihamba, “Otambahaluo loyo nyi ilu. Mapongo haṟaṟu nyi mkonu iṟaṟu.

¹⁹ Mkonu iṟaṟu ikamsia Farao nechikuwuta kifungonyi, na idumbuo mdo fopfo, na ikumasa kidihu, na shilehe shechilya nyama yapfo.”

²⁰ Nahong'u mkonu fo kaṟaṟu, mkonu fo ifeo lya Farao, kasungusia mfuho ko masinga hake hose; kapfunguo mnene o werutsa mangi mvinyo, na mnene o wekahaṟa mkate kawawika oshangunyi lo waṟundi wake.

²¹ Kawihiṟia mnene o werutsa mangi mvinyo kiṟundio kyake kerutsa mangi mvinyo, nao kaenengia Farao kikombe owokonyi loke

²² Indi kamasa kidihu mnene o wekahaṟa mkate, chando Yosefu alewatambahaluya.

²³ Kyaindi manya kudo mnene ulya o werutsa mangi mvinyo alekumbuose Yosefupfo.