MAWOOKIONYI 4 - Bibilia Kui Mdedie fo Kimochi

Kaini na Abeli

¹ Adamu kamanya mka oke Ewa, nao kakapika, kafee Kaini, kahamba, “Ngameinengo mana o womi kuwuka ko Mndumii-Ruwa.”

² Kaengeṟa kafee mano mae Abeli. Abeli kawikya machondi na Kaini kawa mdemi o madema.

³ Kikawa lyefurumia, Kaini kawikya Mndumii-Ruwa mwano shilimu sha mdeminyi.

⁴ Nao Abeli kaende mwano mashao ha kawoka ha shuma shake, na shuma shilya shinoru. Mndumii kaambia Abeli na mwano foke;

⁵ kyaindi nalaambie Kaini, manya kidaso kilya kyake. Kaini kawado mnu nyi fowa, na kyamu kyake kikarihinyika.

⁶ Mndumii-Ruwa kawia Kaini, “Nki ilyi uwodo nyi nyashi na nki ili kyamu kyapfo kyarihinyika?

⁷ Kowuta mecha; ochiidikio? Kulamewute mecha wunyamaṟi wuipfo; wuikuwedia o mongo, wukulangie iyo, kyaindi kikuwaṟi uwuwinze.”

⁸ Kaini kawia monomae Abeli, “Nnde luhende kulya mdemenyi.” Wadi wechihenda kulya mademenyi Kaini kapufukia monomae Abeli kambaha.

⁹ Mndumii-Ruwa kawia Kaini, “Monomayo Abeli nku ai?” Kahamba, “Njichi-pfo, inyi nyi mringi o monowama?”

¹⁰ Mndumii-Ruwa Kahamba: “Nkiki owuta iki samu ya monomayo injieṟeṟia ipfo terinyi.

¹¹ Ko ikyo wulalu, ui msese iya terinyi, ileambia samu ya manomayo iwuka mawokonyi hapfo;

¹² kodema wandai yechikaa ikumbie-sepfo; nochihenda kochiwuṟi-wuṟi na iṟahaṟaha masangenyi.”

¹³ Kaini kawia Mndumii-Ruwa, “Ngapo yako yanjing'anyia mnu, ilawa ikudika.

¹⁴ Ambuya, nokunjifunyiang'u iya orukenyi inu, njiwe mokushowa na oshangu lopfo, njiwe mowuṟiwuṟi na iṟahaṟaha iya orukenyi, na orio mndu echinjiwona nanjiwaahe.”

¹⁵ Mndumii-Ruwa kambia, “Kui kipfa kya ikyo, msa echiwaaha Kaini, nechitao kiṟache ka mfungade.” Mndumii-Ruwa kawikya Kaini kichano, mndu kambona nalamkape.

¹⁶ Kaini kakure alya oshangunyi lo Mndumii-Ruwa kahenda ikukaya kulya orukenyi lo Nodi mbele ya Edenyi ora lo ngamenyi.

Oshari lo Kaini

¹⁷ Kaini kamanya mka oke nao kafee mana kamdumbuya rina nyi Enoki; kawika mṟi kafudumbuya rina nyi Enoki, kui rina lya mana ulya oke.

¹⁸ Enoki kafee Iradi, Iradi, kafee Mehuyaeli, Mehuyaeli kafee Methusaeli; Methusaeli kafee Lameki.

¹⁹ Lameki kakualikia waka wawi; o kuwoka rina lyake nyi Ada, na o kawi nyi Zila.

²⁰ Ada kafee Yabali, nyio ndee o walya wekekaa mahemenyi na iwikia shuma.

²¹ Na monomae kalaho rina nyi Yubali; nyio ndee o walya wekekapa uda na mtoṟiṟo.

²² Zila kafee Tubali-kaini, mtsanyi motsana orio kihia kedumbuo kya menya na ilama; na mshiki o Tubali-kaini nyiwe Naama.

²³ Lameki kawia waka wake: “Adanyienyi ṟu lyako, Ada na Zila; Lanye waka wa Lameki adanyienyi madedo hako; Kyamba njilewaha mndu alenjiwika kifaṟe; Manake alenjipirichuo.

²⁴ Kokoya Kaini atao kiṟaache ka mfungade, nkya lohi Lameki nechitao ka makumi mfungade na mfungade.”

Seti na Enoshi

²⁵ Adamu kamanyase mka oke; kafee mana o womi kamdumbuya rina lyake nyi Seti; kipfa nalehamba, “Ruwa amenjiwonyia wufee wungi handu ha Abeli; kipfa Kaini alembaha.”

²⁶ Nao Seti kafee mana kamdumbuya rina nyi Enoshi. O nyi hondo wandu walewoka iindia rina lya Mndumii.