MAWOOKIONYI 39 - Bibilia Kui Mdedie fo Kimochi

Mka o Potifa na Yosefu

¹ Naho Yosefu kaendo mṟasa Misri; na Potifari mchili o Farao mnene o waskari, mndu o Misri, kamhuṟa kuwuka Waismaeli wo walemende napfo.

² Mndumii-Ruwa kakaa hamu na Yosefu, nao kaengeṟeka; nao nawei mmbenyi ya mndumii oke, Mmisri ulya.

³ Mndumii oke kawona ke Mndumii-Ruwa nakeri hamu nao; na ke Mndumii-Ruwa naonyishie shindo shose mawokonyi hake.

⁴ Yosefu kakundika mesonyi hake, kamṟundia. Nao kammbika nawe mohoṟokia mba yake, na isho shose shiipfo kashiwika owokonyi loke.

⁵ Kikawa wokia alemmbika mohoṟokia mba yake, na shose shiipfo, Mndumii-Ruwa kawikia mba iya ya Mmisri ona, kipfa kya Yosefu. Mboṟa ya Mndumii ikakaa ko orio kyose aweshiwode kulya mba na mademenyi.

⁶ Kadea shose awei nasho owokonyi lo Yosefu; manya alamanye mbonyi tsa ikyo kyose kyake, shile na kelyakyo elya tupu. Na Yosefu nawei mndu mcha, na awode kyamu kicha.

⁷ Numa ya isho, mka o mndumii oke kalanga Yosefu, kambia, “Laa na inyi.”

⁸ Kyaindi kaleha, kambia, “Ambuya, mndumii oko nanjinegie wunene wo shindo shose shikeri kunu mba koke, ma ekekusaṟa kya kindo kyose-pfo.

⁹ Kuipfo mnene kunu mba kota inyipfo, manya anjiimie kindo kyo kyose shila iyopfo, kyamba iyo nyi mka oke. Njiwute wuwichowu wung'anyi wudi njidekio Ruwa?”

¹⁰ Kawa moengeṟa ideda na Yosefu orio mkonu, manya Yosefu nalakunde ilaa nao ma ideda nao.

¹¹ Kikashikia, mkonu fumu, kaida na mba naṟundiepfo iṟunda lyake, manya kulya mba kuweipfo mndu kiidi kya walya wa ipfo kanyipfo;

¹² mkacho kambada nguo tsake, kechimmbia, “Laa na inyi.” Yosefu kamdea nguo iya yake mawokonyi hake kadicha, kaida na nja.

¹³ Kikashika kekiwona ke namdeya nguo iya yake mawokonyi hake, nao nadicha na nja,

¹⁴ mka o Patifari kalaha wandu wa kanyi koke, kadeda nawo, kehamba, “Ambuyenyi, Mwebri chu luleendio naluwutia sha mkika. Naida na kunu koko kundu nalae na inyi, ngafihiṟa na ṟu lying'anyi.

¹⁵ Nahong'u, kekiicho ke ngairia ṟu lyako na ifihiṟa, kadaho nguo i yake ipfo koko kadicha kaida na nja.”

¹⁶ Kyasia kaleṟia nguo iya kulya koke mṟasa mii oke nachena kanyi.

¹⁷ Nao kambia madedo na halya, kechihamba, “Isinga lilya lya Kiebri ulemwende na kunu kodu, naida na kunu koko icha injiwutia shindo shilawaṟi.

¹⁸ Nahong'u njekiiria ṟu lyako, ngafihiṟa, kanjidea nguo i yake kadicha na nja.”

¹⁹ Nahong'u mii oke kekiicho madedo ha mka oke alemmbia kechihamba, “Isinga lyapfo lyanjiwutia mbonyi cha itso,” nyashi yake ikado.

²⁰ Mndumii oke kaira Yosefu kammbika kipfungonyi, handu wapfungo wa mangi wekepfungio.

²¹ Kyaindi Mndumii-Ruwa kakaa hamu na Yosefu, kamtarama, kamnenga iidikio kyamunyi kya mnene owapfungo.

²² Mnene o wapfungo kawika wapfungo wose owokonyi lo Yosefu, na mnene o shindo shose shiwewutika kulya kipfungonyi.

²³ Manya mnene o wapfungo aleambuya kii owokonyi lo Yosefupfo; kyamba Mndumii-Ruwa nawei hamu nao na ionyisha shose Yosefu alewuta.