MAWOOKIONYI 38 - Bibilia Kui Mdedie fo Kimochi

Yuda na Tamari

¹ Kukashikia kiheri kilya, Yuda kasoka awuka ko wana wa mae, kashikia mndu Mwadulami, rina lyake nyi Hira.

² Yuda kawonapfo mana o waka o mndu Mkanaani, rina lyake Shua. Kamwonduo kaida na koke.

³ Nao kakapika, kafee mana, kamdumbuya rina nyi Eri.

⁴ Kakapikase, kafee mana, kamdumbuya rina nyi Onani.

⁵ Kalungiaseho, kafeeseho mana ungi, kamdumbuya rina nyi Shela. Nao Yuda nyi kulya Kezibu awei, kiherikyo alemfee.

⁶ Yuda kaalyikia Eri mka, mana oke mmbee, na rina lya mkacho nyi Tamari.

⁷ Nao Eri, mana mmbee o Yuda, nawembicho oshangunyi lo Mndumii; nao Mndumii kambaaha.

⁸ Yuda kawia Onani, “Ida na ipfo ko mka o manomayo, nomwalike nowonyiepfo mano mayo luwa.”

⁹ Onani nalemanya ke luwalyo lyechiwa lyakepfo, kikashikia, kiheri aleida na ko mka o manomae, kapusuya wanda nalainenge manomae luwa.

¹⁰ Kindoki alekiwuta kikawa kiwicho oshangunyi lo Mndumii, naho kawembaha nao daa.

¹¹ Yuda kawia Tamari malyi o mana, “Kaa kui mkusu kanyi ko ndeo tane mana oko Shela echiwa mndu ashitsie.” Kipfa nalehamba, nalache ipfase cha wana wa mae. Nahong'u Tamari kahenda, kakaa kanyi ko ndee.

¹² Kukaida kiheri kileshe, mana ulya Shua, mka o Yuda kapfa. Yuda kawuuyo nyi moo, kahenda ko wandu wake wekeoda mberi tsa machondi kulya Timna, o arianyi na odoe Hira Mwadulami.

¹³ Nao Tamari kawio mbonyi, ke, Ndamii opfo naihenda Timna ioda mberi tsa machondi hake.

¹⁴ Naho kakuatuo nguo tsa mka mkusu, kaṟaa kinguo kekushikia, kashikiya kyamu, kakaa mongo fo Enaimu, kufui na njia yehenda Timna. Kipfa nalewona ke Shela amba mndu ashitsie, manya alealyikio nawe mka okepfo.

¹⁵ Yuda kekimmbona kahamba kofia nyi mka mmeluki, kyamba naweshikie kyamu.

¹⁶ Kamwembeṟutsia mbai ya njia, kambia, “Kyenjiinenga momu njiide na ipfo kopfo.” Kipfa alalemanya ke nyi malyi o mana oke. Kammbesa, Nki ki ochinnenga, kokoya oida na koko?

¹⁷ Kammbia, “Njechikuendie suwana ya mfirihenyi.” Nao kammbesa, “Ngesa! Ochinjiinenga kindo njekaa njewada tane oende?”

¹⁸ Njikuinenge kiki ochikaa kowada? Kamhaluo, “Pete yapfo iwode mhuri, na mshe foyo, na ndichi yapfo ii owokonyi lopfo.” Nahong'u kashimnengia, kaida nakoke, nao kakapika.

¹⁹ Kakure kakuhendia, kawuta kinguo kilya kyake keshikia kyamu, kakuṟaya nguo tsilya tsake tsa mka mkusu.

²⁰ Yuda kadika suwana iya kui owoko lo mbuya yake Mwadulami, kundu nawihiṟio shilya mndu mka ulya alekaa kewada; kyaindi alamkoye.

²¹ Kawesa wandu wa handu halya, kechihamba, “Nku ai mndu mka ulya mṟuhui awei Enaimu mbai ya njia?” Wakahamba kuwei mndu mṟuhui iyapfo.

²² Kawuuya Yuda, kahamba, “Ngammbonapfo; manya na wandu wa handu halya walehamba, Kuwei mndu mṟuhui alyapfo.”

²³ Yuda kahamba, “Nashikudaye o, lulachewonyio wusutsu; ambuya ngamemwendie, suwanai, ma kulamkoye.”

²⁴ Kukaidaho meri iṟaṟu Yuda kaendio mbonyi ke, “Malyi o mana opfo Tamari, naleṟuhuyo, nao narie mana alai o kanyi ka.” Yuda kahamba, “Mendenyi na nja nakoṟo na modo.”

²⁵ Kekiendo, kaduma wandu ko ndamii oke, kehamba, “Inyi njilewiko mana na mndu chu menyi shindoshi.” Kahamba, “Ambuyenying'u shindoshi nyi shau, petei, na mshefu, na ndichi ii?”

²⁶ Yuda kashiidikia, kahamba, “Oo Tamari nawode lohi kota inyi, kipfa njilalemnenga mana oko Shela.” Wokialyo alekoyanase naopfo.

²⁷ Kikashikia, kiheri kyake kefee kuweipfo wana wa mboṟa kulya wusunyi woke.

²⁸ Kechifee, mana umu kaitsa owoko, moambia mana kaira orusu lo kimaande kalupfunga alya owokonyi, kechihamba, “Ichu nasonguo.”

²⁹ Kekiwihiṟa owoko loke, ambuya, mano mae kawukapfo. Kahamba, “Iyo nki ili oida ko pfinya, mbonyi tsa pfinya na tsikuoshe.” Ko ikyo kalaho rina lyake nyi Peresi.

³⁰ Numa mano mae kawukapfo aṟee orusu lo kimaande owokonyi loke; na kadumbuyo rina lyake nyi Zera.