MAWOOKIONYI 35 - Bibilia Kui Mdedie fo Kimochi

Yakobo asamiya Betheli

¹ Ruwa kawia Yakobo, “Kure, nohende Betheli nokaepfo; nokesungusiapfo rasio lya Ruwa; ichu alekuwonekia kiheri kuledicha mano mayo Esau.”

² Kyasia Yakobo kawia wandu wa mba yake, na wose wawei hamu nao, “Irenyi maruwa mahenu hai kiidi kyanu, mukuheṟemtse, muilache na nguo tsanu.

³ Lukaure, ludo luhende Betheli, na inyi njisungusiepfo rasio lya Ruwa; icho alenjiadanyia kiheri kya wukiwa woko, kakaa hamu na inyi orio handu njileida hose.”

⁴ Nawo wakainengia, Yakobo maruwa mahenu hose hawei mawokonyi hawo, na rachi tsiwei madunyi hawo, nao Yakobo katsisuṟuma wanda ya mwaloni fuwei Shekemu.

⁵ Kiheri walewooka kyaṟo, wuowu wo Ruwa wukachea mṟi iya iwewaṟingichie, manya walaoshe wana wa Yakobo.

⁶ Nahong'u Yakobo kashika Luzu, fui orukenyi lo Kanaani, nyipfo Betheli, o na wandu wose wawei hamu nao.

⁷ Kasungusiapfo rasio, kadumbuya handu halya rina, El-Betheli; cha kipfa hondo Ruwa alembonekia kiherikyo aledicha mano mae.

⁸ Debora kapfa, icho alelela Rebeka, kaṟiko sera Betheli wanda ya mwaloni; lyikalaho rina lyalyo ni Alon-bakuthi.

⁹ Ruwa kawonekiase Yakobo, ili alewuya kuwuka Paddan-aramu, kambikia ona.

¹⁰ Ruwa kambia, “Rina lyapfo nyi Yakobo; ochikilahose nyi Yakobopfo, kyaindi Israeli lyechiwa rina lyapfo. Kamlaha rina lyake, Israeli.”

¹¹ Ruwa kambia, “Inyi nyi Ruwa menyi pfinya, pfumbuka noengeṟeke; nowe mkambo na mamwingi fo mkambo fo wandu wechiwuka kopfo, na wamangi wechiwuka shitsinyi shapfo.

¹² Na orukalu njileliia nyamu Abrahamu na Isaki njechikuinenga iyo, na oshari lopfo numa yapfo njechiwanenga oruka-lo.”

¹³ Ruwa kado huye awuka alya handu awei kechideda nao.

¹⁴ Yakobo kahoṟotsa ngo alya handu awei kechideda nao, ngo ya maho, kaishimbuo kaletsia huyayo kidaso kya mvinyo, na mafuda ha msinepfu huyayo.

¹⁵ Yakobo kadumbuya rina handu halya Ruwa aweideda nao, nyi Betheli.

Ifeo lya Benyamini na opfu lo Raheli

¹⁶ Wakawada kyaṟo wokia Betheli, tane kotsuhaa handu ha mchumie fo oweṟe washike Efrati, Raheli kawooko nyi mawawio ha ufee, mawawio hakaengeṟeka mnu.

¹⁷ Nahong'u ili awewawio mnu, moambia mana kambia, “Kulaowuo, kyamba nochifee mana ungi o kisoṟo.”

¹⁸ Nahong'u kechilekia moo, (kipfa nalepfa), kamdumbuya rina lyake nyi Benoni, kyaindi ndee nalemlaha nyi Benyameni.

¹⁹ Raheli kapfa kaṟiko kulya njienyi ya Efratha, nyipfo Betlehemu.

²⁰ Yakobo kahoṟotsa ngo huya kipfu kilya kyake, nyiyo ngo ya kipfu kya Raheli mṟasa inu.

²¹ Kiidima Israeli kaira kyaṟo, kailika ihema lyake ora lo kawi lo mnaṟa fo Ederi.

²² Nahong'u Israeli kekikaa kulya orukenyi, Rubeni kahenda ilaa na Bilha, mka o ndee, Yakobo kaicho mbonyitso. Nahong'u wana wo wa Yakobo waweshikie ikumi na wawi.

Wana wa Yakobo

²³ Wana wa Lea nyi Reubeni mana mmbe o Yakobo, na Simioni na Lewi, na Yuda, na Isakari, na Zebloni.

²⁴ Wana wa Raheli nyi Yosefu, na Benyameni.

²⁵ Wana wa Bilha kisinga kya Raheli, nyi Dani na Naftali.

²⁶ Wana wa Silipa, kisinga kya Lea, nyi Gadi na Aseri. Iwa nyiwo wana wa Yakobo alefeeo kulya Padan-aramu.

Opfu lo Isaki

²⁷ Yakobo kacha na ko ndee Isaki, kulya Mamre, mṟi fo Arba, nyipfo Hebroni, wuhenunyi kundu Abrahamu na Isaki wawei.

²⁸ Ohendo lo moo fo Isaki iwei maaka ihana na makumi nyanya (180).

²⁹ Nao Isaki kalekia moo, kapfa, kasangana na wandu wake, amku, wuku wucha. Wana wake Esau na Yakobo, wakamṟika.