MAWOOKIONYI 34 - Bibilia Kui Mdedie fo Kimochi

Simeoni na Lewi wataa kiṟache kipfa kya mshiki owo

¹ Nahong'u Dina, mana o kika o Lea, msa Lea alefeeya Yakobo, kakure nahende iwona wana wa kika wa oruka lulya.

² Shekemu, mana o Hamori, Mhivi, mnene o oruka, kammbona kamduo, kalaṟana nao kamnyamaṟa wukeha wulya woke.

³ Mrima foke fukaoshana na Dina mana o Yakobo, kakunda manachu o kika, kadeda na manachu ko madedo mecha.

⁴ Shekemu kawia ndee Hamori, kahamba, “Kekunjiinengie manachu o kika nawe mka oko.”

⁵ Kyasia Yakobo kaicho ke amenyamaṟa wukeha wo mana oke Dina. Na wana wake wawei na shuma kulya patenyi. Yakobo kakutsiia, mṟasa kiheri walecha.

⁶ Hamori, ndee o Shekemu kakure kahendia Yakobo nadede nao.

⁷ Wana wa Yakobo wekiicho isho, wakacha wawuka patenyi, wakasokyo mnu nyi fowa, wakarihinyika mnu, kipfa kya ili alewuta sha wukika ko Israeli, kya alelaṟana na mana o Yakobo, kindo kilasumhanyi iwuto.

⁸ Hamori kadeda nawo, kechihamba, “Mrima fo mana oko Shekemu fulangie mana onu o kika, hoinyi kekumnengienyi namwalike.

⁹ Mualikane naso, muluinenge so wana wanu wa kika, nanyo mukudae wana wadu ya kika.

¹⁰ Nanyo mochikaa naso, na orukalu lochikaa oshangunyi lonu; kaenyi, na ikapiapfo mbucha, mukuwonyiepfo masaa.”

¹¹ Shekemu kawia ndee o mana ulya o kika na wana wa mae, “Kenjiidikienyi oshangunyi lonu, na chandu mochinjiwia njechiwuta.

¹² Ma mukafeheṟa mnu ngosa na kitsinyio, njechiwuta chandu mochinjiwia, kya indi munnenge manachu o waka nawe mka oko.”

¹³ Wana wa Yakobo wakahaluo Shekemu na ndee Hamori, kui mtambo, kipfa nalenyamaṟa mshiki owo Dina,

¹⁴ wakawawia, “Lochiidima iwuta idedolyipfo, luinengie mshiki odu ko mndu alamdinepfo; kiwewa wusutsu kodu.

¹⁵ Kyaindi kipfa kya iki tupu lochiidikiana nanyo; mkawa chaso, orio mndu msoṟo o konu ose kadino,

¹⁶ nlyondi lochimuinenga nyo wana wadu wa kika, naso lochionduo wana wanu wa kika, lochikaa handu hamu nanyo, naso lochiwa wandu wamu.

¹⁷ Kyaindi kokoya mulaluidikia mukadino, nahong'u lochionduopfo mshikichu odu, luhende kodu.”

¹⁸ Madedoho hawo hakachia oshangunyi lo Hamori, na oshangunyi lo Shekemu, mana o Hamori.

¹⁹ Manake ulya aletiṟa iwuta idedo lilyapfo, kyamba nalechihiṟo mnu nyi mana ulya o waka o Yakobo. Ngoseṟa ya isho Shekemu nawewode kiṟumi kota wose wa kanyi ko ndee.

²⁰ Hamori na mana oke Shekemu, wakacha na alya mongo fo mṟinyi fowo, wakadeda na wandu wa mṟinyi fowo, wehamba,

²¹ “Wandu wa wawode mbuya naso, wakekukaiya kunu orukenyi, na ikapyapfo mbucha; kyamba oruka lung'anyi, luwashikie; lukekudayang'u wana wawo wa kika wawe waka wadu, na wana wadu wa kika lukuwainengye.

²² Kyaindi kipfa kya iki kimu tupu wechiidikiana naso wakae kodu wose, luwe wandu wamu, kokoya orio mndu msoṟo adino, chandu nawo iwa wawadine.

²³ Ngesa! Machondi hawo, na masaa hawo, na shuma shawo shose shechiwa masaa hadu? Nahongu lukeidikiana nawo tupu, nawo wechikaa kodu.”

²⁴ Hamori na mana oke Shekemu wakaidikiana nawo, hamu na iwo wose wawukie mongonyi fo mṟi foke. Wakadino orio mndu msoṟo, iwo wose wawukie mongo fo mṟi foke.

²⁵ Nahong'u ili mkonu fo kaṟaṟu, wechiwawio mnu, wanake wawi wa Yakobo, Simioni na Lewi wana wa mae wa Dina, wakaira orio mndu oshu loke, wakasembelia mṟi kui wukahari, wakawaha wasoṟo wose.

²⁶ Wakawaaha Hamori na mana Shekemu, kui wuohi wo oshu, wakairapfo Dina kulya mmbenyi ko Shekemu wakakurepfo.

²⁷ Wana wa Yakobo wakachea walya walewooho wakaduo mṟi fulya kipfa kya lilya walenyamaṟa mshiki owo.

²⁸ Wakaduo machondi hawo, na mmbe tsawo, na nzoi tsawo, na shindo shiwei kulya mṟinyi, na isho shiwei patenyi.

²⁹ Wakaduo masaa hawo hose, na wana wawo wose, na waka wawo, na shiwei mba kowo shose.

³⁰ Yakobo kawia Simioni na Lewi, “Monjiwinyisha, mkanjitana njidae owicho kiidi kya wandu wa wa orukalu, kyamba wandu wako wawaangu, Wakanaani na Waperisi wechinjipufukia, wanjikape, na inyi njechirumatso, inyi na mba yako.”

³¹ Nawo wakahamba, “Ngesa na kicha iwutia mshiki odu chammeluki?”