MAWOOKIONYI 33 - Bibilia Kui Mdedie fo Kimochi

Yakobo akoyana na Esau

¹ Yakobo kairia meso hake, kaambuo, aulya Esau aicha na wandu mahana haana (400), warianyi nao. Kawahawia Lea, na Raheli wana na shisinga shilya shiwi, wana wawo.

² Kawika shisinga shilya na wana wawo kusonguo, na Lea na wana wake numa yawo, na Raheli na Yosefu wafurumi.

³ O amonyi kasonguo mbele yawo, kaarama mṟasa wanda ka mfungade, tane ashikia mano mae.

⁴ Esau kakapa mteeṟa icha imwambia, kamchunguṟia, kamwolokia nzingonyi, kamhekia momu; nawo wakafihiṟa.

⁵ Esau kairia meso hake, kawona waka walya na wana walya, kawesa. “Iwa wai na iyo waki?” Yakobo kahamba, “Nyi wana Ruwa aleinenga isinga lyapfo kui woloru woke.”

⁶ Nyilyondi shisinga shilya, na wana wawo, waletikiria hafui wakaarama. Numa Yosefu na Raheli wakatikiria, wakaarama

⁷ Nao Lea, na wana wake wakatikiria hafui wakaarama.

⁸ Esau kahamba, “Ipo lyi lyose ngalikumbuhana, lyaloṟa ki?” Yakobo kahamba, “Lyinjiwonyie iidikio oshangunyi lo mndumii oko.”

⁹ Kyaindi Esau kahamba, “Njiwode shiingiki, mano wama oko, isho uwode shikekuwia shapfo.”

¹⁰ Yakobo kahamba, “Chi wudo-pfo ngakuterewa; kokoya ngaidikio mesonyi hapfo hoi ukeambia kiinengo kyako mawokonyi hako, kyamba ngawona kyamu kyapfo cha ili ngawona kyamu kya Ruwa, kochihiṟo nyi inyi,

¹¹ ‘Hoi, keambia mboṟa yako, oendio, kipfa Ruwa nalenjionyishia, ko ikyo njiwode ishi shose.’” Kamuidikia, nao kaambia.

¹² Kiidima Esau kambia, kennde luire kyaṟo, na inyi njechikusongoya.

¹³ Yakobo kamhaluo, “Mndumii oko naichi ke wana nyi wakoku, na kingise machondi na mmbe njiwode tsiionza. Shumasho shikaitiko mkonu fumu shechipfa shose.

¹⁴ Hoi mndumii oko nakesongoya isinga lyake; na inyi njechishiteteṟa sa ombuho chandu mchumiefo fo shuma shinjisongoye, na chandu mchumie fo wana; tane njechishika ko mndumii oko ipfo Seiri.”

¹⁵ Esau kahamba, “Njikudeyang'u wandu maata warianyi na inyi.” Kahamba, “Nyi waki? Njikekuwonyia iidikio tupu oshangunyi lo mndumii oko.”

¹⁶ Nahong'u Esau kawuya mkonu fulya fulya kawada njia yake mṟasa Seiri.

¹⁷ Yakobo kahenda mṟasa Sukothi. Kakuwikiapfo mba, kasungusiapfo na matengo ha shuma shake. Ko ikyo rina lya handu halya kukalaho nyi Sukothi.

¹⁸ Naho Yakobo kacha na kipuo mṟasa mṟinyi fo Shekemu, fui orukenyi lo Kanaani, kekicha awuka Padan-aramu; kawika ihema lyiambuyanyi na mṟifo

¹⁹ Kahuṟa ora lo oruka; lulya alewika ihema lilya lyake kuwuka mawokonyi ha wana wa Hamori, ndee o Shekemu ko shipeṟengu ihana sha pesa.

²⁰ Kasungusiapfo rasionyi, kalilaha nyi El-elohe-Israeli. El-elohe-Israeli nyi kimu cha Ruwa, Ruwa o Israeli.