MAWOOKIONYI 32 - Bibilia Kui Mdedie fo Kimochi

Yakobo akuteseheṟa ikoyana na Esau

¹ Yakobo kawada njia yake na wamalaika wa Ruwa wakakoyana nao.

² Nao Yakobo kekiwawona, nalehamba, “Ili nyi itoṟito lya Ruwa.” Kadumbuya rina handu halya, Mahanaimu .

³ Nahong'u Yakobo kadika wadume wamsongoe ihenda ko mano mae Esau, mṟasa orukenyi lo Seiri nuka ya Edomu.

⁴ Kawawawasa, kahamba, “Wienyi Esau mndumii oko mudi, Isinga lyapfo Yakobo nyi lyahamba lyidi, ‘Njilekaa wuhenunyi ko Labani ngakeleopfo mṟasa, wulalu,

⁵ na inyi njiwode mmbe, na nzoi, na machondi, na masinga na shisisnga sha kika; na inyi ngaduma wandu njiinenge mndumii oko mbonyitsi, njiwone osaṟio mesonyi hapfo.’”

⁶ Wadume walya wakawuya na ko Yakobo wechihamba, “Luleshika ko Esau mano mayo, nao naicha ikuambia, arianyi na wandu mahana haana (400) hamu nao.”

⁷ Nalyo Yakobo kaowuo mnu kaeṟewe mnu, kahawa wandu walya ai nawo, na machondi na mmbe, na ngamia wawe makamba hawi

⁸ Kahamba, “Esau kacha kakapa kambalyi lyimu kambalyo lyechideoho lyikie.”

⁹ Yakobo kahamba, “Hoi Ruwa o ndeako Abrahamu, na Ruwa o ndeako Isaki, Mndumii kulenjiwia, ‘Wuya nohende mṟasa orukenyi lopfo, na ko mbaṟi yapfo, na inyi njechikuwutia mecha.’

¹⁰ Inyi njiwaṟi manyalepfo isaṟialyo lyose na lohi yo yose kulewutia isinga lyapfo; kyamba njileambada medafo fo Yordani na ndichi yako tupu, na wulalu ngamewa makamba hawi.

¹¹ Wulalu ngakuterewa kenjiashuo na owoko lo mano wama, owoko lo Esau, kyamba inyi ngamwowuo, nalache ilusaṟikia na iluwaaha; wana na wamayawo.

¹² Na iyo kulehamba, ‘Nkya lohi njechikuwutia mecha, na inyi njechipfumbutsa ufee wopfo wufo cha msanga fo ipalyipalyinyi fuleewa iitala kyamba fufoi.’”

¹³ Kakaapfo kio kilya. Kiidima kaira shindo maata awewode, shiwe sha nnga ko manomae Esau.

¹⁴ Mburu tsake mahana hawi (200) na shioṟo makumi hawi (20), machondi hake mahana hawi (200) na masuwa makumi hawi (20),

¹⁵ ngamia tsionza makumi nyanya (80), handu hamu na mahache hatso, mmbe tsake makumi haana (40), na mapunga ikumi (10), nzoi tsake tsa kika makumi hawi (20), na mahache hatso ikumi (10), ha kisoṟo.

¹⁶ Katsiwika mawokonyi ha masinga hake, orio kamba kyaanya kyalyo. Nao kawia masinga hake, Songuonyi mbele yako, mude maanya kiidi kya kamba na kamba.

¹⁷ Katutuma ulya o kuwoka kahamba, manowama oko Esau kakukooya, na ikuwesa kahamba, “Iyo nyi o u? Nku ohenda? Na lingise nyi shau ishi shii oshangunyi lopfo?”

¹⁸ Nahong'u nohambe, “Nsha isinga lyapfo, Yakobo, nyi sha nnga, adikia mndumii oke Esau. Ambuya o amonyi nyai numa yadu.”

¹⁹ Kawetutumase ulya o kawi, na ulya o kaṟaṟu wose waleosha makamba halya, kechihamba, “Nyi wudo mochiwia Esau,” kamemukoya

²⁰ Hambenyise, “Ambuya isinga lyapfo Yakobo nyi ai numa yadu.” Kyamba nalehamba, “Njechimwoloṟa kui shindo sha nnga shechinjisongoya, numa njimbone kyamu kyake; kofia nechinjiidikia kyamu kyako.”

²¹ Nahongu kiinengo kilya kikamsongoya, nao amonyi kakaa kio kilya kulya, kambinyi.

Yakobo alimbana na msu o Ruwa kio

²² Kakure kio kilya kaira waka wake wawi, na shisinga shake shiwi, na wana wake ikumi na umu (11), kaambada kitaṟa kya Yaboki.

²³ Kawaira kawaambatsa meda, kaambatsa na shose awewode.

²⁴ Yalobo kadeoho amonyi, na mndu umu, kaheshana nao wechilimbana tane kotambaṟuka.

²⁵ Nao kekiwona, ke aidima imbingapfo, kampaya o owaa, kaṟehuo fuo lya owaa lo Yakobo kiheri aweilimbana nao.

²⁶ Kahamba, “Njilekia, njihende kyamba komtambaṟuka.” Yakobo Kahamba, “Njechikulekiapfo, shile onjiwikia mboṟa.”

²⁷ Kammbesa, “Rina lyapfo nyiu?” Kahamba, “Yakobo.”

²⁸ Kammbia, “Rina lyapfo ochilahose nyi Yakobopfo indi nyi Israeli, kyamba noheshana na Ruwa, na wandu, na iyo kowawinga.”

²⁹ Yakobo kammbesa, kahamba, “Kyenjiwia hoi, rina lyapfo?” Kahamba, “Nki ili onjiwesa rina lyako?” Kammbikiapfo mboṟa

³⁰ Yakobo kadumbuya handu halya rina nyi Penieli, kipfa nalehamba, “Njilewonana na Ruwa kyamu kui kyamu, na mrima foko fokia.”

³¹ Mnengeṟi fukamtaṟaukia kechiambada Penieli, karichahia kipfa kya owaa lulya lo kudende koke.

³² Ko ikyo mṟasa inu wana wa Israeli wekelya mri fulya fui kufui na owaapfo; kipfa nalempaya o fuonyi lya owaa mrinyi fo kitsi.