MAWOOKIONYI 31 - Bibilia Kui Mdedie fo Kimochi

Yakobo awuka ko Labani kiṟika

¹ Kyasia Yakobo kaicho madedo ha wana wa Labani wechihamba, “Yakobo naduo masaa hose ha ndeadu; na kui kipfa kya masaa ha ndeadu nalewona wulole wu wose.”

² Yakobo kawona kyamu kya Labani ke aimwambuyase necha cha ukou na ichopfo.

³ Mndumii kawia Yakobo, “Wuya na orukenyi lo Wandee wapfo na wandu wapfo, na inyi njechikaa hamu na iyo.”

⁴ Yakobo kaduma wandu, kalaha Raheli na Lea wache na kulya nuka kundu shuma shake shikeri. Kawawia,

⁵ “Njiwonyi oshangu lo ndeanu, ke ainjiambuyase necha cha ukou na ichopfo Kyaindi Ruwa o wande oko nakeri hamu na inyi.

⁶ Nanyo muichi ke kui pfinya tsako njilesingia ndeanu.

⁷ Na ndeanu nalenjilemba, kailacha wueri woko ka ikumi; kyaindi Ruwa alemlekia najiwike shifaṟepfo.

⁸ Kiheri alehamba, sha mapaṟipaṟi shechiwa wueri wopfo, shuma shose shikashaa shi sha mapaṟipaṟi. Kiheri alehamba, sha mcharie shechiwa wueri wopfo, nlyondi shuma shose shileshaa shi sha mcharie.

⁹ Kudi Ruwa kasoka ndeanu masaa hake kannenga inyi.

¹⁰ Kilewa, kiheri shuma shilya shilewada wuroo, njileiria meso hako ngawona kiidi kya ndodo, ambuya, shioṟo shileoria shumasho shiwewode mcharie na sahasaha na mapaṟipaṟi.

¹¹ Na malaika o Ruwa kanjiwia ndodonyi, Yakobo! Ngahamba, ‘Nyi iya njikeri.’

¹² Kahamba, ‘Iriang'u meso hapfo, nokewonang'u, shioṟo sho shose shiioria shuma shiwode mcharie, sahasaha na maparipari; kyamba njilewona isho shose Labani alekuwutia.

¹³ Inyi nyi Ruwa o Beteli, kulya kundu kuleshia ngo mafuda, konjiwikia na kiasa. Kure wulalu, nowuke kunu orukenyi, nowuye na kulya orukenyi kundu kulefeeyo.’”

¹⁴ Raheli na Lea wakamhaluo, wakahamba, “Ngesa! Naluwatsuhaṟieho ora ang'u kioṟa kulya kanyi ko ndeadu?

¹⁵ Aleluwutia cha wahenu, kyamba nalelukumba, nao kalya pesa tsadu pyu?

¹⁶ Kyamba masaa halya hose Ruwa alesoka ndeadu, masaa ho nyi hadu na ha wana wadu. Kyasiang'u isho shose Ruwa alekuwia, shiwute.”

¹⁷ Nahong'u Yakobo kakure, kadosia wana wake na waka wake huya ngamia.

¹⁸ Kaduo shuma shake shose, na masaa hake hose alesuṟia, na shuma alewada kulya Paddan-aramu kundu nashike ko ndee Isaki kulya orukenyi lo Kanaani.

¹⁹ Naho Labani nawehendie ioda mberi tsa machondi hake, na Raheli kaiwa shiruwa sha wongo sha ndee.

²⁰ Yakobo kaokya Laban, Mshami mtaambo kipfa alalemmbia ke naidicha

²¹ Kyasia kadicha o na shose awewode; kakure kaambada meda kaembeṟutsa kyamu kyake wohenda fumvuhu lya Gileadi.

Labani aosha Yakobo

²² Koikishika mkonu fo kaṟaṟu Laban kawio ke Yakobo amedicha,

²³ kaira wana wa mae hamu nao wakamlatia ohendo lo mfiri mfungade. Kamkoya kulya fumvuhu lya Gileadi.

²⁴ Ruwa kachea Labani, Mshami, kiidi kya ndodo kio, kambia, “Kuṟise, kulawie Yakobo idedo lya ofoṟo ma lya mondu.”

²⁵ Labani kakoya Yakobo, na Yakobo naweilikie mahema hake alya fumvuhu; na Labani na wana wa mae wakailika mahema hawo alya fumvuhu lya Gileadi

²⁶ Nahong'u Labani kawia Yakobo, “Nkiki owuta?” Nonjiokya mtaambo koduo wana wako wa kika cha wapfungo wa shidenyi waleendo kui oshu.

²⁷ Nki ili kuledicha wokuṟoṟokuo kui mtaambo, manya kulanjiwie, njiidime isamana na iyo, nokuhendie na sia, na shiimbo na temo na shihia sha ndusu?

²⁸ Manya kulanlekie njihekie wana wako momu, na wana wako wa kika; ko ikyo kulewuta wutondo.

²⁹ Njiwode wuidimi mawokonyi hako wokuwika shifaṟe; kyaindi Ruwa o ndeo kioki nanjiwia kechihamba, “Kuṟise, kulawie Yakobo idedo lya ofoṟo ma mondu.

³⁰ Kyasia wulalu nokure kipfa kya iwado mnu nyi macha ha kanyi ko ndeo. Nki ilise kuleiwa maruwa halya hako.”

³¹ Yakobo kahaluo kawia Labani, “Njileowuo, ngahamba, kulache insoka wana wapfo wa kika ko pfinya.

³² Icho oose ochimkoya awode maruwa ho hapfo, nalakae na moo, Manya kiidi kyadu kokoyapfo kyose ki kyapfo nokiduo.” Kyamba Yakobo aweichi ke Raheli aweiwiepfo.

³³ Labani kaida na ihemenyi lya Yakobo, na ihemenyi lya Lea, na ihemenyi lya shisinga shiwi, ma nalahawone. Kawuka ihemenyi lya Lea, kaida na ihemenyi lya Raheli.

³⁴ Nahong'u Raheli naweiwie maruwa halya ha wongo, nawehawikie kiidi kya nguo tsedamia huya ngamia, kahadamilia. Labani kawadawada ihemenyi kose nalawone.

³⁵ Nao Raheli kawia ndee, “Mndumii oko nalasuo kipfa ndaidima ihoṟoka oshangunyi loke, nyi kipfa njii kiidi kya mfiri ya waka.” Kawalia, manya nalahawone.

³⁶ Yakobo kawado nyi nyashi, kaloyana na Labani. Yakobo kamhaluo, kawia Labani, “Mti foko nkiki na wunyamaṟi woko wuki, tane onjiwalia kudi?

³⁷ Nowadawada nzohoṟa tsako ; nkiki okiwonapfo kya kanyi kopfo? Kileṟie aa oshangunyi wana wa wama wako na wana wa wama wapfo, wadumbuoho kiidi kyako na iyo.

³⁸ Maaka ii makumi hawi njilekaa kopfo; machondi hapfo manya mburu tsapfo tsilekumbapfo, manya shuma shapfo njilelyapfo.

³⁹ Kileraho nyi mando ha nja njilekuendiepfo, inyi njimonyi njilekudika sile yakyo, kokinjiwesa kuwuka mawokonyi hako, kokoya kiledao mfiri ang'u kokoya kiladao kio.

⁴⁰ Shilenjihoya nyi ishi; mfiri mbaṟi fukanjiwaaya, na mbeo kio, mado hakanjidekia mesonyi hako.

⁴¹ Maaka ii makumi hawi njilekaa kanyi kopfo; njilekuṟundia maaka ikumi na ina ko wana wapfo wa kika wawi, na maaka iṟandaṟu ko shuma shapfo, na iyo koilacha wueri woko ka ikumi.

⁴² Kokoya Ruwa chu o wande, Ruwa o Abrahamu, na Menyikiṟumi o Isaki, alawei hamu na inyi, kya lohi wulalu nowechinjifuna na mawoko ha wulya. Maturo hako na maṟunda ha mawoko hako Ruwa naleshiwona, kakupomia kio kya inu.”

⁴³ Labani kahaluo, kawia Yakobo, “Wanawo wa kika nyi wana wako wa kika, na wana wawo nyi wako, na shuma nyi shuma shako, na ishi shose uwonyi nyi shako; na inyi njiidime iwawutia kiki inu wanawo wako na wana wawo walewafee?

⁴⁴ Kyenjidenying'u luwike mkundana, inyi na iyo, fuwe kiṟingishio kiidi kyako inyi na iyo.”

⁴⁵ Yakobo kaira iho kalihoṟotsa cha ngo.

⁴⁶ Yakobo kawia wana wa mae, “Sanyenyi maho.” Wakaira maho wakawika sohu, nawo wakaliia kufui na sohu iya.

⁴⁷ Labani kahalaha nyi Yegar-sahadutha, kyaindi Yakobo kahalaha nyi Galedi.

⁴⁸ Labani kahamba, “Sohu i nyi kiṟingishio kiidi kyako inyi na iyo inu kudi. Ko ikyo lyikalaho rina nyi Galedi,

⁴⁹ na Mispa, ” kipfa nalehamba, “Ruwa natiichie kiidi kyako inyi na iyo, mandi lulawonanyi.

⁵⁰ Kolisa wana wako wa kika wukiwa, na koduo waka ngoseṟa ya wana wako, manya kulai mndu hamu na so, ambuya Ruwa nyi mṟingishi kiidi kyako na iyo.”

⁵¹ Labani kawia Yakobo, “Ambuya sohu ii, noweambuya na ngo ngailika makidi hawi hako na iyo.

⁵² Sohu i iwe wuṟingishi, na ngo i iwewa wuṟingishi, ke inyi njechitoola sohu i icha na ipfo kopfo pfo, manya iyo ochitoola sohu i na ngo i uche na kunu koko kya shidapfo.

⁵³ Ruwa o Abrahamu, na Ruwa o Nahori, Ruwa o ndeawo, naanduo kiidi kyadu.” Yakobo kalya nyamu oshangunyi lo mopfinya ndeye Isaki.

⁵⁴ Yakobo kashinja kidaso kulya fumvuhu, kalaha wana wa mae wache walye shelya, nawo wakalya shelya, wakakaa kulya fumvuhu kio taṟaṟaa.

⁵⁵ Labani kakure ngamenyi otuko, kahekia wana wake momu na wana wake wa kika, kawawikia ona, kiidima Labani kahenda, kawuya na kowo.