MAWOOKIONYI 30 - Bibilia Kui Mdedie fo Kimochi

¹ Nao Raheli kekiwona ke aiwonyiase Yakobo manapfo, Raheli kanyenyia manomae. Kawia Yakobo, “Nnenga wana; chila wudo inyi njechipfa.”

² Yakobo kapufukia Raheli kambia, “Ngesa! Inyi njii handu ha Ruwachu, alekuima luwa wusunyi wopfo?”

³ Kahamba, “Aiki kisinga kyako, Bilha, ida na koke kundu nawone mana huya ndi tsako, na inyi njiwone luwa koke.”

⁴ Nahong'u kamnengia kisinga kyake Bilha nawe mka oke. Yakobo kaida na koke.

⁵ Naho Bilha kakapika kawonyia Yakobo mana.

⁶ Raheli kahamba, “Ruwa amennenga kyako kinsumhanyi, nao ameicho ṟu lyako, kannenga mana.” Ko ikyo kamdumbiya rina lyake nyi Dani

⁷ Bilha kisinga kya Raheli, kakapikase, kawonyiase Yakobo mana o kawi.

⁸ Raheli kahamba, “Kui ilimbanana king'anyi ngamelimbana ngawinga mano wama ngambinga. Kadumbuya mana rina nyi Naftali.”

⁹ Lea kekiwona ke naletsitsia ifee, kaira kisinga kyake Silipa, kainengia Yakobo nawe mka oke.

¹⁰ Silipa kisinga kya Lea, kawonyia Yakobo mana.

¹¹ Lea kahamba, “Osu lucha, kamdumbuya rina nyi Gadi. ”

¹² Silipa kisinga kya Lea, kawonyia Yakobo mana o kawi.

¹³ Lea kahamba, “Nanga inyi, kyamba waka wechinjilaha, nanga. Kamdumbuya rina nyi Aseri .”

¹⁴ Rubeni kahenda mfiri ya shilimu sha Ngano kawona matungucha kulya pichinyi, kahaendie mae Lea. Nalyo Raheli kawia Lea, “Kennengawo matungucha maata ha manachu opfo.”

¹⁵ Nao kambia, “Ngesa! Nyi kindo kiangu insoka mii oko; nokundi iduose matunguchaha ha manaoko da?” Raheli kambia, “Ko ikyo nechilaa kopfo kio ki kipfa kya matungucha ha mana opfo.”

¹⁶ Yakobo kacha kyukanyi awuka pichinyi, Lea kakure imwambia, kahamba, “Kikuwaṟi noche na koko kipfa ngakuhuṟa kya matungucha ha mana oko;” kalaa koke kio kilya.

¹⁷ Ruwa kaadanyia Lea, nao kakapika, kawonyia Yakobo mana o katanu,

¹⁸ Lea kahamba, “Ruwa amennenga wueri woko, kipfa njileinengya mii oko kisinga kyako.” Kamdumbuya rina lyake nyi Isakari. ”

¹⁹ Lea kakapikase, kawonyia Yakobo mana o kaṟandaru.

²⁰ Lea kahamba, “Ruwa amennenga ngosa njicha, wulalu mii oko nechikaa na inyi kipfa ngamembonyia wana waṟandaṟu.” Kamdumbuya rina nyi Zebloni.

²¹ Lyefurumia kafee mana o waka; kamdumbuya rina nyi Dina.

²² Ruwa kakumbuo Raheli; Ruwa kamwandanyia kapfunguo wusu wulya woke.

²³ Kakapika, kafee mana, kahamba, “Ruwa amenjiwuta wusutsu woko.”

²⁴ Kamdumbuya rina nyi Yosefu, kechihamba, Mndumii nanjiengeṟie se mana ungi.

Yakobo awa msuṟi

²⁵ Nalyo Raheli kekifee Yosefu, Yakobo kawia Labani, “Nnenga momu njihende kodu, na orukenyi loko.

²⁶ Nnenga waka wako, na wana wako, njilekuṟundia, njikuhendie kyamba noichi wuṟundi woko njilekuṟundia.”

²⁷ Labani kambia, “Chandu njilewona mecha mesonyi hapfo, kekaa, kipfa njikumburie ke Mndumii-Ruwa nanjiinengie ona kipfa kyapfo.”

²⁸ Kahamba, “Hamba wueri wopfo ukundi, na inyi njechikuinenga.”

²⁹ Kammbia, “Noichi chandu njilekuṟundia na chandu shuma shapfo shiwei koko.

³⁰ Kyamba masaa hapfo hawei maangu kiheri kyo njilawemeche, naho hakaengeṟa ipfumbuka, Mndumii kakuwikia ona orio handu njilehenda. Aka wulalu, nyi indi njechiambuya sha kanyi koko?”

³¹ Kammbesa, “Njikuinengeki?” Yakobo kahamba, “Kulanjiinenge kindo; kunjiwutie iki, njechilisa shuma shapfo na ishiringa.

³² Inu njechisenguda shuma shapfo shose, na isahuopfo orio kiwode sahasaha na mapaṟipaṟi, na orio ichoondi liiwu ipfo ko machondi, na mburu tsa sahasaha na tsa mapaṟipaṟi nawo nyiwo wueri woko.

³³ Na wusumhanyi woko wochinjiṟingishia maheri ho hechishika, ha mbonyi tsa wueri woko wui kopfo. Orio mburu ilawode sahasaha ang'u mapaṟipaṟi, ang'u ichoondi lilaliiwu, shechikooyo koko, lyechiitalo ke liliiwe.”

³⁴ Labani kahamba, “Ambuya, kiwekuwia kido chandu ohamba.”

³⁵ Nahong'u mkonu naafo kasahuo shioṟo shiwode mcharie na mapaṟipaṟi, na mburu njika tsa sahasaha na mapaṟipaṟi, orio sa iwode ipaṟi lyiilyi, na machondi hose maiwu, kashidambikia mawokonyi ha wana wake.

³⁶ Kakaa haleshe na Yakobo handu ha mkonu iṟaṟu; na Yakobo kalisa shuma sha Labani shilya shiletsuhaaho.

³⁷ Yakobo kaira shidi sha mlubna shiwishi, na mlozi, na mwaramoni, kashipichuo makandaho, mcharie miili ikawono kulya shidinyi.

³⁸ Kahoṟotsa shidisho alepichuo kiidi kya maṟumbuchu herutsia shuma mṟinga, alya handu shuma shekenyoya mṟinga.

³⁹ Shuma shikawada wuroo alya shidinyi, shikashaa shidahina sha mcharie na sha sahasaha na sha mapaṟipaṟi.

⁴⁰ Yakobo kasahuo machondi; kaembeṟutsa mdo yaho haambuye ipo lilya lii lya mcharie, na orio lyilyiiwu kiidi kya shuma sha Labani. Kawika kyanya shuma shake amonyi, ma alesanza handu hamu na shuma sha Labanipfo.

⁴¹ Kikawa orio mandi shuma shilya shiheṟemtsu shambada wuroo, Yakobo kaweshiwikia shidi shilya mesonyi hasho kulya maṟumbuchunyi kundu shiwade wuroo osehu lo shidi shilya.

⁴² Indi shuma shipootse aleshiwika alya shidinyipfo. Ko ikyo shuma shipootse shikawa sha Labani na shiwode pfinya shikawa sha Yakobo.

⁴³ Ko ikyo mnducho kaengeṟeka mnu, kawada shuma shifoi, na shisinga, na masinga, na ngamia na nzoi.