MAWOOKIONYI 28 - Bibilia Kui Mdedie fo Kimochi

¹ Kyasia Isaki kalaha Yakobo, kammbikia ona, kambawasa, kahamba, manya kuladuo mka kiidi kya wana wa kika wa Wakanaani.

² Kure, nohende Padan-aramu, mṟasa kanyi ko Betueli washidio, nokudaayepfo mka kiidi kya wana wa kika wa Labani washidio.

³ Na Ruwa ichu Menyi pfinya nakuwikie ona, nakupfumbutse na ikuengeṟa, kundu nowe mamwingi fo mkambo ya wandu.

⁴ Nakunenge ona lo Abrahamu, iyo na oshari lopfo hamu na iyo, noidime ioṟa oruka lo kyaṟo kyapfo, Ruwa aweinengie Abrahamu.

⁵ Nahong'u Isaki kaduma Yakobo, nao kahenda Padan-aramu, ko Labani, mana o Betueli, Mshami, msacha o Rebeka, mae o Yakobo na Esau.

Esau aalika mka o kaṟaṟu

⁶ Esau kawona ke Isaki amewikia Yakobo ona na imduma Padan-aramu, kundu nakuwonyiepfo mka, handu hamu na immbikia ona kamtutuma, kechihamba, “Kuladuo mka kiidi kya wana wa kika wa Kanaani,”

⁷ na ke Yakobo ameindia ndee na mae, kahenda Padan-aramu.

⁸ Esau kawona ke wana wa kika wa Kanaani walechihia ndeawo Isakipfo

⁹ Nahong'u Esau kahenda ko Isumaeli kaonduopfo Mahalathi mana o kika o Isumaeli mana o Abrahamu, mshiki o Nebayothi, nawe mka oke handu hamu na waka walya wengi awewode.

Ndodo ya Yakobo kulya Betheli

¹⁰ Yakobo kakure kulya Beer-sheba, ihenda Harani.

¹¹ Kashika handu halyiwe kakaapfo kio taṟaṟaa, kyamba mnengeṟi fuwemeolokia; kaira iho limu lya handu halya kalyihekia mdo foke, kalaa mado alya alya.

¹² Kalodia ndodo; ambuya ngasi ihoṟotse o wanda na mdo foyo fukashika ruwehu. Na, ambuya, malaika wa Ruwa waido na isoka.

¹³ Ambuya, Mndumii-Ruwa nahoṟokiho, kechihamba, “Inyi nyi Mndumii, Ruwa o ndeo Abrahamu, na Ruwa o Isaki; orukalu uleepfo njechikuinenga iyo na oshari lopfo.

¹⁴ Na oshari lopfo lochiwa cha kilulyi kya wuyanenyi, na iyo nochikuala wokia ora lo kyukanyi, na lo ngamenyi na ora lo nuka na lo mtsudu; na ipfo kopfo na ko wana wapfo mbaṟi tsa wa wuyana mpfondu wechicha iwikio ona.

¹⁵ Ambuya, inyi njikeri hamu na iyo, njechikuringa orio handu ohenda, na inyi njechikuendese mṟasa iya orukenyi, kyamba njechikudapfo, na tane ngakuwutia isho njilekuwia.”

¹⁶ Yakobo kakure kulya madonyi hake, kahamba, “Kya lohi Mndumii-Ruwa nakeri handu ha, manya inyi njilamanye.”

¹⁷ Nao kaowuo kahamba, “Handuha haoweshie cha kiki! Kofia iya nyi mba ya Ruwa, naho nyiho mongo fo ruwehu.”

¹⁸ Yakobo kakure ngamenyi otuko, kaira iho lilya alelyihekia mdo foke, kalyihoṟotsa cha ngo, kaletsia mafuda o huyalyo.

¹⁹ Kadumbuya handu halya rina nyi Beteli kyaindi rina lya mṟi fulya ili kuwoka nyi Luzu.

²⁰ Yakobo kawika kiasa kechihamba, kokoya Ruwa akaa na inyi, kanjiringa ipfo njienyi handu njiida, na injiinenga kelya njilye, na nguo tseṟaa

²¹ na inyi ngawuya kui ofoṟo mṟasa kanyi ko wande oko, nyi lyondi Mndumii-Ruwa echiwa Ruwa oko.

²² Na iholyi ngalihoṟotsa cha ngo lyechiwa mba ya Ruwa; na ko orio kindo ochinjiinenga nkya lohi njechikuutia-ho iyo kienga kya ikumi.