MAWOOKIONYI 26 - Bibilia Kui Mdedie fo Kimochi

Isaki asamia Gerari

¹ Nalyo kukacha njaa kulya orukenyi, chi njaa iya ya kuwoka ya kiheri kya Abrahamupfo. Isaki kahendia Abimeleki, mangi ya Wafilisti, kulya Gerari.

² Mndumii kammbonekia, kahamba, “Kulasoke wohenda Misri, kaa orukenyi sa njechikuwia.

³ Kaa wuhenunyi wo ipfo orukenyi, na inyi njechikaa hamu na iyo, na ikuwikia mboṟa, kyamba njechikuinenga njorukatsi iyo na luwa lyapfo. Na inyi njechiwanza nyamu iya njileliia ndeo Abrahamu.

⁴ Njechipfumbutsa oshari lopfo cha nyenyeri tsa ruwehu, na inyi njechiinenga oshari lopfo njorukatsi tsose, na kiidi kya oshari lopfo mkambo ya wandu wose wa wuyana wechicha iwikio ona.

⁵ Kyamba Abrahamu naleadanyia ṟu lyako, kahendelia shiteṟio shako, na mawawaso hako, na mdumbuye yako, na shiasa shako.

⁶ “Isaki kakaa kulya Gerari.

⁷ Wandu wa kundo kulya wakammbesa mbonyi tsa mka ulya oke. Kahamba, ‘Ichu nyi mshiki oko;’ kipfa naleowuo ihamba, ‘Nyi mka oko,’ wandu wa oruka lulya walache imbaha kipfa kya Rebeka; kyamba nawemcha kui kyamu.

⁸ Nahong'u amekapfo mkonu ifoi, Abimeleki, mangi ya Wafilisti kaimehia itiṟishenyi, kawona Isaki kechitema-tema na mka oke Rebeka.

⁹ Abimeleki kalaha Isaki kambia, ‘Ichu nyi mka opfo, lang'u,’ nkili kulehamba, ‘Ichu nyi mshiki oko?’ Isaki kambia, ‘Nkipfa njilehamba Njilapfe kipfa kyake.’

¹⁰ Abimeleki kahamba, ‘Nkiki iki kuleluwutia? Kofia mndu umuho kawelaa na mka opfo alakusaṟa, iyo noweluwika mondunyi.’

¹¹ Naho Abimeleki kawawasa wandu wose, kechihamba, Ichu echipaya mnduchu ang'u mka oke kimbaṟi nawoho.”

¹² Nao Isaki kawaya mbeu kulya orukenyi, maaka fulya kasambuo kiheo kya ihana orio imu, Mndumii kammbikia ona.

¹³ Na mnduchu kawa mnene kaengeṟa ipfumbuka, tane awa mwitoṟi.

¹⁴ Kawada masaa ha machondi, na masaa ha mmbe, na masinga hafoi. Wafilisti wo wakamnyenyia.

¹⁵ Na maṟungu halya ha mṟinga hose masinga ha ndee walehasuma, kiheri kya ndee Abrahamu, Wafilisti wawemehaikilia, wakahaichuṟa teri.

¹⁶ Abimeleki kawia Isaki, Kure kunu kodu, kyamba iyo omewada pfinya ing'anyi kota so.

¹⁷ Kyasia Isaki kakurepfo kawika kambi kulya pichinyi lya Gerari, kakaapfo.

¹⁸ Isaki kawuya kasumase maṟungu halya ha mṟinga wawesumie kiheri kya ndee Abrahamu; kipfa Wafilisti walya wawehaikilie Abrahamu amepfa; nao kahadumbuya marina chandu ndee awehadumbuye.

¹⁹ Masinga ha Isaki wakasuma ṟungu kulya pichinyi wakawona mṟinga fuiletseka.

²⁰ Walisi wa Gerari wakaloyana na walisi wa Isaki wechihamba, “Mṟingafu nyi fodu.” Naho kadumbuya ṟungu lilya rina nyi Eseki, kipfa waleloyana nao.

²¹ Wakasuma ṟungu lyingi, wakaweloyanase kipfa kya ikyo. Kalidumbuya rina nyi Sitna.

²² Kakurepfo kasuma ṟungu lyingi, lyo walakiloyane kipfa kyalyo. Kalidumbuya rina nyi Rehobothi, kahamba, “Kyamba Mndumii ameluwonyia maanya, naso lochiengeṟeka orukenyi.”

²³ Kado awukapfo kashika Beer-sheba.

²⁴ Mndumii-Ruwa kamchea kio kilya kilya, kahamba, “Inyi nyi Ruwa o ndeo Abrahamu, kulaowuo, kyamba inyi njii hamu na iyo, njechikuwikia ona na ipfumbutsa oshari lopfo kipfa kya Abrahamu mṟundi oko.”

²⁵ Kasungusia ho rasionyi kaichikiaho rina lya Mndumii. Kawikapfo ihema lyake, na masinga ha Isaki wakasumapfo ṟungu lya mṟinga.

Isaki na Abimeleki waidikiana

²⁶ Nlyondi Abimeleki alemchea awuka Gerari, handu hamu na mbuya yake Ahuzathi na Fikoli, msongoru o itorito lyake.

²⁷ Isaki kawawesa, “Nki ili monjichea, nanyo mulenjisuo, mkanjifuna konu?”

²⁸ Wakahamba, “Nkya lohi lulewona ke Mndumii nawei hamu na iyo; naso lukahamba, ‘Lukaeliana nyamu na iyo, na iidikiana na iyo

²⁹ ke ochiluwutia shiwichopfo, ko koya lulakupaya iyo, manya lochikuwutia shiwichopfo, shile nyi mecha, lukakuda nokuhendie na ofoṟo;’ na iyo wulalu nyi ui msumbe o Mndumii-Ruwa.”

³⁰ Nahong'u kawasungusia mfuho nawo wakalya wakawenyo

³¹ Wakakure ngamenyi otuko, wakaliiana nyamu wo wenyi na wenyi, numa Isaki kawainenga momu, nawo wakakuhendia na oforo.

³² Naho mkonu na fulya, masinga ha Isaki wakacha wakamwendie mbonyi tsa ṟungu lilya lya mṟinga wawelyisumie, wakambia, “Lulewona mṟinga.”

³³ Nao kalyidumbuya rina nyi Shiba; ko ikyo rina lya mṟifo nyi Beer-sheba, mṟasa inu.

Waka wa Esau

³⁴ Esau kiheri awewode maaka makumi hana; kaalyika Yudithi, mana o Beeri, Mhiti, na Basemathi mana o Eloni, Mhiti.

³⁵ Mrima yawo Isaki na Rebeka ikarihinyika kipfa kyawo.