MAWOOKIONYI 25 - Bibilia Kui Mdedie fo Kimochi

Oshari lungi lo Abrahamu

¹ Abraham nalealika mka ungi na rina lyake nawekelaho nyi Ketura.

² Kammbonyia Zimranyi na Yokshanyi na Medanyi na Midianyi, na Ishbaki, na Sua.

³ Yokshanyi kafee Sheba, na Dedani; na wana wa Dedani nyi we Waashuri, na Waletushi, na Waleumi.

⁴ Na wana wa Midiani nyi Efa, na Eferi, na Hanoki, na Abida, na Eldaa. Iwo wose wawei wana wa Ketura

⁵ Abrahamu kainengya Isaki shilya shose awewode.

⁶ Kyaindi wana wa waka walya wengi Abrahamu awewode, Abrahamu kawainenga shindo sha nnga, na kawawuta alya handu mana oke Isaki akeri, kiheri kyose kya moo foke, wahende kya ora lo ngamenyi, mṟasa orukenyi lo Kedemu.

Opfu lo Abrahamu

⁷ Ii nyiyo mkonu ya ohendo lo moo fo Abrahamu ya iya wuyana, nyi maaka ihana, na makumi mfungade na itanu.

⁸ Abrahamu kapfa, na kapfia kiidi kya wuku wucha, amku mnu, o maka ifoi, kakusanza wandu wake.

⁹ Wana wake Isaki na Isumael wakamṟika kulya opangenyi lo Makipela, demenyi lya Efroni mana o Sohari Mhiti, liambuyuanyi na Mamre.

¹⁰ Kulya demenyi sa Abrahamu alelyihuṟa ko Wahiti, nyipfo handu Abrahamu aleṟiko handu hamu na mka oke Sara

¹¹ Nahong'u, Abrahamu amepfa, Ruwa kawikia mana oke Isaki mboṟa. Nao Isaki kakaa kufui na Beer-lahai-roi.

Oshari lo Isumaeli

¹² Ilu nyilo oshari lo Isumael, mana o Abrahamu, ichu Hajiri, Mmisri, kisinga kya Sara alefeeya Abrahamu.

¹³ Iha nyiho marina ha wana Isumaeli, na kui marina hawo, na kui oshari lowo. Mana mmbe o Isumaeli, nyi Nebayothi, na Kedari, na Abdeeli, na Mibsamu,

¹⁴ na Mishma na Duma, na Masa,

¹⁵ na Hadadi, na Tema, Yefuri, Nafishi na Kedema.

¹⁶ Iwo nyiwo wana wa Isumaeli, na iho nyi marina hawo mṟinyi yawo, na shidembonyi shawo, wasongoru ikumi na wawi kui mbaṟi tsawo.

¹⁷ Na ii nyio maka ya ohendo lo moo fo Isumaeli, maka ihana na makumi haṟaṟu na mfungade. Kalekia moo, kapfa, kakusanza na wandu wake.

¹⁸ Wakakaa wokia Havila tane Shuri, kui cha ili ohende Misri, ohenda Ashuru. Kakaa makidi hawi ha wana wa mae wose.

Ifeo lya Esau na Yakobo

¹⁹ Na ilu nyilo oshari lo Isaki, mana o Abrahamu. Abrahamu nawei ndeye o Isaki.

²⁰ Isaki nawei mndu o maaka makumi haana kiheri aleduo Rebeka mana o Betueli Mshami, o Padan-Aramu, mana o mayo Laban Mshami, nawe mka oke.

²¹ Isaki katerewa Mndumii-Ruwa kipfa kya mka oke kyamba nawei mhumba. Nao Mndumii kamhaluo, na Rebeka kakapika.

²² Wana wakatangiṟana wusunyi woke. Nao Rebeka kahamba, Kokoya nyi wudi, kiira kiki ikaa na moo? Kahenda iwesa Mndumii.

²³ Mndumii kambia, Mbaṟi tsiwi tsa mkambo tsikeri ipfo wusunyi wopfo. Mbaṟi tsiwi tsa wandu tsechipaṟakana wokia wusunyi wopfo. Mbaṟi imu yechiwa ngohoda kota ya kawi, Ang'anyi nechisingia mtutu.

²⁴ Mfiri yake yefee yekishika, ambuya! Wana wa mboṟa wawi wawei wusunyi woke.

²⁵ O kuwoka kawukapfo, nao nawefanyi owiṟo mbihu fose cha iṟao lya njuinyi. Wakamdumbuya rina lyake Esau.

²⁶ Lyefurumia mana o mae kafeo, na owoko loke luwewode o kitsinanonyi kya Esau. Kalaho rina lyake nyi Yakobo. Isaki nawewode maaka makumi haṟandaṟu kiheri mka oke alewafee.

Esau akumba wuwee woke

²⁷ Wana wakang'ana, Esau kawa mndu molasa mando ha nja, mndu o nuka, na Yakobo nawei mndu apfudie, awekekaa ihemenyi.

²⁸ Naho Isaki kakunda Esau, kipfa kya ili alelya shindo shalaso nyi Esau, na Rebeka kakunda Yakobo.

²⁹ Kiheri kimu Yakobo kakoṟa kelya kya soma. Esau kacha awuka nuka, nao naweleheli mnu.

³⁰ Esau kawia Yakobo, “Hoi, kekunnengye kelyakyo kifanyi kimaande njikulyie, kyamba njirengera njii.” Ko ikyo walemdumbuya rina nyi Edomu. Kimu cha Okimaande

³¹ Yakobo kambia, “Kuwoka kemenjikumbia inu wusongoru wopfo wo ifeo.”

³² Esau kahamba, “Ambuya, inyi nyi kufui njipfe, wusongoru woko wo ifeo wochintarama kiki?”

³³ Yakobo kambia, “Kyemenjiliia nyamu kuwoka. Nao kamliia nyamu, kakumbia ‘Yakobo wusongoru woke wofeo.’”

³⁴ Yakobo kainenga Esau mkate na kelya kya soma, nao kalya, kawenyo, kiidima kakure kakuhendia. Ko ikyo Esau kaisalucha na ipiṟa wusumhanyi woke wo mana mmbe.