MAWOOKIONYI 22 - Bibilia Kui Mdedie fo Kimochi

Abrahamu awuta Isaki nawe kidaso

¹ Nahong'u mbonyi tsi tsameida Ruwa nalehesha Abrahamu, kambia, “Oo Abrahamu.” Nao kahamba, “Nyi iya njii.”

² Kahamba, “Ira manachu, mana opfo kimumu mfi, umkundi Isaki, nohende nao tane orukenyi lo Moria, nommbute nawe kidaso kemaya modonyi ipfo fumvuhu lyimuho sa njechikuloṟa.”

³ Abrahamu kakure ngamenyi otuko, kaṟeheṟa nzoi yake, kaduo wanake wawi handu hamu nao, na mana oke Isaki, kapaṟapaṟa na ngu kipfa kya kidasokyo kemaya modonyi, kakure, kahenda tane handu halya ewio nyi Ruwa.

⁴ Mkonu fo kaṟaṟu Abrahamu kairia meso hake kawona handu halya ai haleshe.

⁵ Abrahamu kawia wanake walya wake, “Nyo kaenyi iya handu hamu na nzoi ii, na inyi na mana lochihenda kulya, luhende iterewa, numa lochimuwuyase.”

⁶ Nahong'u Abrahamu kaira ngu tsa kidasokyo, kadika mana oke Isaki, kaira modo, na oshu mawokonyi hake, wakahenda handu hamu wose wawawi.

⁷ Isaki kadeda, na ndee Abrahamu kechihamba, “Wande oko!” Nao kahamba, “Nyi iya njii mana oko.” Kahamba, “Ambuya! Modo fuipfo, na ngu tsiipfo, kyaindi ihuṟuwi lyedasa nku lii?”

⁸ Abrahamu kahamba, Ruwa nechikuwonyia ihuṟuwi lya kidasokyo, mana oko. Kyasia wakahenda wose wawawi.

⁹ Kiheri waleshika handu halya alewawasio nyi Ruwa, Abrahamu kasungusiaho rasionyi, kaṟeheṟiaho ngu, numa kapfunga mana oke Isaki, kamhekia alya rasionyi, huye ya ngu tsilya.

¹⁰ Abrahamu kahoṟuo owoko loke, kairaoshu loke nashinje mana ulya oke.

¹¹ Nalyo malaika o Mndumii-Ruwa kamlaha kuwuka ruwehu, kahamba, “Abrahamu! Abrahamu!” Nao kahamba, “Nyi iya njii.”

¹² Kahamba, “Kulahoṟoye mana owoko lopfo, manya kulambutie kindo; kyamba wulalu ngamemanya ke noidikie Ruwa, kyamba kulalenjiima manachu, mana opfo kimumu mfi.”

¹³ Abrahamu kairia meso hake, kaambuya, ambuya, isuwa lyikeri numa yake, membe tsalyo tsiwodo mshenyi. Nahong'u Abrahamu kaira isuwa lilya; kaliwika lyiwe kidaso kemaya modonyi handu ha mana ulya oke.

¹⁴ Abrahamu kadumbuya rina handu halya Yehova-Yire, chandu wandu wekehamba mṟasa inu, “Ipfo fumvuhu lya Mndumii-Ruwa kochiwoneka.”

¹⁵ Malaika o Mndumii-Ruwa kalaha Abrahamu lya kawi kuwuka ruwehu,

¹⁶ kahamba, “Ngalya nyamu kui mrima foko Mndumii nahamba, ‘Kipfa kya ili owuta iki, manya kulanjiiime manachu opfo, mana opfo kimumu mfi,

¹⁷ iwikya mboṟa njechikuwikia mboṟa, na ipfumbutsa, njechipfumbutsa oshari lopfo cha nyenyeri tsa ruwehu na cha msanga fo ipfo mawambao ha ipalyipalyi na oshari lopfo lochiitoṟia wakituwa wapfo;

¹⁸ na kiidi kya oshari lopfo mkambo ya wandu yose wechicha iwikio ona; kipfa kya ili ohendelia ṟu lyako.’”

¹⁹ Abrahamu kawuya na ko waleu walya wake, wakakure, wakakuhendia mṟasa Beer-sheba; Abrahamu kakaa kulya Beer-sheba.

Wana wa Nahori

²⁰ Nahong'u mbonyi tso tsameida, Abrahamu kawio ke, Ambuya Milika amewonyia Nahori manomayo wana;

²¹ Usi mana mmbe, na Busi manomae, na Kemueli, ndee o Aramu;

²² na Kesedi, na Hazo, na Pildashi, na Yidlafu na Betueli.

²³ Betueli kafee Rebeka. Iwo nyanya Milika nalewonyia Nahori manomae o Abrahamu.

²⁴ Na Reuma mka o mii oke kafee Teba na Gahamu na Tahashi na Maaka.