MAWOOKIONYI 21 - Bibilia Kui Mdedie fo Kimochi

Ifeo lya Isaki

¹ Mndumii-Ruwa kachea Sara chandu awehambie, na Mndumii kambutia chandu awehambie.

² Sara kakapika kafeeye Abrahamu mana o womi kiidi kya wuku woke, ko kiheri kilya ewio nyi Ruwa.

³ Abrahamu kamdumbuya rina lyake nyi Isaki, mana ulya alefeyo, ulya Sara emfeya.

⁴ Abrahamu kadina mana ulya oke Isaki, kiheri awewode mkonu nyanya chando Ruwa embawasa.

⁵ Nao Abrahamu nawei mndu o maaka ihana, kiheri mana oke Isaki alefeo.

⁶ Sara kahamba, “Ruwa amenjiwutia kindo kesetsa; orio oose echiicho nechiseka hamu na inyi.”

⁷ Kahamba, “Nyiu awechiwia Abrahamu, Sara nechionza wana?” Kyamba ngamembonyia mana kiidi kya wuku woke.

⁸ Mana ulya kang'ana, kadumbutsio ionga; Abrahamu kasungusia mfuho fung'anyi mkonu fulya Isaki aledumbutsio ionga.

Hajiri afuno

⁹ Sara kaambuya mana ulya o Hajiri Mmisri, ulya efeeya Abrahamu, kechitema na mana oke Isaki.

¹⁰ Nalyo kawia Abrahamu, “Funa kisingaki kya kika hamu na mana oke, cha kipfa mana o kisinga echiwada kyoṟa handu hamu na mana oko, Isakipfo.”

¹¹ Na idedolyi liwei lyiwicho mnu mesonyi ha Abrahamu; kipfa kya mana oke.

¹² Ruwa kawia Abrahamu, “Idedo lyi lyilawichuo mesonyi hapfo, kipfa kya mana na kisinga ki kyapfo. Orio kindo Sara echikuwia idikia ṟu lyake, cha kipfa kiidi kya Isaki oshari lopfo lochisendo.

¹³ Nao manachu o kisinga njechimhaluo mkambo fo wandu, kyamba nao na luwa lyapfo.”

¹⁴ Abrahamu kakure ngamenyi otuko kaira mkate na kitumo kya mṟinga, kainengia Hajiri kamdika o makosohu hake; kamnengia na mana; nao kahenda kadekia kulya nuka ya Beer-sheba.

¹⁵ Mṟinga fulya foikisia kulya kitumonyi, kalaṟa mana ulya shiya ikidi limu.

¹⁶ Kahenda kakaa handu haleshe cha ha mkumbie fo mfi kemwambuya; kipfa nalehamba, “Ndawone manachu kechipfa;” nao kakaa kechimwambuya, kakoṟoṟoma na ṟu lyake, kafihiṟa.

¹⁷ Ruwa kaicho ṟu lya mleu ulya. Malaika o Ruwa kalaha Hajiri kuwuka ruwehu, kambia, “Nki ki kikuwode, Hajiri? Manya kulaowuo, cha kipfa Ruwa ameicho ṟu lya mleu ulya ipfo kundu ai.

¹⁸ Kure, nohendeira mleu ulya, nombade owokonyi lopfo, kyamba njechimhaluo mkambo fung'anyi.”

¹⁹ Ruwa kamwambuṟa meso, nao kawona ṟungu lya mṟinga; kahenda kaichuṟa kitumo kilya mṟinga, karutsa mleu ulya.

²⁰ Ruwa kakaa na mleu ulya, nao kang'ana kakaa kulya nuka, kawa mlasi o wuda.

²¹ Kakaa kulya nuka ya Parani; mae kamdaya mka kya orukenyi lo Misri.

Mkundano kiidi kya Abrahamu na Abimeleki

²² Kikashikia kiheri kilya Abimeleki, na Fikoli mnene o itorito lyake, wakawia Abrahamu, wehamba, “Ruwa nakeri na iyo ko orio kindo kyose okewuta.

²³ Kyasia wulalu nonjiliie nyamu ko Ruwa, ke ochinjiwutia mtambopfo, ma mana oko, ma mchuku okopfo; kyaindi chandu njilekuwutia osaṟio na wudo ochinjiwutia inyi, na orukalu ulechumiapfo.”

²⁴ Abrahamu kahamba, “Njechilya nyamu.”

²⁵ Nahong'u Abrahamu kadehelia Abimeleki kipfa kya ṟungu lilya lya mṟinga masinga ha Abimeleki halelyimsoka.

²⁶ Abimeleki kahamba, “Inyi njiichi mndu alewuta kindokipfo, ma kulenjiwia manya iicho mbonyitsipfo shile na inu tupu.”

²⁷ Abrahamu kaira ichondi na mmbe kainengia Abimeleki, nawo wa wawi wakawada mkundana.

²⁸ Abrahamu kawika mahuṟuwi mfungade kyanya kyaho.

²⁹ Abimeleki kawia Abrahamu, “Mahuṟuwi ha mfungade ohawika kyanya kyaho nyi ha kiki iho.”

³⁰ Nao Kahamba, Mahuṟuwi ha mfungade nochihaambia mawokonyi hako, hawe uṟingishi ke nyi inyi njilesuma ṟungulyi lya mṟinga.

³¹ Ko ikyo kalaha handu halya nyi Beer-sheba, kipfa waleliiaho nyamu wa wawi.

³² Nahong'u wakawika mkundana ipfo Beer-sheba. Abimeleki, na Fikoli mnene o itorito lyake, wakakure wakawuya tane orukenyi lo Wafilisti.

³³ Abrahamu kadonga mmoya ipfo Beer-sheba, kaichimbiṟiaho rina lya Mndumii, Ruwa o mlungana.

³⁴ Abrahamu kakaa cha mhenu orukenyi lo Wafilisti mkonu ifoi.