MAWOOKIONYI 20 - Bibilia Kui Mdedie fo Kimochi

Abrahamu na Abimeleki

¹ Abrahamu kakurepfo kahenda orukenyi lo kya nuka, kakaa makidi hawi ha Kadeshi, na Shuri, nao kachumia kulya Gerari.

² Abrahamu kahamba ke mka ulya oke Sara, “Ichu nyi manowama.” Naho Abimeleki mangi ya Gerari kaduma wandu kaduo Sara.

³ Kyaindi Ruwa kachea Abimeleki kui ndodo ili kio, kambia, “Iyo nochipfa kipfa kya mkachu omduo, kyamba nyi mka o mndu.”

⁴ Naho Abimeleki awemekuwashe naopfo, kahamba, “Ewo Mndumii, Ngesa, na ochiwaha na mkambofo fusumhanyi?

⁵ Alae! Chio anjiwia amonyi, ‘Ichu nyi mano wama?’ Na mndu mka chu nao amonyi kawehamba, ‘Ichu nyi manowama.’ Kui wulalutsu wo mrima foko na kui mawoko hako mecha ngawuta njido.”

⁶ Naho Ruwa kambia kiidi kya ndodo. Na inyi ngawemanya ke kui wulalutsu wo mrima fopfo nowuta kudo, lyong'u, na inyi ngakuima kulanjiwutie wunyamaṟi, njilakulekie nompaaye.

⁷ Ko ikyo nowihiṟe mkachu o mndu wulalu kipfa o nyi mwikimbi nao nechikuterewia nokie. Indi koda kulambihiṟa manya kya lohi ke nochipfa iyo na wandu wose ui nawo.

⁸ Abimeleki kakure ngamenyi otuko, kalaha masinga hake hose, kawawia madedoho hose madunyi hawo, na wandu wo wakaowuo mnu.

⁹ Naho Abimeleki kalaha Abrahamu, kambia, “Nkiki oluwutia? Nkiki njilekudekio, tane oende huyako na huya wumangi woko wunyamaṟi wung'anyi? Nonjiwutia mawuto halawaṟi iwuto.”

¹⁰ Abimeleki kawia Abrahamu, “Nkiki ulewona tane owuta kudo?”

¹¹ Abrahamu kahamba, “Kyamba njilewona, kya lohi iya waowoe Ruwapfo, nawo wechinjiwaha kipfa kya mkachu oko.

¹² Nao cha lohi nyi manowama, mana o waka o wande oko kyaindi mayadu chi umupfo, nyilyong'u kawa mka oko.

¹³ Na lilya mandi Ruwa alenjiinenga kyaṟo ngawuka ko wande oko, njilemmbia, ‘Ilyi nyilyo isaṟia lyapfo ochinjiwutia.’ Orio handu lochishika nohambe, ‘Ichu nyi mana o wama oko.’”

¹⁴ Nahong'u Abimeleki kaira machondi na mmbe na masinga ha kiumi na ha kika, kainengya Abrahamu kammbihiṟia na mka ulya oke Sara.

¹⁵ Abimeleki kahamba, “Ailu orukalu loko lui iya oshangunyi lopfo, kukaiye handu okukundia.”

¹⁶ Nao kawia Sara, “Ambuya ngainenga manomayo fesa kiku tsiwe kishikya meso hapfo oshangunyi lo wai na iyo wose, na iyo nochiwada wusumhanyi oshangunyi lo wandu wose.”

¹⁷ Abrahamu katerewa Ruwa; nao Ruwa kakiṟa Abimeleki, na mka oke na masinga hake ha kika, nawo wakafee wana.

¹⁸ Kyamba Mndumii-Ruwa nawepfungie wusu wo wandu wa kanyi ko Abimeleki, walafee kipfa kya Sara mka o Abrahamu.