MAWOOKIONYI 2 - Bibilia Kui Mdedie fo Kimochi

¹ Nahong'u ruwehu na oruka shilemariso, na osangaṟimo loke lose.

² Na mfiri fo mfungade Ruwa kamarisa iṟunda lyake lyose alelyiṟunda; kasia moo mfiri fo mfungade, alakiṟunde-se iṟunda lilya lyake awelyiṟunda.

³ Ruwa kafuwikya mboṟa mfiri fo mfungade, kafutana mwele, kipfa Ruwa naleonyonyia kada alaṟunda iṟunda lyake lyose.

⁴ Nyi wudo kishari kya ruwehu na orukenyi kilewumbo. Mkonu fulya Mndumii-Ruwa alewumba ruwehu na oruka,

Mhunda fo Edeni

⁵ kuwewode kilimu kya mdeminyipfo, manya madema hawemeoṟishe kindopfo, kyamba Mndumii-Ruwa awemeolotsie oruka mvuo-pfo, manya kuweipfo mndu modema-pfo;

⁶ mtiima fukado fukawika mmeṟa orukenyi.

⁷ Mndumii-Ruwa kawumba mndu kui kilulyi, kamwifilia mṟufu fo moo mbuonyi; mndu kawa kindo kii na moo.

⁸ Mndumii-Ruwa kodonga mdemi Edenyi kulya ora lo ngamenyi, kawikapfo mnducho alemwumba.

⁹ Mndumii-Ruwa kaoṟisha orukenyi orio ikidi lya kiweṟe keambuya na iloda hakaweloda ikuliaho; na ikidi lya moo ipfo makidi hawi ha mhunda fulya, na ikidi lya wuṟango lyemanyisha shicha na shiwicho.

¹⁰ Kukawuka meda kulya mhundenyi fo Edenyi fonosia mhunda fulya, na kuwokialyo fukawada mbanga tsiina.

¹¹ Rina lya mbanga ya kuwoka nyi Pishoni; nyifo futengetie oruka lose lo Havila; luwode sahapu;

¹² sahapu ya orukalu injicha; kuipfo mafuda hepfaama helaho bedola, na maho ha wuhuru wung'anyi helaho Shohamu.

¹³ Mbanga ya kawi nyi Gihoni; nyiyo itengetie oruka lose lo Kushi.

¹⁴ Mbanga ya kaṟaṟu nyi Hidekeli nyiyo iidie Ashuru. Na mbanga ya kaana nyi Frati.

¹⁵ Mndumii-Ruwa kambika mnducho kulya mhundenyi fo Edenyi, nafudeme na ifuachikia.

¹⁶ Mndumii-Ruwa kawawasa mnducho, kehamba, “Ndunda tsa orio ikidi kunu mhundenyi na ochikulia,

¹⁷ kyaindi ndunda tsa ikidilyo lyemanya shindo shicha na shiwicho manya kulalye, cha kipfa mkonu ochilya ndunda tsa ikidilyo kya lohi nochipfa.”

¹⁸ Mndumii-Ruwa kahamba, “Chi kicha mndu nakae kikoke amonyipfo, njechimbikia momwikanyia afananyi nao.”

¹⁹ Mndumii-Ruwa kaende napfo mando hai na moo ha mbaṟi tsifoi ha ngeṟenyi ahawuta ipfo terinyi na orio ilehe lya ruwehu, kaendie mnducho naambuye chandu echihadumbuya marina; orio kiumbe kii na moo, rina mnducho alekidumbuya lyikawa nlyo rina lyakyo.

²⁰ Adamu kadumbuya shuma shose marina, na malehe ha ruwehu, na orio indo lya ngeṟenyi; kya indi kulawoneke motarama mnducho msa asumhanyi nao.

²¹ Mndumii-Ruwa kaendie mnducho mado ha mnengerile; kalaa; numa Mndumii-Ruwa kawutaho owari loke lumu, kashikiaho na nyama alyando alewuta awari lulya,

²² na owari lulya aleluwuta ipfo ko mnducho Mndumii-Ruwa kaluwumba mndu mka, kamwende na ko mnducho.

²³ Mnducho kahamba: “Wulalu ichu nyi fuo kiidi kya mafuo hako, na nyama kiidi kya nyama tsako, kyasiang'u nechilaho nyi mndu mka, kipfa nambute ko mndumsoṟo.”

²⁴ Ko ikyo mndu msoṟo nechilekana na ndee na mae nahende iwadana na mka oke, nawo wechiwa mbihu fumu.

²⁵ Nawo wawei kitaṟe wawawi, mndu cho na mka cho oke, nawo manya walaṟeenze.