MAWOOKIONYI 17 - Bibilia Kui Mdedie fo Kimochi

Odino nyi kichano kya mkundana

¹ Kiheri Abramu awei mndu o maaka makumi kenda na kenda, Mndumii-Ruwa kachea Abramu, kambia, “Inyi nyi Ruwa. Menyi wuitoṟi, chumia oshangunyi loko, kulawode tewe.

² Njechiwika mkundana foko kiidi kyako inyi na iyo na inyi njechikupfumbutsa mnu nakamu.”

³ Abramu kaho wanda na kyamu; Ruwa kambia, kahamba.

⁴ “Inyi ngawika mkundana foko inyi na iyo; na iyo nochiwa ndee o mkambo ya wandu ifoi.

⁵ Manya rina lyapfo ochilahose nyi Abramu-pfo indi rina lyapfo lyechiwa Abrahamu, kipfa ngakutana nowe ndeyo o mkambo ya wandu ifoi.

⁶ Njechikutana uwade kishari king'anyi mnu na kamu, njikutana nowe mkambo, na wamangi nyi ipfo kopfo wechiwuka.

⁷ Mkundana foko na iyo njechifuwanza, na shishari shapfo shose shechikuituma. Mkundanafu, fochiwa mkundano fo mlungana, ke njechiwa Ruwa kowo na ko washari wawo wechikuituma iyo.

⁸ Na Inyi njechikuinenga iyo na oshari lopfo lochiituma numa yapfo orukalu ukeri wuhenunyi, oruka lose lo Kanaanyi, noluitoṟie mlungana; na inyi njechiwa Ruwa owo.”

⁹ Ruwa kawia Abrahamu, “Na iyo uwade mkundana foko, iyo na luwa lyapfo na luwa lyawo wechiituma numa yapfo.

¹⁰ Ifu nyifo mkundano foko ochifuwada, kiidi kyako inyi na iyo, na luwa lyapfo lyechikuituma: Orio mndu msoṟo oose ipfo konu nechidino.

¹¹ Mochidino nyama ya kichong'u ya kitaṟe kyanu, na kindo-ki kechiwa kichano kya mkundana foko inyi nanyo.

¹² Mana o mkonu nyanya nechidino ipfo konu, orio mndu msoṟo o kiidi kya luwa lyanu, msa amfee ipfo konu, na msa amhuṟe na pesa orio mhenu alai o luwa lyapfo.

¹³ Msa amfee ipfo kanyi kopfo na msa amhuṟe kui pesa tsapfo, kimbaṟi nadino; na mkundana foko fochikaa mbihunyi yanu, fuwe mkundana fo mlungana.

¹⁴ Na mndu msoṟo awode nyama ya kichong'u ya kitaṟe kyake alamdine, mndu cho naletsano na wandu wake, nyi afunja mkundano foko.”

Abrahamu ainengo kyasa kya mana

¹⁵ Ruwa kawia Abrahamu, “Mka opfo Sarai ochimlahase rina lyake nyi Sarai-pfo, kipfa rina lyake lyechiwa nyi Sara.

¹⁶ Na inyi njechimbikia ona, na njechikuinenga mana ipfo koke. Ee-da, njechimbikia ona, nao nechiwa mayo o mkambo ya wandu na wamangi wa mbaṟi tsa wandu nyi ipfo koke wechiwuka.”

¹⁷ Nalyo Abrahamu kaho wanda na kyamu kaseka, kahamba mrimenyi foke, “Aka, Mndu o maaka ihana ipfo koke kochefeo se mana? Nao Sara o maaka makumi kenda nechefee se mana?”

¹⁸ Abrahamu kawia Ruwa, “A ngesa kima Ismaeli akaa oshangunyi lopfo!”

¹⁹ Ruwa kambia, Chi wudopfo, indi mka opfo Sara nechikuwonya mana o womi na ochimlaha rina lyake nyi Isaki. Na inyi njechiwika mkundano foko mbanzi nao fuwe mkundano fo mlungana kipfa kya oshari loke numa yake.

²⁰ Na kya Isameli ngamekuicho, ambuya njechimbikia ona, njechimpfumbutsa, njechimwengeṟa mnu na kamu; Nechifee wamangi ikumi na wawi na inyi njechimbika nawe mkambo sa mnene.

²¹ Kya indi njechiwika mkundana foko mbanzi ipfo ko Isaki, ichu Sara echikufee kiheri cha iki maaka fochicha.

²² Ruwa kada aladedese nao, kado awuka ko Abrahamu.

²³ Abrahamu kaira mana oke Isameli, masinga hose hawemafee kulya kanyi koke, na walya wose walehuṟo kui fesa tsake, wasoṟo wose wa wandu wa mba ya Abrahamu, kawadina nyama ya shichong'u shawo mkonu fulya fulya, chandu Ruwa alemmbia.

²⁴ Nao Abrahamu nyiwe mndu o maaka makumi kenda na kenda (99), kiheri kilya aledino nyama ya kichong'u ya kitaṟe kyake.

²⁵ Na mana oke Ismaeli nyiwe mndu o maaka ikumi na iṟaṟu (13), mandi aledino nyama ya kichong'u ya kitaṟe kyake.

²⁶ Mkonu na fulya Abrahamu aledino hamu na mana oke Ismaeli.

²⁷ Na wandu wose wa mba yake, walefeeyo kulya kanyi, na wahuṟe kui fesa owokonyi lo mhenu, wakadino handu hamu nao.