MAWOOKIONYI 16 - Bibilia Kui Mdedie fo Kimochi

Sarai na Hajiri

¹ Nahong'u Sarai mka o Abramu nalafee mana, nao nawewode mṟundi o kika, Mmisri, rina lyake nyi Hajiri.

² Sarai kawia Abramu, “Wulalu Mndumii-Ruwa amepfunga wusu woko kundu njilafee, kekaa na mṟundi-chu oko o kika kulako njechikuwonyiapfo wana ipfo koke.” Abramu kaadanyia ṟu lilya lya Sarai.

³ Sarai mka o Abramu kaira kisinga kyake kya kika Hajiri Mmisri, kekikaa na Abramu maaka ikumi kulya orukenyi lo Kanaani kainengia mii oke Abramu, nawe mka oke.

⁴ Abramu kalaa na Hajiri nao kakupfunga. Nao kekikumanya ke nakupfungie nalakiindiese mae.

⁵ Sarai kawia Abramu, “Wuwicho wulenjihoya na wukae huye yapfo, njilekwinenga kisinga kyako kya kika ngambika o kipeeta kyapfo, nao ambona ke nakupfungie nalakinjiwadiese wuindi; njikerise kindo mesonyi hakepfo. Mndumii-Ruwa nawe moanduya kiidi kyako inyi na iyo.”

⁶ Nao Abramu kawia Sarai, “Ambuya kisinga kyapfo kya kika nyi ipfo mawokonyi hapfo ai mmbutie ikyo uwonyi kii kicha.” Sarai kamlisa wukiwa, nao kadicha awuka oshangunyi loke.

Ishimaeli afeo

⁷ Malaika o Mndumii-Ruwa kambona akeri sokenyi ya mṟinga kulya nuka, sokayo iwei kufui na njia yehenda Shuri.

⁸ Kambia, “Hajiri, iyo ni kisinga kya Sarai, nku owuka, na nku uihenda?” Kahamba, “Ngadicha njiwuka oshangunyi lo wama oko Sarai.”

⁹ Malaika o Mndumii-Ruwa kambia, “Wuya na ko mayo, nombadie wuindi.”

¹⁰ Malaika o Mndumii-Ruwa kambia, “Nkya lohi njechipfumbutsa oshari lopfo, chandu wechifo wechiwa iitalapfo.”

¹¹ Malaika o Mndumii kambia, “Ambuya, nokupfungie, nochifee mana o womi, na rina lyake nochimlaha nyi Ismaeli, kyamba Mndumii-Ruwa ameicho kieṟeṟo kya wukiwa wopfo.

¹² Nao nechiwa cha nzoi ya ngeṟenyi kiidi kya wandu, nechiwa mkituwa o orio mndu na orio mndu nechiwa mkituwa oke, nao nechikaa ai mkituwa oshangunyi lo wana wa mae wose.”

¹³ Hajiri kalaha rina lya Mndumii-Ruwa ulya alededa nao, “Iyo nyi ui Ruwa okewona;” kipfa nalehamba, “Na iya ngawewona Ruwa ichu anjiwonyi, kawededa na inyi.?”

¹⁴ Koikyo ṟungu lilya lya mṟinga lilelaho nyi, Beer-lahai-roi. Nalyo likeri makidi hawi ha Kadeshi na Beredi.

¹⁵ Hajiri kawonyia Abramu mana o womi; Abramu kamdumbuya rina lyake nyi Ismaeli, mana ulya oke alefeeyo nyi Hajiri.

¹⁶ Nao Abramu nyiwe mndu o maaka makumi nyanya na iṟandaṟu (86), kiheri kyo Hajiri emfeeya Ismaeli.