MAWOOKIONYI 15 - Bibilia Kui Mdedie fo Kimochi

Mkundana fo Ruwa na Abramu

¹ Isho shose shameida, idedo lya Mndumii-Ruwa likachea Abramu ndodonyi, lyehamba, “Manya kulaowuo Abramu! Inyi nyi ngawo yapfo na njechikuinenga mboṟa ing'anyi mnu.”

² Abramu kahamba, “Ewo, Mndumii RUWA, ki ochinjiinenga, na inyi njikeri ikuhendya ndawode ma mana, na ichu echiitoṟia mba ii yako na Elieseri chu Mdamasko?”

³ Abramu kahamba, “Ambuya ulennenga luwapfo, na isinga lyi lyilefeeo kunu kanyi koko nyio mokyooṟa oko.”

⁴ Nalyo idedo lya Mndumii-Ruwa lyikamchea lyehamba, “Ichu echikuoṟapfo, kya indi msa echiwuka kitsinyi kyapfo nyio echiduo kyooṟa kyapfo.”

⁵ Kamwiitsa na nja, kahamba, “Keambuya ipfo ruwehu wulalu, keitala nyenyeri, kokoya kochiidima itsiitala. Kammbia nyi wudo oshari lopfo lochipfumbuka.”

⁶ Abramu kaidikia Mndumii-Ruwa, na Mndumii-Ruwa kamtana nyi o wusumhanyi.

⁷ Nahongu kambia, “Inyi nyi Mndumii, njilekuende wokia Uri ya Wakaldayo njikuinenge orukalu luwe kyooṟa kyapfo.”

⁸ Abramu kahamba, “Ewo Mndumii-Ruwa, njechimanya njida ke iki nyi kyooṟa kyako?”

⁹ Mndumii-Ruwa kambia, “Njiendie taho ya maaka iṟaṟu na suwana ya maaka iṟaṟu, na suwa ya maaka iṟaṟu, na mbeta, na ialea lya mbuna.”

¹⁰ Nao kamwendie isho shose, kashipaṟa njora tsiwi kashileṟia orio kipeṟengu kikaambuyana na kingi, indi shilehe shilya nalashipaṟe.

¹¹ Na lilya mandi mbeṟo tsilelaa huya mnying'a iya Abramu katsifuna.

¹² Na lilya mnengeṟi fuleolokya Abramu kawado nyi mado ha mnengerile kawado nyi wuowu kipfa kya mema fung'anyi.

¹³ Mndumii kawia Abramu, “Nomanye lohi ke oshari lopfo wechiwa wahenu orukenyi lulai lowo, wechisingia wandu wo, nawo wechiwalisa wukiwa maaka mahana haana (400).

¹⁴ Na mkambofo, wechiwasingia, njechiwaanduya numa, wechiwukapfo na masaa hafoi.

¹⁵ Kyaindi iyo nochihenda ko wandee wapfo na nakipuo, nochiṟiko kuwode wuku wucha.

¹⁶ Na njukuna tsapfo wechiwuya na iya kyamba wunyamaṟi wo Waamori womeawukiapfo.”

¹⁷ Naalyo lilyamandi mnengeṟi fuleolokia kukaho meema, ambuya, tuṟukumbi ya mtsu, na olewo lo modo lukaida kiidi kya shipeṟengu shilya sha nyama.

¹⁸ Mkonu fulya Mndumii kawika mkundana na Abramu, kambia, “Oshari lopfo ngaluinenga orukalu, wokia meda fo Misri tane medafo fung'anyi, meda fo Frati.

¹⁹ Mkeni, Mkenazi, Mkadimoni,

²⁰ Mhiti na Mperizi na Mrefai,

²¹ na Mwamori, na Mkanaani, na Mgirgashi, na Myebusi.”