MAWOOKIONYI 14 - Bibilia Kui Mdedie fo Kimochi

Abramu akiṟa Loti

¹ Kyasia kiheri Amrafeli ai mangi ya Shinari na Arioko mangi ya Elasari, na Kedorlaoma mangi ya Elamu na Tidali mangi ya Goimu,

² waleamtsa shida na Bera mangi ya Sodoma, na Birsha mangi ya Gomora, na Shinabu mangi ya Adma, na Shemeberi mangi ya Seboimu, na mangi ya Bela, nyio Soari.

³ Iwa wose wakakusanza kulya pichinyi lya Sidimu kufui na ipalyipalyi lya moonyo.

⁴ Maaka ikumi na iwi wechiṟundia Kedorlaoma na maaka fo ikumi na iṟaṟu wakamleha.

⁵ Na maaka fo ikumi na kaana Kedorlaoma kacha na wamangi walya wawei kimu nao, wakakapa Warefai kulya Ashteroth-karnaimu na Wazuzi kulya Hamu, na Waemi kulya Shawe-kiryathaimu,

⁶ na Wahori kulya fumvuhu lyawo Seiri, mṟasa Elparani ii kufui na nuka.

⁷ Numa wakawuya wakacha mṟasa Enmisfati, nyifo Kadeshi, wakakapa oruka lose lo Waamaleki na lo Waamori wawekekaa Hasason-tamari.

⁸ Mangi ya Sodoma na ya Gomora, na mangi ya Adma, na mangi ya Seboimu na mangi ya Bela nyio Soari wakakure wakaamtsa shida kulya rendewelenyi lya Sidimu,

⁹ Wakapane na Kedorlaoma mangi ya Elamu, na Tidali mangi ya Goimu, na Amrafeli mangi ya Shinari, na Arioko mangi ya Elasari, wamangi waana ko walya watanu.

¹⁰ Na pichi lya Sidimu liwewode maṟungu hafoi ha kimia. Na wamangi walya wa Sodoma na Gomora wakadicha wakaolokapfo, na walya waletsuhaa wakadichia mafumvuhu.

¹¹ Wakaduo masaa hose ha Sodoma na Gomora na shelya shawo shose, wakanndesia.

¹² Wakaduo na Loti, mana o manomae Abramu awei kulya Sodoma, na masaa hake wakasiia.

¹³ Mndu umu sa alekusheṟuopfo kahenda kashitsia Abramu ai Mwebrania mbonyi; Kiheri kyo Abramu nawekeri ikaa kufui na mashidi ha Mamre Mwamori; Mamre ai manomaye o Eshkoli na Aneri, nawo wawewode mbuya na Abramu.

¹⁴ Abramu kekiicho ke manomae ambado shidenyi kainengya waleu wake shisha walya walefeeyo kulya kanyi koke, wandu mahana haṟaṟu na ikumi na nyanya (318), kawaduo mṟasa Dani.

¹⁵ Kakuala nakapane nawo kio, o na masinga hake, kawakapa, kawawingia mṟasa Hoba, fui ora lo kumoso lo Damasko.

¹⁶ Nao kawihiṟa masaa hose, kawewihiṟa na Loti mana o manomae na masaa hake, na waka handu hamu na wandu.

Melikisedeki awikia Abramu ona

¹⁷ Abramu kekiwuya awuka ikapa Kedorlaoma na wamangi walya wawekulungie nao, mangi ya Sodoma kakure nahende imwambia kulya pichinyi lya Shawe, nalyo nyi pichi lya Mangi.

¹⁸ Na Melikisedeki mangi ya Salemu kaende mkate na mpfinyo, nao nawei mkohanyi o Ruwa ai huye mnu.

¹⁹ Kammbikia mboṟa, kahamba, Abramu nakewikio ona nyi Ruwa ai huye mnu, mowumba ruwehu na oruka.

²⁰ Kuadapfumo Ruwa chu ai huye mnu, alewika wakituwa wapfo mawokonyi hapfo. Abramu kamnenga kienga kya ikumi kya shindo shose.

²¹ Mangi ya Sodoma kawia Abramu, “Nenga inyi wandu-wo, na masaa ho nokudaaye iyo.”

²² Abramu kawia mangi ya Sodoma, “Njileiria owoko loko ko Mndumii, Ruwa Ai huke mnu, Mowika ruwehu na oruka,

²³ ke njechiduo orusu ma okowa lo shadupfo manya kindo kyose kii kyapfo-pfo, ulakoye omhamba, ‘Njilesuṟisha Abramu,’

²⁴ shile na shilya waleu walelya na kienga kya wandu walya waleoshana na inyi, woko Aneri, na Eshkoli, na Mamre, wo wakudae ohawi lowo.”