MAWOOKIONYI 12 - Bibilia Kui Mdedie fo Kimochi

Ruwa alaha Abramu nade oruka loke

¹ Mndumii kawia Abramu, “Kure kunu orukenyi lopfo iyo na wana wa mayo, na wa kanyi ko ndeo, nohende orukenyi sa njechikuloṟa;

² na inyi njechikutana iyo uwe mkambo fung'anyi na ikuwikia mboṟa na ing'anyisha rina lyapfo, na iyo nowe mboṟa:

³ Na inyi njechiwikya ona iwo wekuwikia ona, na ichu mokusesa njechimsesa; na ipfo kopfo iyo mbaṟi tsa wandu wa masangenyi wose wechicha iwikio ona.”

⁴ Nahong'u Abramu kawewuta chandu Mndumii alembawasa, Loti kaoshana nao. Nao Abramu nawei mndu o maaka makumi mfungade na itanu (75) mandi alewuka kulya Harani.

⁵ Abramu kaduo mka oke Sarai, na Loti mana o manomae na nzohoṟa tsawo wawewode, shindo shawo shose, na wandu walewona kulya Harani, wakakure wahende Kaanani, nawo wakaida na orukenyi lo Kanaani.

⁶ Abramu kaida makidi hawi ha orukalo mṟasa Shekemu handu haele; mṟasa mashidinyi ha More. Kiherikyo nlyo mandi na Wakanaani wawewode orukalu.

⁷ Mndumii kawonekia Abramu, kechihamba, “Njechiinenga luwa lyapfo orukalu.” Nao kawikia Mndumii chu alemchea kitaṟa kewikia kidaso.

⁸ Kiidima kakurepfo kahenda mṟasa fumvuhu lyii ora lo ngamenyi lo Betheli kawikapfo ihema lyake; Betheli ikawa ora lo kyukanyi na Ai ora lo ngamenyi, kawikiapfo Mndumii rasio, kaichikiapfo rina lya Mndumii.

⁹ Abramu kaengeṟa henda ora lo nuka ya Negebu.

Abramu orukenyi lo Misri

¹⁰ Nahongu kukawada njaa kulya orukenyi; Abramu kasoka na Misri, nakaepfo kya oweṟe; kyamba njaa ilerohia mnu kulya orukenyi.

¹¹ Kyasia wekishika kufui na Misri, kawia mka oke Sarai, “Ambuya, njiichi ke iyo ui mndu mka mcha ko kyamu,

¹² ili Wamisri, wechikuwona, wechihamba ichu nyi mka oke; naho wechinjiwaaha, na iyo wakude na moo.

¹³ Hoi uhambe ke, iyo nyi manowama, kiwe nanga koko inyi kipfa kyapfo, na inyi njikie moo kipfa kyapfo.”

¹⁴ Abramu kekishika Misri, Wamisri wakawona ke mkacho nyi ai mcha mnu.

¹⁵ Wasongoru wa Farao wakambona, nawo wakamwichika mnu ko Farao, naho mka ulya kadao kanyi ko Farao.

¹⁶ Nao kawutia Abramu sha wucha kipfa kyake; nao nawewode machondi, na mmbe, na nzoi, tsa kisoṟo na tsa kika, na masinga ha kiumi na ha kika, na ngamia.

¹⁷ Kyaindi Mndumii kakapa Farao na wa kanyi koke ngapo sa njiwawo, kipfa kya Sarai, mka o Abramu.

¹⁸ Nahong'u Farao kalaha Abramu kambia, “Nkiki iki onjiwutia? Nkili kulalenjiwia ke ichu nyi mka opfo?”

¹⁹ Nki ili ulehamba ichu nyi mshiki oko, ngatana ngamhaluo mka oko? Nahong'u wulalu aichong'u mka opfo nomwambie, nokuhendieng'u.

²⁰ Farao kawawasa wandu wake wawute Abramu na mka oke kulya orukenyi na orio kindo awewode.