MAWOOKIONYI 10 - Bibilia Kui Mdedie fo Kimochi

Oshari lo Noe

¹ Iki nkyo kishari kya wana wa Noe, Shemu, Hamu na Yafeti. Na kiidi kyawo kukafeo wana wa kisoṟo numa ya mfu fo mṟinga.

² Wana wa Yafeti nyi Gomeri, na Magogu, na Madai, na Yavani, na Tubali, na Mesheki, na Tirasi.

³ Wana wa Gomeri nyi Ashkenazi, na Rifati, na Togama.

⁴ Wana wa Yavani nyi Elisha, Tarshishi, Kitimu na Wadodani.

⁵ Kowo njoruka tsa mbai ya mṟinga tsa mkambo ya wandu tsilehawikana tsikawa njoruka tsawo, orio umu kui mdedie foke, kui mbaṟi tsawo, chandu mkambo iya iwekeri.

⁶ Wana wa Hamu nyi: Kushi, na Misri, na Putu, na Kanaani.

⁷ Na wana wa Kushi nyi Seba, na Havila, na Sabta, na Raama, na Sabteka. Na wana wa Raama nyi Sheba na Dedani.

⁸ Kushi kafee Nimrodi, kawooka iwa mndu ai ngohoda orukenyi.

⁹ Nawei ngohoda yelasa mando ha ngeṟenyi, oshangunyi lo Mndumii. Ko ikyo wandu wekehamba, “Cha Nimrodi, ngohoda molasa mando ha ngeṟenyi oshangunyi lo Mndumii.”

¹⁰ Mawokyonyi ha wuchili woke nyi wokia Babeli na Ereku na Akadi orukenyi lo Shinari.

¹¹ Kakure kulya orukenyi kashika Ashuru, kawika mṟi fo Niniwe, na Rehobothiri, na Kala;

¹² na Reseni, makidi hawi ha Niniwe na Kala, nafo nyi mṟi fung'anyi.

¹³ Misri kafee Waludi, na Waanami, na Walehabi na Wanaftuhi,

¹⁴ na Wapathrusi, na Wakasluhi, mpfo kundu Wafilisti na Wakaftori wawukie.

¹⁵ Kanaani kafee Sidoni, mana oke mmbe na Hethi.

¹⁶ Na Myebusi; na Mwamori na Mgirgashi,

¹⁷ na Mhivi na Mwarki, na Msini,

¹⁸ na Mwarvadi, na Msemari na Mhamathi. Numa mbaṟi ya Wakaanani wakahawanyika.

¹⁹ Mṟasa fo Wakaaanani fuwewokie Sidoni kya wohenda Gerari tane Gaza; na kya wohenda Sodoma, na Gomora na Adma, na Seboimu, tane Lasha.

²⁰ Iwo nyiwo wana wa Hamu kui mbaṟi tsawo, na mdedie yawo, orukenyi lowo, kui mkambo yawo.

²¹ Nao Shemu ichu ai ndee o wana wose wa Eberi, na wawaye o Yafeti kafee wana.

²² Wana wa Semu nyi Elamu, na Ashuru na Arfaksadi, na Ludi, na Aramu.

²³ Na wana wa Aramu nyi Usi, na Huli, na Getheri, na Mashi.

²⁴ Arfaksadi kafee Sela, Sela kafee Eberi.

²⁵ Kukafeo wana wawi wa kisoṟo ipfo, ko Eberi; rina lya ulya mmbee nyi Pelegi, kyamba mafiri halya hake oruka lulehaukana; na rina lya manomae nyi Yoktani.

²⁶ Yoktani kafee Almodadi na Shelefu, na Hasarmawethi na Yera,

²⁷ na Hadoramu, na Uzali, na Dikla,

²⁸ na Obali, na Abimaeli, na Seba

²⁹ na Ofiri, na Havila, na Yobabi. Iwo wose nyi wana wa Yoktani.

³⁰ Wakakaa wokia Mesha njienyi yehenda Sefari, fumvunyi lya ora lo ngamenyi.

³¹ Iwo nyiwo wana wa Shemu kui mbaṟi tsawo, na mdedie yawo, orukenyi lowo, kui mkambo fowo.

³² Itsi nyitso mbaṟi tsa wana wa Noe, kui wufee wowo, mkambonyi yawo, na kipfa kyawo mkambo ikahawikana orukenyi ili numa ya mfu fo mṟinga.