MAWOOKIONYI 1 - Bibilia Kui Mdedie fo Kimochi

Iwumbo lya wuyana

¹ Lya mbooko Ruwa ewumba ruwehu na oruka.

² Na oruka luwei lupfu luko wewa na lo wulya. Kuwehoiye na meema huye na kulawode ma kindo kyose. Na Mumuyo fo Ruwa fuwekuengeṟeṟye alya mṟingenyi.

³ Ruwa kahamba, “Kuwae sa!” Kukawaa sa.

⁴ Ruwa kawona sa iinjicha. Ruwa kaletsana sa na meema.

⁵ Ruwa kadeea sa rina nyi mfiri na meema kadeea rina nyi kio. Kukaila kukakya mfiri fukawa fo kuwooka.

⁶ Ruwa kahamba, “Kuwade maloalo makidi hawi ha mamṟinga.”

⁷ Maloalo halya hakaletsana mṟinga fukeri shia maloalo na mṟinga fukeri huye ya maloalo.

⁸ Maloalo halya kahalaha nyi Ruwehu. Kukaila kukakya mfiri fukawa fo kawi.

⁹ Ruwa kahamba: “Mṟinga fukeri shia ruwehu fuhende ikuwumbya handu hamu kukewonekaho handu hahadutsu.” Nakyo kikawekuwia kido.

¹⁰ Ruwa kalaha handu halya hahadutsu nyi Oruka; na alya handu mṟinga fukuwumbye nyi Ipalyipalyi. Ruwa kawona ke shii shicha.

¹¹ Ruwa kahamba: “Oruka luoṟe mmeṟa na shilimu shii na mbeu yasho na mashidi ha ndunda hai na mbeu yaho ipfo kiidi kya ndundatso” kikawewa kido.

¹² Oruka lukaoṟisha maṟa, shilimu shiwode mbeu, mashidi ha ndunda tsiwode mbeu ipfo kiidi kyatso; Ruwa kawona ke kii kicha.

¹³ Kukaila, kukakya mfiri fukawa fo kaṟaṟu.

¹⁴ Ruwa kahamba, kuwade shiende sa alya ruwehu sheletsana kio na mfiri, shiwewa sheloṟa shichano, na shiheri na mfiri na maka.

¹⁵ Shiwe shiende sa alya maloalo ha ruwehu na kunu orukenyi; kikawekuwiia kido.

¹⁶ Ruwa kawika shiende sa shiwi shing'anyi; Kilya king'anyi kichilie mfiri na kilya kitutu kichilie kio; kawika na nyenyeri-daa,

¹⁷ Ruwa kashiwika ipfo ruwehu shilimike orukenyi,

¹⁸ na ichilia mfiri na kio na iletsana sa na meema; Ruwa kawona shii shicha wyoo.

¹⁹ Kukaila kukakya mfiri fukawa fo kaana.

²⁰ Ruwa kahamba: “Mṟinga fuichuṟo nyi shindo shii na moo. Na malehe hawerunduka ipfo orukenyi shia maloalo ha ruwehu.”

²¹ Ruwa kawumba mando hai na moo hang'anyi ha ipfo ipalyipalyinyi na orio kindo kii na moo kyose shilya shawa mokuṟengutsa-ṟengutsa, mṟinga fukaichuṟo nasho, na orio malehe hose; Ruwa kawona shii shicha.

²² Ruwa kashiwikya ona kechihamba: Pfumbukenyi muengeṟeke muchuṟe ipfo ipalyipalyinyi, na malehe hafo kunu orukenyi.

²³ Kukaila kukakya mfiri fukawa fo katanu.

²⁴ Ruwa kahamba: “Oruka lualutse shindo shii na moo kui mbaṟi yasho, shuma na shindo shekukuruo wanda, na mando ha ngeṟenyi kui mbaṟi yaho.” Nakyo kikakuwia kido.

²⁵ Ruwa kawumba mando ha ngeṟenyi kui mbaṟi yaho, na shuma sha mba kui mbaṟi yasho; na orio kyose kekekukuruo wanda kui mbaṟi yasho; Ruwa kawona ke shose shii shicha.

²⁶ Ruwa kahamba: “Kyendenying'u luwumbe mndu kui ofano lodu; o mfananye fodu; wawechilia makunga ha ipfo mṟingenyi na malehe ha shia ruwehu na shumasho na orukalu lose, na orio kindo kekekukuruo wanda kyose.”

²⁷ Ruwa kawumba mndu kui ofano loke, nyi kui ofano lo Ruwa alewawumba; mndu msoṟo na mndu mka.

²⁸ Ruwa kawawikya ona, na iwawia, “Hendenyi mochifee muengeṟeke, muichuṟe masanga na ihaitoṟia; muchilie makunga ha ipfo mṟingenyi, na malehe ha ruwehu, na orio kii kiumbe kii na moo kii kunu orukenyi.”

²⁹ Ruwa kahamba: “Ambuyenyi, njimuinengye orio kilimu kya mbeu kii kunu orukenyi kose; na orio ikidi lyiwode mbeu kiidi kya ndunda shose shechiwa kelya kyanu.

³⁰ Na kelya kyamando ha kunu orukenyi; na kya malehe ha ruwehu; na kya orio kiwumbe kii na moo kekekukuruo wanda; maṟaho hose na shilimu, nyisho kelio kyanu.” Kikawekuwiia kido.

³¹ Ruwa kaambuya orio kindo alekiwumba, ate nyi shii shicha wyoo. Kukaila kukakya mfiri fukawa fo kaṟandaṟu.