MATAYO 9 - Bibilia Kui Mdedie fo Kimochi

¹ Naho kadoya alya ngalawenyi kaambada kacha na mṟinyi koke.

² Nao keambuya wakacha meendye mndu a muumu shiwungo a mlaṟe kitaṟenyi Na Yesu ambona kiidikyo kyawo kawia mndu ulya a muumu shiwungo, “Kewuyo nyi moo mana oko, madeko hapfo nyi hamewuto-ho.”

³ Naho kudi walosha wa wuwawaso walya maata wakadeda na mrima yawo wehamba, “Ichu nyi aruma Ruwa!”

⁴ Naho ili Yesu kewona mahio hawo kawawia, “Nyi kyaki muihia kiwicho mrimenyi konu?

⁵ Kipfa iki kii kyangu ihamba nyi kihya, ngesa nyi ihamba, ‘Madeko hapfo hamewuto-ho,’ anu nyi ihamba, ‘Kure uhende?’

⁶ Kya indi kundu muidime imanya kee Mana o mndu nyi awode pfinya kunu orukenyi yehooṟia madeko.” Amshika iya kawia ulya muumu shiwungo, “Kekure-ng'u uire kitaṟa kyapfo nohende kanyi kopfo!”

⁷ Nao kahoṟoka chimu, kahenda kulya mba koke.

⁸ Kyasia wandu walya wakeri-ho mamwingi wamewona wado wakaowuo wakang'anyisha Ruwa ainengye wandu pfinya ing'anyi ido.

⁹ Kyasia Yesu amewuka alya kaida mbele kawona mndu adamye alya kisanyonyi kya okamba, ewio nyi Matayo. Nao kambia, “Kenjo nooshane na inyi!” Nao kakure kahenda oshana nao.

¹⁰ Kikashika ili adamie kelya shelya ipfo mba, adi a iwa wasanyi wa okamba sa wafoi na wandu wanyamaṟi wakacha napfo wakadamya na Yesu na wa-kiloshyonyi kyake alya kilionyi kya shelya.

¹¹ Naho Wafarisayo wamewona wado wakacha iwia wa kiloshyonyi kyake, “A nyi kili mlosha onu alya shelya na wesana okamba na wetehya?”

¹² Kyasia ameicho wededa wado, nao kahamba, “Iwo wai wecha chiwo wawode weshiha mhangapfo, chila na iwo waluo.

¹³ Kekumbuonyi mutawuke imanya nyi kiki iki kii kihambe, Kindo njikundi nyi isaṟia ma chi idasapfo. Kipfa wandu njicheye ilaha ma chi iwo wa wusumuhanyipfo, chila na wandu wanyamaṟye.”

Kya Ikuotoya

¹⁴ Nalyo wa kiloshyonyi kya Yohane wakacha na handu ai wakahamba, “Nkili so lochekekwotoya na Wafarisayo, kya indi wa kiloshyonyi kyafo wakada walakwotoya?”

¹⁵ Na Yesu kawawia, “A wandu wa walinyi waidime iwado nyi fowa ili menyi-wali akeri nawo? Na kukae kushike mafiri iliindi menyi wali echiondwo kowo, nyilyo wechikwotoya.

¹⁶ Ma kuwode mndu echipfumya kidami kya nguwo njihya nakisanze na nguwo ya kachapfo, kipfa kilya kihya kyewuta-ho ikyo kiku na handu harandukye hakaengeṟa ing'ana.

¹⁷ Ma kwipfo mndu echiwika mvinyo fo kipfuo selelenyi njikupfo, kipfa kokoya awika-pfo selela-tso nyi tsechidwika na mvinyo fukapusukya wanda na selelatso tsikanyamaṟika. Indi mvinyo mhya nyi wefuletsya selelenyi njihya nasho shikakia shi shiwi.”

Maana o waka o mchili na mndu mka umu wachiṟo

¹⁸ Ili kewawia ado adi aichu mndu o wuitoṟi kacha naho kamolokya ndenyi kahamba, “Mana oko o waka wulalu anenuka. Indi ukucheye-wo nomhekye owoko lopfo naho nyi echiwada moo!”

¹⁹ Na Yesu kakure-ho wakaduana nao na wa kiloshyonyi kyake.

²⁰ Naho adi a ichu mka aluo iwuka samu kusiie-ho maaka ikumi na iwi, kimatsika amewoko. Kacha kya numa kapaya mambo ya nguwo yake.

²¹ Nyi ili alehia mrimenyi foke kahamba, “Ma ngapaya nguwo yake tupu na njechichia!”

²² Kyasia Yesu kaindukya numa kambia, “Kewuyo nyi moo manoko, kidikyo kyapfo kyamekukiṟa.” Naho mka ulya kachia kiwokia saa na iya.

²³ Naho Yesu amshika kulya mba ko mchili ulya amewona-pfo na walya wekapa mtoṟiṟo na mamingi fo wandu fofahya, kahamba, “Kekurenyi-ho, mana chu o waka ma chi apfiepfo, nyi alee mado.”

²⁴ Nawo wakamseka.

²⁵ Kyasia wandu walya wamidima ifuno, kaida na mba kambada owoko. Naho mana ulya o waka kahoṟoka.

²⁶ Na mbonyi tsilya tsikahenda dung'ana kulya orukenyi kose.

Wapfu meso wawi wachiṟo

²⁷ Kyasia Yesu ambuka alya naho wandu wawi wakacha numa yake, wai wapfu meso, wakairya ṟu wakahamba, “Kelusaṟye-wo wukiwa wodu iyo Mana o Dawidi!”

²⁸ Kyasia amiida na mba walya wapfu meso wakacha na handu ai. Na Yesu kawawia, “Na muweidikye ke na njechiidima iwuta iki?” Wakambia, “Ee-wo Mndumii!”

²⁹ Nalyo kapaya meso hawo kahamba, “Kiidikyo kyanu chando mwidikye na wudo mochiwona!”

³⁰ Meso hawo hakatambaṟuka. Na Yesu kawakekedya kahamba, “Ambuyenyi ma kulakae ma mndu echimanya ma umu!”

³¹ Kyasia nawo wakawuka-pfo wakahenda mduo ṟamba kulya orukenyi kose.

Yesu achira mndu awei pipi

³² Kyasia walya wechihenda kudi wakamendye mndu ai pipi awodo nyi mṟufu mbicho.

³³ Naho mṟufu fulya mbicho fomefuno, ulya ai pipi kawuya ideda. Na wandu walya wakeri-ho mwamwingi wakaṟihio wakahamba, “Kunu kidi kya Israeli kulemewoneke kindo kidopfo.”

³⁴ Kya indi Wafarisayo wakahamba, “Nyi mnene o mṟufu mbicho nyio awa mofuna nao mṟufu mbicho.”

Yesu asaṟia wandu

³⁵ Na Yesu kawa motengetatengeta kelosha kulya sinagogenyi tsawo kyechionguo mbonyi tsa sia tsa wumangi wo Ruwa kekiṟa na orio ndaṟe yose na wunyonge wose.

³⁶ Kya indi ili kewona wandu walya mamwingi nao kawalilia makulili nyi ili wai warohye wai wahutse wanda cha machondi halawode mlisi.

³⁷ Nalyo kawia wa kiloshyonyi kyake, “Shesambuo nyi shifoi indi weṟunda wakanyia-ho,

³⁸ Keterewenying'u Mndumii o kisanyionyi nadume waṟundi wafoi alya kisanyionyi kyake.”