MATAYO 8 - Bibilia Kui Mdedie fo Kimochi

¹ Kyasia kekisoka kulya fumvuhu wandu wakaduana nao mamingi sa fufoi.

² Naho adi a ulya mndu awodo nyi saka amcha naho kamolokya ndenyi kambia, “Mndumii kokukundya na ochiidima inyiheṟemtsa!”

³ Naho Yesu kahoṟwo owoko kampaya, kahamba, “Na ngakunda keheṟemka!” Naalyo li yenyi kaheṟemka saka iya imbode.

⁴ Yesu kambia, “Ambuya, kulawie ma mndu ma kindo! Kya indi uhende ikuloṟa alya ko mkohanyi nowewika na mwano chando Mose awawasye kiwe kiṟingishyo kyawo.”

Yesu achiṟa Isinga lya mchili Mroma

⁵ Kyasia amiida na kulya Kapernaumu, kukacha napfo mchili mnene o siṟi ya wasikari ihana.

⁶ Kamfuhya wukiwa kehamba, “Hoi Mndumii, msoṟo oko alee kulya kanyi atiliwanyi shiwungo-sho aiwawyo mnu iki kiwicho-wicho.”

⁷ Nao kambia, “Leka njiche njimchiṟe!”

⁸ Mchili ulya kamhaluo kambia, “Alewo Mndumii! Njii o wusumuhanyi notane oida ipfo shia mhamba ya kai lyakofo. Kya indi kuhambie-ho idedo tupu, na msoṟo cho oko nechichia!

⁹ Kipfa na inyi nyi nji mndu nji mwitoṟye nyi wuchili, indi na inyi na njiwode wasikari wai shi-ako. Na inyi njechiwia-ho ichu, ‘Henda!’ Nao kahenda. Ngawia ichu ungi, ‘Kenjo!’ Nao kacha. Ngawia na isinga lyako, ‘Henda wuta wuliwe!’ Nao kawewuta!”

¹⁰ Yesu amiicho ado kaṟihio, kawia walya ahendesanyi nawo, “Na kya lohi ngambia, ‘Ma kunu ko Waisraeli ndemewone iidikya linanyi lidipfo.’ Kya indi inyi ngambia,

¹¹ ‘Kukae kuche napfo wafoi wawuka kya kulya ora lo ngamenyi na kya kulya ora lo kyukanyi, wache damya kiliyonyi kya choonga na Abrahamu na Isaki na Yakobo ipfo wumanginyi wo Ruwa.

¹² Kya indi wana wa wumangi wedao nja wahende kumbo kulya memenyi fo kulya nja. Napfo kukae pfo ilia na iimadya ngamru.’”

¹³ Na Yesu kawia mchili ulya, “Kuhendye na chando oveidikya na wudo ochiwona!” Na msoro ulya oke kachia saa na iya.

Wandu wafoi wachiṟo

¹⁴ Kyasia Yesu amcha na ipfo mba ko Petro kawona mamka oke amlaṟe awodo nyi modo.

¹⁵ Nao kambada owoko, modo fukambuka. Kakure alyando avei mlaṟe, kawafurukanya.

¹⁶ Kyasia komshika ili kyukanyi wakamendye wafoi wawodo nyi mṟufu mbicho. Nao kafuna mṟufu mbicho na kidedo kya dumbu lyake. Na walya waiwawyo kawewakiṟa wose.

¹⁷ Nyi kundu kishike kilya kiwei kidede nyi mwikimbi Yesaya kahamba, “Nyio aleduo wunyonge wodu, kawekudika na mawawyo hadu.”

Wawaṟi iosha Yesu

¹⁸ Kyasia Yesu amewona wandu wache ikuwumbia nao mamwingi sa fung'anyi kawawasa wakiloshyonyi kyake wahende ambadya kya kulya ora lo kawi lo ipalyipalyi.

¹⁹ Naho kukacha nafo mlosha o mawawaso umu kambia, “Marya, njeoshana na iyo kundu omekuhendya kose!”

²⁰ Na Yesu kambia, “Mapaara nyi hawode mruma na shilehe sha ruwehu shikawewada sungu tsasho, kya indi Manomndu awode ma handu heonyonyia-pfo.”

²¹ Kyasia mndu o kiloshyo ungi kacha imbia, “Mndumii, kennenga momu fokuhendya iṟika mnying'a fo wande!”

²² Nao kambia, “Nde nooshane na inyi node wapfu wakuṟikye wapfu wawo.”

Yesu awawasa masinanu hatsie

²³ Kyasia amiidima idoya alya ngalawehu, wa kiloshyonyi kyake waka-mosha-pfo.

²⁴ Naho wadi ailu owira sa lwapfinya lukaida kulya ipalyipalyihu na ngalawa iya ikatana yashikyo nyi masinanu halya. Nao alee mado.

²⁵ Nawo wakacha horoka oo handu ai wakahamba, “Keluletse-wo hoi Mndumii, nyarisika lui!”

²⁶ Nao kawawia, “Nyi kili mui mudi waowu mui wandu wa idikya lyitutu?” Naho kakure katukya otanu na ipalyipalyi kukahutsa olele wyaa.

²⁷ Wandu walya wakaṟihio wakahamba, “Nyi mndu ada ichu, otanu na ipalyipalyi shikatana shamidikya?”

Yesu achiṟa wandu wawi wawodo nyi mṟufu mmbicho

²⁸ Kyasia amambadya kulya mataya kulya orukenyi lo Wagadara kawona wandu wawi wawodo nyi mṟufu mbicho wecha imkumbuhana wawuka mbangenyi kundu wapfu weṟiko wai walang'a mnu, ma mndu nalakarie iida na njia iya.

²⁹ Naho wakakalahatsa wakahamba, “Nyi kiki kyadu na iyo Mana o Ruwa? A nyi ucheye naho kiheri kyadu kilamshika kehenda tuuro?”

³⁰ Kyasia kukeri-fo poo lya nguwe sa tsifoi tsikeri kuleshe na kundu wakeri tsechilya mara.

³¹ Kyasia mṟufu iya mbicho ikamterewa-terewa ikahamba, “Kolufuna uludume-wo luhende lukwidye ipfo kiidi kya poo lyo lya nguwe!”

³² Nao kawawia, “Kuhendyenyi!” Naho kudi mṟufu iya ikawuka-fo, ikahenda ikaida kiidi kya poo lilya lya nguwe. Oweṟe cha ili, aili poo lyapufukaho pufu lyose likasoka na msaṟi fulya likakwolotsa kulya ipalyipalyinyi likapfa kulya mṟingenyi.

³³ Kyasia walisi walya wakadicha, wakahenda kulya mṟinyi, wakaongwo-pfo mbonyi tsilya tsose, na tsa wandu wawodo nyi mṟufu mbicho.

³⁴ Naho kudi awalya wandu wakakure mṟi fulya fose, wakahenda kumbuhana Yesu. Wamembona wakamterewa nawuke kulya mṟasenyi kowo.