MATAYO 7 - Bibilia Kui Mdedie fo Kimochi

¹ “Ma muladumbuo kyewonya mndu owingo muwone na kyanu kyedumbuo kido; kifa mdumbuye fulya modumbuo, na kyanu na wudo kyechudumbuo!

² Na wudo kiheo kilya moheshia wengi, na wudo na kyanu.

³ Aiyo, nki ili okeambuya kinana kii risonyi lya manomayo na iyo kulawonyi mriti risonyi lyapfo iyo?

⁴ Anu nyi wuda ochiidima iwia manomayo, keleka njikueke iwuta kinana risonyi lyafo, ate na iyo aifo mriti risonyi lyapfo?

⁵ Lyo mkulembetseṟi, kemesonguo ikuwuta mriti risonyi lyafo nomanyeng'u yambuo nowute kinana kii risonyi lya manomayo!

⁶ Ikyo kii-kyele ma mlakumbie makite, na mṟao fonu fo kiweṟe ma mlakumbie nguwe fuchumo-chumo nyi madende hatso numa tsifurumie ihaluka tsimtufuo-tufuo.”

Terewenyi, kapekapenyi mongo

⁷ “Keterewenyi, nyi mochiinengo kepfulenyi nyi mochiwona, kekapekapenyi mongo nyi mochifunguyo.

⁸ Kifa moterewa nyi einengo, na mopfula kawewona, na mokapakapa mongo kawepfunguyo.

⁹ Ang'u kunu kidi kyanu nyiu aipfo mana kamterewa kando nao namnenge iho?

¹⁰ Ang'u kamterewa ikunga, namnenge njoka?

¹¹ Kyasia nyo mui wawicho kokooya na mochiidima iinenga shiwana shanu shiinengo shicha, aka-wo Nde-anu o ipfo ruwehu chi echiengeṟa imwinenga shicha ili momterewa?

¹² Kyasia orio kindo kyose chando mukundi muwutio nyi wandu, nanyo kewewutienyi mudo, cha kifa nyiho mapfundo ha wuwawaso na waikimbi.”

Kichumi kisise

¹³ “Keidenyi alya kichuminyi ki kisise, kifa nyi kuipfo kichumi kikualiye na njia yakyo njilandari, kitsitsionyi kyayo nyi kidekionyi, na weida napfo nyi wafoi.

¹⁴ Na wudo kuipfo kichumi kya kiṟoṟowo na njia nyi njisise, nayo nyi yekooya moonyi na wandu wechiiwona nyi-sa waangu.”

Ikidi lyemanyika kui ndunda

¹⁵ “Kekuṟisenyi na waikimbi wa wongo weecha na konu waṟee makata ha machondi indi ipfo kidi nyi wai mashite ha ngeṟenyi malang'a.

¹⁶ Nyi mkao yawo mochiwamanya nayo, Alae na ochiidimma ihaa ndunda tsa msabibu oshehu, na nduonyi na ochidima ihaa ho makuyu heloda?

¹⁷ Nyi wudo mdi mcha nyi fechikumbia ndunda njicha, na mdi mbicho fukawekumbia ndunda njiwicho.

¹⁸ Ma kuifo ikidi licha lyechiidima ikumbia ndunda njiwichopfo, ma ikidi lyiwicho lyechiidima ikumbia ndunda njichapfo.

¹⁹ Orio ikidi lyose lyada lilakumbia ndunda njicha, nyi lyechimanyo na ihenda ikumbo modonyi.

²⁰ Kyasia nyi wudo kii, nyi mawuto hawo mochiwamanya naho.”

Njimwichi-pfo

²¹ “Ma chi orio mndu ose monjiwia, ‘Mndumii Mndumii echiida wumanginyi wo Ruwapfo, shile nyi ichu mowuta shichihianyi na Wande o ifo ruwehu!’

²² Kipfa mfiri fulya nyi kochikaapfo wafoi wenjiwesa wehamba, ‘A Mndumii, Mndumii, chi lulehamba shisuku kui rina lyafo, na rina lyafo lukawefuna nalyo waṟufu wawicho, na rina lyafo lukavetana nalyo maṟunda manene?’

²³ Indi inyi nyi njechiwawia na pata njihambe, ‘Njilememmanye-nyofo, kenyiwukenyi mui wandu muwutie sha mkika!’”

Wewika mba wawi

²⁴ “Kyasia, mndu akeri-pfo ma o ku ma o ku, ichu echiadanya madedo hako na ihawuta kawehawuta, nyi afananyi na mndu awode wuṟango wucha alewika mba yake kundu kukualie iho.

²⁵ Naho mvuo ikaoloka, mamṟinga hakasoka, njotanu tsikakuma tsikakapa mba iya ilaho, kipfa lyandi iwenjiilike handu hakualye iho.

²⁶ Kyasia na ichu aipfo ma o ku ma o ku moadanya madedo hako kada alahawuta, nyi afananyi na mndu tondo alewika mba yake ko teri ya kimamile.

²⁷ Naho mvuo ikacha, mamṟinga hakasoka, na njotanu tsikakuma tsikakapa mba iya, nayo ikawunduka wundu, na mbundukie foyo fukawa fo kiṟiha.”

Pfinya ya Yesu

²⁸ Yesu ammaa ideda madedo-ha, mamwingi fulya fo wandu fuwekeri-ho fukawuko nyi madima kifa kya mloshie fulya foke, chando aweilosha.

²⁹ Kikawa cha mndu awode pfinya, kilawe cha kya walosha wa wuwawaso.