MATAYO 6 - Bibilia Kui Mdedie fo Kimochi

Itarama wakiwa

¹ “Kekuṟisenyi mulawone mochiwuta sha wusumuhanyi wonu oshangung'u lo wandu muwonyo nyiwo; mulakuṟise mudo, ma mochiwona-se kya woṟunda wonu ipfo ko Nde-anu o ruwehupfo!

² Na iyo koshika ilekia shindo shapfo shesaṟia, ma kulakape ombe lukusongoye chando makulembetsere halya hekewuta wai ifo sinagogenyi ipfo kikumbuhananyonyi kya njia tsa mṟinyi nawo nyi kundu waṟumisho nyi wandu! Nyi kya lohi ngambia, ‘Wo walemmaa iduo kya woṟunda wowo!’

³ Kyaindi iyo koshika ilekia kindo kyesaṟia, ma kuwoko kopfo ko kumoso kulamanye ikyo ko kulyo kindo kukeri iwuta.

⁴ Kundu isho shapfo shesaṟia shiwe sha kiṟika; na Ndeo ichu echiwona kiṟikenyi nakutae amonyi.”

Kiterewo

⁵ “Ma iterewa na wudo; ma mlawe cha makulembetseṟe halya! Wo nyi wakundi iterewa wahoṟoki ipfo sinagogenyi na alya kikumbuhananyo kya njia tsa mṟi kundu wakuloṟe na wandu. Nki lohi iki njiimbia wo walemmaa iduo kya woṟunda wowo!

⁶ Indi iyo koshika iterewa, ida na ipfo kiṟihenyi kyapfo kya kiidi uweshinga na mongo, notereweng'u Ndeo ui ipfo moowionyi; na Ndeo-chu echiwona na moowionyi na ekaa nakutae.

⁷ Ili mwiterewa, ma mulakape-kape ata kwi mbaṟi ya wahenu; kipfa nyi wakusaṟie kulako kindo wechiadanyio nyi maanuka yawo ya ata!

⁸ Ma mlafanane nawo! Kifa Ndeanu o ipfo ruwehu na aichi shilya muwuṟie ma ili mulamemterewa.

⁹ Indi terewenyi mule, ‘Nde-yadu ukeri ipfo ruwehu, Rina lyafo litano yele.

¹⁰ Wumangi wopfo wuche. Isho ukundi chando shekewutika kulya ruwehu, na kunu orukenyi shiwewa shido.

¹¹ Kando kadu kalufoi uluinenge inu.

¹² Uludeye sile tsṞafo luwode, chaso luwedeya wasile wadu.

¹³ Ma ulaluduo kitewionyi indi ulukiṟe shindo shiwicho!

¹⁴ Kipfa komkoya nyo mokehooria wandu, na Nde-anu o ipfo ruwehu na echeemhoṟia nyo.

¹⁵ Indi nyo mkada mlahoṟia wandu shilya walemdekio, ma Nde-anu o ipfo ruwehu echimhooṟia-nyofo.’”

Ikuotoya

¹⁶ “Nanyo mkashika ikuotoya, ma mulakufananyishe na makulembetseṟe-ho hekesuruwanyisha masineeri kipfa nyi wekeshimbiṟa shamu kundu wakuloṟe na wandu. Nyi kya lohi ngambia, wo walemmaa iduo kya woṟunda wowo.

¹⁷ Indi koshika ikuotoya, shia mdo-fo mafuda, na oshangu lopfo nowesanja!

¹⁸ Indi, ma kulakuloṟe na wandu ili ukuotoye shile na ko Ndeo o kiṟikenyi na Ndeo-chu echiwona sha kiṟika na ekaa nakutae.”

Kisa ruwehu

¹⁹ “Ma mulakusuṟumie shisa shanu kunu wuyana kundu mui handu kiwiro na ngama shechinyamaṟa kuwewode na manyinyi heiwa.

²⁰ Kyaindi surumenyi shisa shanu kulya ruwehu kundu kulawode shiwiro ma ngama, ma manyinyi halechiidima iiwa.

²¹ Kundu handu uṟikie kisa kyapfo, na mrima fuwekaa-ho.”

Sa ya mbihu

²² “Kiinengie mbihu sa nyi riso; na riso komkoya nyi licha, na mbihu fose nyi fochiwa sa.

²³ Kyaindi komkooya riso liiwicho, mbihu da na fochiwada meema fose. Kyasia na sai ii na iyo kommbona yamhaluka meema, apa ṟimbaha lya imema lilemie.”

Ruwa na Masaa

²⁴ “Kwipfo mndu echiidima ifuṟukanya wanene wawipfo; kipfa kumu nyi echisuo ulya umu, nakunde ulya o kawi; ang'u nahalukie ichu, nainyale ulya ungi. Ma mochiidima isanza mupfuṟukanye Ruwa hamu na Mamonapfo.”

Makusaṟo

²⁵ “Kyasia, kyamba nyi wudo na inyi nyi ngambia, ‘Ma mulawado nyi makusaṟo kya moo yanu kya kindo mochilya, anu kya mbihu yanu kindo mochiṟaa Aka moo chi fung'anyi fukaida kando; na mbihu cha fuweidie nguwo?

²⁶ Keṟisenyi ma shilehe sha ruwehu shilekekumba mbeu ma isanya shikumbinyi indi nyi Nde-anu ipfo ruwehu ekeshiinenga shelya; aka nyo chi mushing'anyie.

²⁷ Ale? Kunu konu nyiu aipfo echidima yengeṟa wuku woke wuengeṟeke handu ha oweṟe lo mkonu fumu ma ikusaṟa ikyo?’

²⁸ A nguwo tseraa nyi kiili muwodo mudo nyi makusaṟo kyatso? Kyeṟisenyi ipfo shiwaṟonyi sha mbaṟi tsose sha manjawuhenyi; shekewina na iyoka nguwofo.

²⁹ Indi nyi ngambia ke, ma Solomon na wusuṟi woke wose awemṟike chasho ma kimu-hopfo!

³⁰ Kyasia, komkooya mara ha njawuhenyi hakeri-ho inu na ngama hakahenda ikoṟio mawiwenyi, komkooya Ruwa nyi ahachopie ado, aka nyo mui mudo na kiidikio kitutu, kyanu chi kikiengere?

³¹ Ori muwado nyi makusaṟo muhambe, a kindo lochikulia ang'u kindo lochikunyooya nyi kiki; ma kya mbihu yanu kindo mochikuṟaaya.

³² Kifa isho shose nyi wandu wa mbaṟi njihenu wekeshilalakia; indi Nde-anu o ipfo ruwehu na aichi ke nyi kimuwaṟi ishiwona.

³³ Kyaindi songuonyi ilalakia wumangi wo Ruwa na wusumuhanyi wowo, na shingi nyi mochiinengo cha shannga.

³⁴ Kyasia, ma mulawado nyi makusaṟo ha kya ngama, kipfa ngama nyi yesaṟa kyayo injenyi Orio mkonu nyi fui na kyafo nahong'u.”