MATAYO 28 - Bibilia Kui Mdedie fo Kimochi

¹ Kyasia mfiri fo Sabato fomiida ili kokya kushikye mfiri fo kuwoka fo mfungade nalyo Maria o kulya Magidala wakacha na Maria ulya ungi wakahenda sahia opanga lulya.

² Naho kudi a iki kiding'ashi kyaida-ho sa kiapfinya. Nyi kipfa msu o Mndumii alesoka awuka ipfo ruwehu.

³ Na fana yake kafana cha mbawa, na nguwo tsake tsikaila weṟu cha makuṟeṟa.

⁴ Na kipfa kya wowu, walya weringa-ho wakadosa mtara wakawa cha wapfie.

⁵ Kyasia msu ulya o Ruwa kahaluo kawia waka walya, “Ma mlawone mochiowuo. Na njichi nyi mukeri ipfula Yesu ichu awei mbambye msalabehu.

⁶ Nakeri iyapfo. Nyi amṟuka na chando alewehamba. Njonyi muambuye na handu awemlaṟe.

⁷ Na ihenda mkambiṟe ihenda owinyi mkewia walya wa kiloshyonyi kyake ke nyi amṟuka awuka ko wapfu. Ambuyenyi nyi echimsongoya nahende kulya Galilaya. Mpfondo mochimbona. A ikyo-ng'u ngambia-ng'u.”

⁸ Nawo wakakambiṟa ikure owinyi alya opangenyi wawodo nyi wuowu wusanganyi na sia. Wakadicha wakahenda yongoya walya wa kiloshyonyi kyake.

⁹ Naho wadi a ichu Yesu acha wakumbuhana kehamba, “ngamwiṟikiṟa.” Wakacha naho wakambada madende wakamolokya ndenyi.

¹⁰ Nalyo Yesu kawawia, “Ma mlaowuo! Kehenda ongoyenyi wanawawama wahende kulya Galilaya. Mpfondo wechinjiwona.”

Mbonyi ya mringi o ṟungu

¹¹ Kyasia warie njia yehenda kudi a walya wandu wa kiringo maata-ho wakacha na kulya mṟinyi. Wakahenda yongoya wakohanyi walya wanene shindo shilya shawutika shido shose.

¹² Wakasanza handu hamu na wasongoru wakadeda kyama. Wakainenga wasikari walya rupia tsingiki.

¹³ Wakahamba, “Hambenyi nyi walya wa kiloshyonyi wacha na kio wakamiwa-ho lulee mado.

¹⁴ Nakyo kokoya kemanyikya ma ipfo ko mchili moitoṟya oruka na lochimanjaṟya-nja-ṟya luwembonya ikukaya kipuo.”

¹⁵ Nawo wakaduo rupia tsilya wakahenda wuta chando waa waloshe. Na idedo li likahambo ipfo kiidi kya Wayuda likadung'anana likashika itane inu.

Yesu akuloṟa ko wakiloshyonyi

¹⁶ Kyasia walya ikumi na umu wa kiloshyonyi wakahenda kulya Galilaya kulya fumvunyi kundu Yesu awewawawasye.

¹⁷ Wakambona wakamolokya wanda na walya maata wawodo nyi mkeukeu.

¹⁸ Na Yesu kacha na alyando wai kadeda nawo kahamba, “Nyi njimnengye pfinya yose ya ipfo ruwehu na ya kunu wuyana.

¹⁹ Kyasia kehendenying'u mukehaluo mkambo ya wandu yose wawe wa kiloshyonyi kyako muwewapatisya rina lya Wande na Mana na Mumuyo Mwele.

²⁰ Mbewalosha wakae na mbonyi tsilya njimbawasye tsose. Nahong'u ambuyenyi njii nanyo mafiri hose na kuwede kushike ili masiyonyi ha wuyana.”