MATAYO 27 - Bibilia Kui Mdedie fo Kimochi

¹ Kyasia komshika ngamenyi wakohanyi wanene wakadeda kyama wose na wandu wasongoru wa oruka kya Yesu chando wechimbutya opfu.

² Wakampfunga wakamduo wakamdambikya ipfo ko mchili ulya o oruka Pontio Pilato.

Opfu lo Yuda

³ Na Yuda ulya amdambikye-ho ili ambona nyi ambutyo owingo, nalyo kawuya iwado nyi mchenyeṟe. Rupia tsilya makumi haṟaṟu awemnenge katsiwihiṟya wakohanyi walya wanene na wandu walya wasongoru.

⁴ Kahamba, “Ngamnyamaṟa lyandi njiledambika-ho samu ilai na mti.” Nawo wakahamba, “Nyi kii-se kida naso? Ambuya iyo kumonyi.”

⁵ Nao kakumba rupia tsilya kulya hekalunyi. Kasheṟuka-pfo. Kahenda ikuotsuo.

⁶ Kyasia wakohanyi walya wanene wakaira rupia tsilya wakahamba, “Chi kisumuhanyi lutsiwike ipfo kisenyi keṟika shindo sheinenga Ruwapfo kyamba nyi wuhuru wo samu.”

⁷ Wakadeda kyama wakahuṟa natso dema lilya liweho lya mndu mowumba nungu. Wakalihuṟa lyeṟika mnying'a ya wahenu.

⁸ Nakyo kikainenga dema lilya likadeo rina nyi dema lya samu itane inu.

⁹ Nalyo kilya kii kidede nyi mwikimbi Yeremia kikahoya-ho kido kehamba, “Nyi waleduo rupia tsilya makumi haṟaṟu tsii wuhuru wohuṟa ichu amambie wuhuru woke chando wushikye ichu wana wa Israeli waleambuya wuhuru chando ashikye.

¹⁰ Wakatsiwika tsehuṟa dema lya mndu mowumba nungu na chando Mndumii awenjiwawasye.”

Pilato awesa Yesu

¹¹ Kyasia na Yesu awehoṟoki ipfo oshangunyi lo mchili moitoṟya oruka. Na mchili kambesa kahamba, “Iyo nyi mangi ya Wayuda?” Yesu kahamba, “Nakyo ohamba.”

¹² Na ili kekumbo nyi wakohanyi walya wanene na wandu wasongoru ma nalahaluo kindo.

¹³ Nalyo Pilato kambia, “A nyi kulaichuo ishi waikukumba-ho nasho sa shifoi?”

¹⁴ Nao ma nalamhaluo ma kidedo ma kimu.

¹⁵ Itane mchili ulya moitoṟya oṟuka arihio mnu kyasia kya mchili ulya moitoṟia oruka ilyi kui mfiri mnene nyi echipfunguya wandu mndu ampfunge umu-ho ichu wechimkunda-ho.

¹⁶ Na mandi halya kuwewode mndu mpfunge umu ahendye ṟamba, ewio rina lyake nyi Baraba.

¹⁷ Kyasia wamidima isanza kundu kumu Pilato kawawia, “Nyi uhya mokunda njimfunguye, ngesa nyi Baraba a ngesa nyi Yesu chu ewio nyi Kristo?”

¹⁸ Nyi kifa lyandi aichi ke kindo wacha mdambikya-ho na wunyenyi.

¹⁹ Kyasia ili adamye alya loṟike-hu lodumbuya mondu, mka ulya oke kamdumya ndumi kahamba, “Ma kulawone kochilungyaho kyapfo na mndu chu o wusumuhanyi. Nyi kifa ngawona wukiwa wufoi inu kilodyonyi kipfa kyake.”

²⁰ Na wakohanyi walya wanene wasanganyi na wandu wasongoru wakahaaya wandu kundu wechi-terewya Baraba, na Yesu wamdetse.

²¹ Kyasia mchili ulya moitoṟya oruka kahaluo kahamba, “A wandu-wa wawi nyi uhya-ho mokunda njimfunguye?” Nawo wakahamba, “Nyi Baraba!”

²² Pilato kawawia, “A Yesu, ichu amhambe nyi Kristo kyake njimbike-ng'u njida?” Wakahamba handu hamu wose, “Nawambyo msalabehu!”

²³ Nao kahamba, “A nkiki kiwicho alewuta?” Wakaengeṟa ifahya wakahamba, “Nawambyo msalabehu!”

²⁴ Kyasia ili Pilato alewona alaidima iwuta-ho kindo na kitohyo kya wandu nyi ihenda keng'ana mnu kii, nao kahamba, “Inyi njii mharami na samu ya mndu-chu o wusumuhanyi. Ambuyenyi kyanu nyo!”

²⁵ Naho wandu wakahaluo mhaluye fumu wose wakahamba, “Samu yake na ilusoke so na wana wadu.”

²⁶ Nalyo kawapfunguya Baraba. Na Yesu kasonguo imkapa na ngowa itso tsii njitochye msha. Kawuya kamdambika-ho nahende wambyo msalabe-hu.

Wasikari wataluo Yesu

²⁷ Nalyo wasikari wa mchili ulya moitoṟya oruka wakaduo Yesu mṟinyi kundo wasikari wekekaa. Na siṟi ya wasikari ikacha ikuwumbya nao yose.

²⁸ Wakambuta nguwo. Wakawuya wakamṟika nguwo ya mawoko ifanyi king'aring'ari.

²⁹ Wakaoka oṟo ya msha wakamṟika ipfo mdonyi koke. Wakamnengia na iṟeṟe ipfo owokonyi loke lo kulyo.

³⁰ Wakampfirya ndi wakamtaluo wehamba, “Lokuiṟikiṟi iyo mangi ya Wayuda.”

³¹ Wakamiselya mnyeri. Wakawada iṟeṟe lilya wakamkapa nalyo ipfo mdonyi foke. Wakamduo nahende wambyo msalabehu.

Yesu awambyo msalabehu

³² Warie njia yehenda wakawona mndu awuka kulya Kirene ewio nyi Simon. Nawo wakamitikya nakudike msalaba fulya foke.

³³ Wamidima shika kulyando kui kulahe nyi Goligota nakyo nyi kimu na ihamba nyi mbuonyi.

³⁴ Wakamnenga mwinyo fumsangane na mṟinga fo nduu nanyo. Amefusaha nalakunde inyo.

³⁵ Wameidima imbambya msalabehu wakahawana nguwo tsilya tsake wewika kuṟu kuhya.

³⁶ Wakadamya-ho wemringa.

³⁷ Na oo huyaa mdo foke wakaṟehya-ho kya owingo loke. Ke ichu nyio Yesu ai mangi ya Wayuda.

³⁸ Nalyo kuiho weala njia wawi wakawawambya msalabehu handu hamu nao. Ulya umu kakaa oo ora lo kulyo na ungi kakaa oo ora lo kumoso.

³⁹ Na walya waida-ho wakamruma wesingitsa-singitsa mdo yawo.

⁴⁰ Wakahamba, “Kui mosanja hekalu koliwika lya kawi mfiri iṟaṟu likawa kekukiṟe-ng'u kumonyi; kokoya na uwekeri Mana o Ruwa kesoka-ng'u kunu msalabehu!”

⁴¹ Na wakohanyi walya wanene warianyi na walosha wa mawawaso na wandu wasongoru na wudo wakawemtaluo wakahamba, “A lyandi alekiṟa wengi nalaidime ma ikukiṟa-ng'u amonyi.

⁴² Chi ai mangi ya Israeli nakesokang'u kunu msalabehu naso lumidikye!

⁴³ Nyi awekusirye na Ruwa nakemashuong'u-ho kokoya nyi amkundi. Nao nyi alehamba nyi ai Mana o Ruwa?”

⁴⁴ Na walya weala njia walya wai wawambye msalabenyi handu hamu nao wakawemruma wado.

Yesu apfa

⁴⁵ Kyasia kuwokia saa ya kaṟandaṟu kukaho meema kulya orukenyi kose fukashika saa kenda.

⁴⁶ Kukeri kufui na saa kenda Yesu kalaha na ṟu ling'anyi kehamba, “Eli Eli lama sabakitanyi?” Kii cha ili kehambo, “Ruwa oko, Ruwa oko, nkili onjidea?”

⁴⁷ Na wandu wahoṟokia-ho walya mata wameicho kechihamba ado wakahamba, “Nyi ailaha Elia.”

⁴⁸ Naho kudi ulya umu-ho kahenda kedicha, kaende kindo keonga mṟinga. Kakiichuṟa mṟinga fotarang'aa. Kawika iwale-hu kamrutsa nalyo.

⁴⁹ Na walya wengi wakahamba, “Leka luambuye Elia kokoya na echicha nache imkira.”

⁵⁰ Kyasia Yesu amidima ilaha lya kawi na ṟu ling'anyi-se nalyo kalekya moo.

⁵¹ Nalyo ambuya, isulia lilya lyeshingya ipfo hekalunyi likaranduka ipfo makiidi hawi liwuka tsindenyi likapahukya mdonyi. Na wanda ikadedema na maho-ho manene hakapaṟika.

⁵² Na ipfo mbangenyi kundu mnying'a imṟike kukaṟuhuka. Na mbihu ya wandu waele wafoi walemepfa kacha ikaṟuka.

⁵³ Wakakure kulya mbangenyi kundo wawei waṟike. Na ili numa amidima iṟuka wakacha na kulya mṟinyi mwele wakakuloṟa na wandu wafoi.

⁵⁴ Kyasia mchili ulya o siṟi ya ihana wakeri-pfo na walya weringa Yesu wamidima iwona kiding'ashi kilya kyaida-ho na shindo shilya shawutika wakaowuo mnu wakahamba, “Na lohi ichu nyi awekeri mana o Ruwa.”

⁵⁵ Kyaindi nyi kukeri-ho na waka sa wafoi wechiambuya-ho wai kuleshe. Nyi walya wechioshana na Yesu wawuka kulya Galilaya kundu wempfuṟukanya.

⁵⁶ Na ipfo kiidi kyawo nyi kukeri-pfo Maria o kulya Magidala na Maria chu mae o Yakobo na Yosefu, na mae o wana wa Sebedayo.

Yesu aṟiko

⁵⁷ Kyasia ili kushikye kyukanyi kukacha napfo mndu msuṟi awuka kulya Arimatia, ewio rina lyake nyi Yosefu. Nao nyi awekeri mndu o kiloshyonyi kya Yesu.

⁵⁸ Nyio alehenda kulya ko Pilato kamterewa mnying'a fulya fo Yesu. Nalyo Pilato kawawasa nahende fuinengyo.

⁵⁹ Na Yosefu kaduo mnying'a fulya. Kafuorowia nguwonyi tsa owiṟo tsikengemae.

⁶⁰ Kahenda fuṟika rungunyi lyake lihya lilya atorongochye kulya ihonyi. Amiidima ipiṟimitsya iho sa inene oo momu-hu fo rungu lilya kakuhendya.

⁶¹ Indi alya kuweiho Maria o kulya Magidala warianyi na Maria ulya ungi wadamie oo sumuhana na rungu lilya.

Mringi o ṟungu

⁶² Kyasia ili ngamenyi ya ili lya ngama lyeituma mfiri fulya foṟeheṟa kukasangana wakohanyi walya wanene na Wafarisayo ipfo ko Pilato.

⁶³ Wakahamba, “Mndumii, lombuya ikumbuo mlembi ulya, lyandi i na moo, ke nyi alehamba, njetiṟa mfiri iṟaṟu njiwuye iṟuka.

⁶⁴ Kewawasa-ng'u-wo opanga lulya luhende iringo itane mfiri fo kaṟaṟu. Walya wa kiloshiyonyi walawone wechicha imiiwa-ho. Wawie na wandu, ke nyi amṟuka awuka ko wapfu. Na wulembi wo wofurumya wuwone wochiwichuo wuide na wulya wo kuwoka.”

⁶⁵ Pilato kawawia, “Kiringo kyeringa-ho na mochiwona. Kekuhendyenyi muteesye-ho chando mbeichi muwenyi.”

⁶⁶ Wakahenda wakateesya opanga lulya wakawika kiṟingishyo kiwode ofano lowo alya ihohu kukeri-pfo na kiringo kilya.