MATAYO 26 - Bibilia Kui Mdedie fo Kimochi

¹ Kikawa Yesu ammaa ideda madedo halya hose naho kawia walya wa kiloshyonyi kyake,

² “Na muweichi ke komtiṟa-se kawi ili lya kaṟaṟu nyi lyelya Pasaka. Na Manomndu nadambiko nahende wa-mbyo msalabenyi.”

³ Nalyo wakohanyi walya wanene wakasanza handu hamu na wasongoru wa ipfo wandunyi wakasanzia alya osehu lo mkohanyi mnene ulya ewio nyi Kayafa.

⁴ Wakadeda kyama chando wechiwada Yesu kui mtambo na imbaha wambahe.

⁵ Wakahamba, “Ma chi ili lya mfiri mnenepfo kuwone kochiamka kituṟu wandunyi.”

Yesu ashio mafuda kulya Betanyia

⁶ Kyasia Yesu akeri kulya Betanyia ipfo mba ko Simon ulya awewodo nyi iwawe.

⁷ O handu ai kukacha napfo mka arie chupa ya Alabasiteronyi iwode mafuda ha wuhuru wung'anyi. Kacha kampusuya oo mdonyi adamie ipfo kilionyi kya shelya.

⁸ Kyasia walya wa kiloshionyi wekiwona kiwe kido wakasuo wakahamba, “A kindo-ki kyadetsyo kido wanda nyi kyaki?

⁹ Nakyo nyi kiwechi idima ihenda ikumbo kya wuhuru wung'anyi na iinenga wandu wakiwa.”

¹⁰ Yesu kamanya nyi waihamba wado kawawia, “Itane mowinyisha-winyisha mkachu nyi ki? Nyi kipfa nyi kindo kicha anjiwutia.

¹¹ Wandu wakiwa nyi mochikaa nawo mfiri yose, kyaindi kyako inyi mochikaa na inyi mfiri yosepfo.

¹² Nyi kipfa ili anjipusuya mafuda-ha kunu mbihunyi koko nyi anjiwutia kya ihenda ṟiko.

¹³ Nyi kya lohi ngambia, ‘Orio handu hose komeongoyo ndumi ii ya sia kunu orukenyi na kyake anjiwutie napfondo kyehambo kundu nakumbuo-pfo.’”

Yuda aṟiingia Yesu

¹⁴ Nalyo umu akeri o ipfo kiidi kya walya ikumi na wawi ewio rina lyake nyi Yuda Iskariote kahenda ipfo ko wakohanyi walya wanene.

¹⁵ Kahamba, “Nyi kiki mokunda injiinenga na inyi njimueke imdambika konu?” Wakamteṟya-ho kiheo kya rupia makumi haṟaṟu.

¹⁶ Kuwokia-lyo kawa mopfula mwaanya chando echimdambika.

Yesu alya kilaayo kya Pasaka hamu na wakiloshyonyi kyake

¹⁷ Kyasia ili kushikie mafiri halya helya mkate ilamtarang'ashe ili lya kuwoka nalyo walya wa kiloshyonyi wakacha na alyando Yesu ai wakahamba, “Nyi ku ukundi luhende ikusungusya shelya sha Pasaka?”

¹⁸ Nao kahamba, “Kehendenyi ipfo mṟinyi ko mang'anya. Mumbie, Maaria akuwia, ‘Kiheri kyako kyamshika kufui.’ Nyi kunu kopfo njewuta mṟumo fo Pasaka na iwo wa kiloshyonyi kyako.”

¹⁹ Na walya wa kiloshyonyi wakahenda iwuta chando Mndumii awawasye. Wakasungusia Pasaka.

²⁰ Kyukanyi komeila wakacha damya kilionyi kya shelya na walya ikumi na wawi wa kiloshyonyi.

²¹ Wechilya shelya kahamba, “Nyi kya lohi ngambia, umu o kunu kiidi kyanu echinjidambika-ho.”

²² Nawo wakasokyo mnu nyi fowa ing'anyi wakadeda nao kui umu kui umu wehamba, “A ngesa nyi inyi Mndumii?”

²³ Nao kahaluo kahamba, “Nyi icho njechisotsya nao owoko ipfo kitelenyi nyio echinjidambika-ho.

²⁴ Mana o mndu ihenda na ahende chando kiwei kiṟehye kyake. Kyaindi ochia nyi lo mndu ulya echidambika-ho Manomndu. Iki nyi kiwei kicha-ho nokoe mndu ulya alalefeo.”

²⁵ Kyasia mṟingi ulya oke Yuda kamhaluo kahamba, “A ngesa nyio inyi, Maaria?” Yesu kamhaluo, “Nawo ohamba.”

Kilaayo kya Mndumii

²⁶ Kyasia ili welya shelya Yesu kaira-ho mkate kaidapfuma Ruwa kafufunja shifunjo kainengya walya wa kiloshyonyi kahamba, “Ngenyi mlye. Iki nyi mbihu foko.”

²⁷ Kawuya kawewada na kirahu kaidapfuma Ruwa kawainengya kahamba, “Nyonyi-ho mose.

²⁸ Iki nyi samu yako ya mkundano mhya ikeri yolo kipfa kya wandu wafoi kya ihoṟyo nyonjamaṟo.

²⁹ Na inyi ngambia. Kuwokia wulalu njechikinyo-se iki kiwukye kilimunyi kii kya msabibupfo, na njitane ngashika mfiri ili njechinyoya-ho wuhya njii nanyo ipfo wumanginyi wo Wande.”

³⁰ Wamshika wakaimba shiimbo shilya wakawuka mba wakashika kulya fumwunyi lya mashidi ha msinepfu.

Yesu ahamba ke Petro nyi echimkana

³¹ Nalyo Yesu kawawia, “Kio-ki nyi mochikoya moendyo wusutsu nyi inyi moose. Nyi kipfa ili kii kiṟehye ke nyi njechikapa mlisi na machondi ha ipfo iponyi hawerahanyikya ipfo na ipfo.

³² Kya indi ili numa ngammaa njecha imusongoya njihende kulya Galilaya.”

³³ Kyasia Petro kahamhaluo kambia, “Manya wakusukyo nyi iyo wose, inyi njechisukyo nyi iyo ma ngashika indi ma indifo.”

³⁴ Yesu kambia, “Nyi kya lohi ngakuwia, kio na iki olong'onyi lulamekapa na iyo nyi ochinjikana kaṟaṟu.”

³⁵ Petro kambia, “Kiti njikukane na njipfe njisanzo na iyo!” Na walya wa kiloshyonyi wakawehamba wado wose.

Yesu aiterewa Getisemane

³⁶ Nalyo Yesu kahenda nawo kashika alya kyungunyi kii kiiṟihye kundu kui kulahe nyi Getisemane. Kawia walya wa kiloshyonyi, “Kedamyenyi aa njitane ngashika ipfo njiterewe.”

³⁷ Nao kahenda arie Petro na wana walya wa Sebedayo wa wawi kawoka isokyo nyi fowa na iṟeweṟewe.

³⁸ Nalyo kawawia, “Mrima foko nyi fuwodo mnu nyi fowa fukatana fokoya opfu. Kaenyi iya mlae dembo na inyi.”

³⁹ Kahenda-henda sa hatutu kaho wanda na kyamu kechiterewa kahamba, “Hoi Wande, kokoya na kechiku Ṟwia kirahu ki kiide mbele yako kinjihyame. Kya indi ma kilawe nyi chando inyi ngakunda indi kiwe chando okunda iyo.”

⁴⁰ Kacha na alyando wa kiloshyonyi wawei, kakoya wamelaa mado. Kawia Petro, “Nyi mlaidima ilaa na inyi dembo mushike ma saa imu?

⁴¹ Kelaenyi dembo na iterewa muterewe Ruwa mulawone mochiolokya handu ha kiheshyonyi. Ngoo yo kyayo nyi ii njilalutsu kya indi mbihu fo fukalehela.”

⁴² Kawuya kahenda lya kawi iterewa kahamba, “Hoi Wande, kokoya kilechiku wiia kya kirahuki kiide kinjihyame ngamda ndamaa nyo-ho nahong'u kikuwiie chando ukundi iyo.”

⁴³ Kacha-pfo kawekoya-se wamlaa mado lya kawi. Nyi kipfa ili meso hawo hawei malemeri.

⁴⁴ Kawada-ho kahenda lingi-se katerewa lya kaṟaṟu. Na madedo ahamba na halya ha kuwoka.

⁴⁵ Nao kacha na alyando wa kiloshyonyi wai kawawia, “Na mowekaa mochilaa mado na isiya moo? Aii saa yameshika Mana o mndu nahende dambikyo ipfo mawokonyi ha wandu wanyamaṟi.

⁴⁶ Kekurenyi luhende. Mndu monjidambika-ho amcha.”

Yesu awado

⁴⁷ Ili aideda ado alamhutsya adi a ulya Yuda ai umu o ipfo kiidi kya walya ikumi na wawi. Kacha warianyi na wandu wafoi warie njoshu na shiṟeta wa wadume nyi wakohanyi walya wanene na wasongoru wa ipfo wandunyi.

⁴⁸ Na ulya momdambikaho nyi awewateṟie kiṟingishyo kahamba, “Icho njemhekya momu nyio-ng'u. Nyio mndu mochimbada!”

⁴⁹ Adi kakambiṟa ihenda alyando Yesu ai kahamba, “Ngakuiṟikiṟa Maarya!” Kawuya kamhekia momu.

⁵⁰ Yesu kambia, “Mbuya yako a kimaduma kocha naa nyi kiki?” Nalyo wakacha naho wakaleshya Yesu mawoko wakambada.

⁵¹ Nalyo adi a ichu umu o ipfo kiidi walya wai na Yesu kahoṟuo owoko kasomuo oshu lulya loke kamanya nalo isinga lya mkohanyi ulya mnene kamdumbuo kudu.

⁵² Nalyo Yesu kambia, “Kewihiṟa oshu lopfo na ipfo kiṟandenyi. Kipfa orio wandu wewada oshu wose, na oshu wechidetso nalo.

⁵³ A ngesa nyi ohamba njilawechiidima iwesa Wande nao nanjiwutye wasu wa ruwehu wafoi kota siṟi ikumi na tsiwi.

⁵⁴ Kokoya nyi wudo a shilya shii shiṟehye nyi wuda shiwechiidima-se iyawukya ke na kihende kido?”

⁵⁵ Saa na iya Yesu kawia mamwingi fulya fo wandu, “Nyi mowuka kanyi mui cha nyi ko mndu moala njia muihenda murie njoshu na shiṟeta muche injiwada. A ili njilewa modamya ipfo hekalunyi lya Ruwa mafiri hose njelosha nanyo ma mlanjiwade.

⁵⁶ Nakyo kyose kimaduma kikahenda kido nyi shilya shii shiṟehye nyi waikimbi kundu shechiinukya.” Nalyo walya wa kiloshyonyi wakamda wakadicha wose.

Yesu adao mengenyi

⁵⁷ Kyasia na walya walewada Yesu wakamduo kulya ko mkohanyi ulya mnene Kayafa. Na walosha walya wa mawawaso napfondo wasanzie na wandu walya wasongoru.

⁵⁸ Na Petro kacha numa ai kuleshe katana ashika alya osehu ko mkohanyi ulya mnene kaida napfo. Kadamya handu hamu na wapfurukanyi wakeri-pfo naambuye handu keshika.

⁵⁹ Kyasia wakohanyi walya wanene wasanganyi na wanjama wa kyamenyi kya Sinedrio wose wakashihya Yesu owingo lo wongo kundu wambonye opfu.

⁶⁰ Ma walawone, na wehamba-ho njowingo tsa wongo wawehoṟoki-ho sa wafoi. Ili numa kukacha naho wawi.

⁶¹ Wakahamba, “Mndu-chu nyi elehamba, njechiidima isanja hekalu lya Ruwa njiliwike lya kawi mfiri iṟaṟu njimae.”

⁶² Na mkohanyi ulya mnene kahoṟoka kambia, “A nyi kulahamba ma shehaluo ishi sha wandu-wa waihamba-ho shekuwinga?”

⁶³ Na Yesu katsia sau. Na mkohanyi ulya mnene kahaluo kambia, “Ngakulisa-ng'u nyamu so Ruwa chu menyi moo uluwie kokoya na ukeri Kristo kui Mana o Ruwa!”

⁶⁴ Yesu kambia, “Naakyo ohamba. Na inyi ngambia, wokia wulalu mochiwona Mana o mndu adamye ipfo ora lo kulyo lo pfinya-ii itoṟye akeri icha ai huyaa mapuchi ha ruwehu.”

⁶⁵ Nalyo mkohanyi ulya mnene karanduo nguwo tsake tsilya tsa huye kahamba, “Nyi aruma Ruwa! Nyi kiki luwode-se lochishiha wehamba-ho shewinga mondu foke. A iki-ng'u momiicho kirumo kyake kyeruma Ruwa.

⁶⁶ Nyi muhiye-ho muda?” Nawo wakahaluo wakahamba, “Kindo kimsumuhanye na opfu!”

⁶⁷ Nalyo wakamiselya mnyeri oshangunyi loke wakamkapa na nzina. Walya wengi wakamkapa na shidi.

⁶⁸ Wakahamba, “kui Kristo malasha nyiu akukapa?”

Petro akana Yesu

⁶⁹ Kyasia Petro kadamya ipfo nja alya osehu. Na mka isinga kacha na alyando ai kahamba, “Na iyo na uwekeri na Yesu ichu o kulya Galilaya!”

⁷⁰ Nao kakana wandu walya waiho wose kahamba, “Njichi ma ikyo ohambapfo.”

⁷¹ Kyasia akeri iwuka-ho nashike oo kichuminyi mka isinga ungi kambona-ho, kawia walya wakeripfo, “Mndu-chu nyi awekeri na Yesu-chu kulya Nasareti.”

⁷² Nao kakana lingi kelia-ho na nyamu kehamba, “Manya njichi mndu-chu inyipfo.”

⁷³ Oweṟe kitutu walya wahoṟoki-ho wakacha naho wakawia Petro, “Na lohi na iyo nyi mndu o ipfo kiidi kyawo. Nyi kipfa kindo kyakuhamba nyi mdedye fopfo.”

⁷⁴ Nalyo kawoka ikusesa na ilya nyamu kehamba, “Manya njichi mndu-chupfo.” Naho adi olong'onyi lukakapa.

⁷⁵ Na Petro kakumbuo kidedo kilya Yesu ambie ke olong'onyi lulamkapa nyi ochinjikana kaṟaṟu. Naho kawuka-ho kahenda kulya nja kafihiṟa kaingelea.