MATAYO 25 - Bibilia Kui Mdedie fo Kimochi

¹ “Nalyo wumangi wo ruwehu nyi wufananyi na wana wa waka ikumi walewuka kanyi wahende yambya mndu menyi wali warie na taa tsawo.

² Na iwo watanu-ho nyi matondo, na watanu-ho nyi waṟango.

³ Nyi kipfa lilyandi walya wai matondo waleduo taa tsawo, walahende warie mafuda.

⁴ Na walya waṟango wakaduo mafuda ipfo shihienyi shawo wawerie na ipho taenyi tsawo.

⁵ Kyasia wamkoya menyi wali akeleo wakahombya wakalaa mado handu hamu wose.

⁶ Ili kio makiidi hawi kukaamka oṟenje ke menyi walyi a ulya alya kekurenyi mhende imaambya.

⁷ Nalyo wana walya wa waka wakakure madonyi handu hamu wose wakasungusya taa tsawo.

⁸ Walya wai matondo wakawia walya waṟango, ‘Mafuda-ho muwode, keluinengenyi-ho-wo, taa tsadu nyi iruma tsii.’

⁹ Walya waṟango wakahamba, ‘Ote nyi lowona halalushikye so na nyo. Kicha-kicha-ho nyi ihenda ko wekumba shindo mukuhuṟye-pfo hanu.’

¹⁰ Wahendye kihuṟyonyi menyi wali kacha na walya wakusungusie wakahenda warianyi nao wakaing'anya kulya walinyi. Mongo fukapfungo.

¹¹ Ili numa numa wana wa waka walya wengi wakawecha naho wakahamba, ‘Hoi Mndumii, hoi Mndumii, kelufunguye-wo mongo.’

¹² Nao kahaluo kawawia, ‘Njimwichi nyopfo.’

¹³ Kyasia-ng'u kelaenyi-ng'u dembo kipfa ili mulaichi mfiri fo ma saayo.”

Mfanano fo masinga haṟaṟu

¹⁴ “Nyi kipfa kyawa cha kya mndu alehenda kyaṟo. Kawoka ilaha masinga halya hake kahainenga shilya awode washikalie.

¹⁵ Ichu kamnengia talanta tsitanu na icho ungi tsiwi na icho ungi imu. Orio mndu ose kamnengia chando kisumuhanyi na pfinya yake. Naho kahenda kyaṟo.

¹⁶ Ulya aambia talanta tsitanu adi kakambiṟa ihenda owinyi. Kakapakapa natso mbucha. Kawona-ho tsingi tsitanu tsa mbucha.

¹⁷ Na ulya o tsilya tsiwi kawewona-ho tsingi tsiwi tsa mbucha.

¹⁸ Kyasia ulya aduo iya imu kahenda. Kasumasuma ipfo wanda. Kaṟika fesa iya ya mndumii oke.

¹⁹ Kyasia mndumii o masinga halya kakaapfo kiheri kileshe katana acha. Kahamba wamwitalie shindo shilya.”

²⁰ Ulya adae talanta tsilya tsitanu kacha naho kaende talanta tsingi tsitanu. Kahamba, “Mndumii, nyi talanta tsitanu unnengye. A itsi talanta tsingi tsitanu njilewona tsa mbucha.”

²¹ Mndumii oke kambia, “Nyi kulewuta necha kui isinga sa licha lihendeli. Nyi uwekeri mnene o shindo shitutu koweshihendelya. Njekuwika mnene o shindo shifoi. Henda kuidye na sienyi ya Mndumii opfo.”

²² Na ulya o talanta tsilya tsiwi kawecha napfo kahamba, “Hoi mndumii, nyi talanta tsiwi ulenjinenga, a itsi-se tsingi tsiwi-se njilewona tsa mbucha.”

²³ Mndumii ulya oke kambia, “Nyi ulewuta mecha kui isinga icha sa lihendeli. Nyi uwekeri mnene o shindo sa shitutu koweshihe-ndelia. Njekuwika mnene o shindo shifoi. Henda kuidye na sienyi ya Mndumii opfo.”

²⁴ Kyasia na ulya aambie talanta iya imu kawecha napfo kahamba, “Mndumii, njiwekuichi nyi ui mndu muumu nokesambuo handu kulawaye-ho, kosana handu kulakumbie-ho mbeu.

²⁵ Na inyi ngaowuo ngahenda iṟika talanta iya yapfo fo wanda. A iki kindo kyapfo okiwadang'u wulalu.”

²⁶ Na mndumii oke kamhaluo kambia, “Iyo ui isinga liwicho kowewa na mdoko ili uweichi njekesambuo handu njilawaye-ho ngawesana na handu njilakumbie ho mbeu.

²⁷ Aka shika-ng'u-wo chi kiwekusumuhanyi-wo ihenda kumba rupia tsako ko weilacha rupia. Na inyi ili njecha kokoya nyi njiwechiende-pfo iki kyako kii kiengerye-ho na kyako kya woakuya.

²⁸ Kemsokenyi-ng'u talantayo. Muinengie ichu awode talanta ikumi.

²⁹ Nyi kipfa orio mndu ose ichu awode nyi echiinengo na yengeṟyo kawengeṟyo-engeṟyo. Kyaindi ichu alawode na ikyo awode kawesoko.

³⁰ Na isinga li lya maai likumbenyi ipfo meemenyi fushingye ipfo nja. Napfo kukae-pfo ifihiṟa na imadya ngamru.”

Mwaanduye fo ifurumia

³¹ “Kyaindi ilindi Manomndu echicha ai na wusumuhanyi woke arianyi na wasu wake wa kulya ruwehu wo wose, nalyo echidamya ipfo loṟike-hu lo wusuṟi woke.

³² Na ifo sumuhana na oshangu loke kuche sanyo-ho wandu wa masanga hose. Nao nawaletsane chando mlisi ekeletsana machondi na oṟo.

³³ Na machondi halya nahawike ora loke lo kulyo na oṟo tsilya natsiwike ipfo ora loke lo kumoso.

³⁴ Nalyo mangi echiwia walya wakeri ora loke lo kulyo, ‘Kenjonyi mui wawikei ona nyi Wande oko. Kehenda kaenyi kyoṟenyi kya wumangi kyanu muwasuṟumiye kuwokia masanga hambiko.

³⁵ Nyi kipfa njiwewodo nyi njaa mukannenga shelya. Mbei mangari mukanjirutsa mṟinga. Mbei mhenu mukanjionduo na konu.

³⁶ Mbekeri kitaṟe mukanṟika nguwo. Mbeluo mukacha njisahia. Mbei mbike ipfo mba ko wapfungo mkanjichyea.’

³⁷ Nalyo wandu walya wa wusumuhanyi wechimhaluo wahambe, ‘Hoi Mndumii, nyi indi lulekuwona kuwodo nyi njaa lukakuinenga kando keihuda? Ang'u kui mangari lukakurutsa mṟinga?

³⁸ A nyi indi lulekuwona kui mhenu lukakuonduo na kodu? Ang'u kui kitaṟe lkakuṟika nguwo?

³⁹ A nyi indi lulekuwona kuluo ang'u kumbike ipfo mba ya ko wapfungo lukakucheya?’

⁴⁰ Na mangi nahaluo nawawie, nyi kya lohi ngambia, ‘Orio kindo kyose chando mulewutya wanawawama wako iwo watutu ya wose ma ichu umu-ho nyio inyi mulenjiwutya.’”

⁴¹ “Nalyo mangi echiwia na walya wa ora lo kumoso nahambe, ‘Njiwukenyi nyo mui wasese, muhende ipfo modonyi foekaa mulangana ifo fui fusungusye fo Satan na wasu walya wake.

⁴² Na kipfa njiwewodo nyi njaa ma mlannenge shelya. Mbei mangari ma mlanrutse mṟinga.

⁴³ Mbei mhenu ma mlanjionduo na kanyi konu. Na kitaṟe ma mlanjiṟike nguwo. Njiweluo mbei mbike na ipfo mba ko wapfungo ma mlache nsahya.’

⁴⁴ Nalyo na wudo wechihaluo wahambe, ‘A Mndumii, nyi indi lulekuwona kuwodo nyi njaa ang'u kui mhenu ang'u kui kitaṟe ang'u kuluo ang'u kumkumbe ipfo mba ko wapfungo naso lukada lulakufuṟukanya?’

⁴⁵ Nalyo echiwahaluo nahambe, ‘Nyi kya lohi ngambia, orio kindo kyose chando muleda mulawutya iwo watutu ya wose ma ichu umu-ho nyio inyi muleda mulanjiwutya.’

⁴⁶ Nawo wahende malisyonyi ha wukiwa wokaa mlungana na walya wa wusumuhanyi wawehenda ipfo kiidi kya moo fo mlungana.”