MATAYO 24 - Bibilia Kui Mdedie fo Kimochi

¹ Na Yesu kawuka ipfo hekalunyi kahendahenda mbele. Walya wa kiloshyonyi wakacha na handu ai wakundi imloṟa mamba halya ha hekalu.

² Nao kahaluo kawawia, “Nyi mulawonyi iho hose? Nyi kya lohi ngambia, ‘Iya handu hakeri nyi koekaa kuleedeoho ma iho likuhekye huye ya iho lingi lide lilawunduo-hopfo.’”

Mawukiwa

³ Kyasia adamye alya fumwu-hu lya mashidi ha msinepfu naho walya wa kiloshyonyi wakacha na alyando awei hai handu ha kisekenyi wakahamba, “Keluwie-wo mbonyi tso tsekaa tsishike indi? Na kiṟingishyo kyeṟingishya ili koshika iya macheenyi hapfo na masiyonyi ha wuyana nyi kiki-wo?”

⁴ Na Yesu kahaluo kawawia, “Kekuṟisenyi mulawone mndu kechimlemba.

⁵ Cha kipfa nyi kochikaa kuche sa wafoi wache kui rina lyako wahambe, ‘Inyi nyio Kristo. Wadetse wandu sa wafoi.’

⁶ Kyaindi nyi mochiicho shida na mbonyi tsihambo tsa shida. Ambuyenyi ma mulakangaṟike. Cha kipfa ma kikaki na kihende kido. Kyaindi kikamshika oo komkoya iya masiyonyipfo.

⁷ Nyi kipfa oruka lu lochiamkya oruka lungi. Na wumangi wuweamkya wumangi wungi. Kuwewada-ho na njaa na shiding'ashi shiweida-pfo kui handu kui handu.

⁸ Na shindo shi shose shikamewoneka nyi mawokyonyi ha mawukiwa halya.

⁹ Nalyo wahende imdambika wamiitse shiwirenyi na imbaha wawembaha. Nanyo mukoe musuikyo ko wandu wa masanga hose kipfa kya rina lyako.

¹⁰ Nalyo kukaepfo wandu sa wafoi wesukyo na iṟingyana na isuana.

¹¹ Na waikimbi wehamba sha wongo wawekurepfo wafoi waduo wandu wafoi ipfo kidekyonyi.

¹² Na ili wunyamaṟi wochipfumbuka wudo nkyo kechiinenga ikunda lya wandu wafoi lisie yololya.

¹³ Kyaindi ichu mokarishya-ho kaweda nashike ili masiyonyi nyio echikiṟo.

¹⁴ Na ndumi ii ya sia ya wumangi iweongoyo idung'ane kunu orukenyi kose kiwe nyi kiṟingishyo kya wandu wa masangenyi. Nalyo kushike iya masiyonyi.”

Masionyi

¹⁵ “Kyasia-ng'u kiwi kilya kya orumatso kii kihambe nyi mwikimbi ulya Danyieli ili mandi mochiwona-ng'u kiche ihoṟoka kundu kui kwele ichu mosoma namanye.

¹⁶ Nalyo walya wai kunu Yudaya wahende dichya kulya mafumvu-hu.

¹⁷ Na ichu echikoyo akeri ipfo mmbe-hu ma nalasokepfo nahende yonduo nzohoṟa tsa ipfo mba.

¹⁸ Na ichu echikoyo nyi ai alya demenyi ma nalawuye na numa nahende yonduo nguo yake ya huye.

¹⁹ Kya indi ochia nyi lo walya wekoyo wai wanene wapfe mana na walya weonza mafiri-ho.

²⁰ Kyaindi terewenyi Ruwa ilindi mochidicha kilawe nyi ili kiheri kya mbeo ma ili mfiri fo Sabato.

²¹ Cha kipfa kukamshika mandi nalyo kuche shiwira sa shiingi sa shilalemewoneke kiwokia lilya mawokioonyi ha wuyana itane mandi ha ha wulalu. Ma ili numa shechiwonekase shidopfo.

²² Na mafiri halya nokoe halawechiwihiṟowihiṟo numa hanyienyie, ma orio kindo kii na mbihu kyose kiwechiwona-se handu kechikiṟyopfo. Kyaindi nyi kipfa kya iwo wai wasambuṟe nyi kyondo mafiri halya hechiwihiṟyo-wihiṟiyo numa.”

²³ “Nalyo mukakoya ma mndu ambia, ‘Kristo aichu kunu! Ang'u a ulya alya! Nanyo ma mlamwidikye.’

²⁴ Nyi kipfa kochikurepfo Wakristo wa wongo na waikimbi wa wongo. Waweloṟa-ho na mawuto manene ha kiṟingishyo na ha kiṟiha. Nyi kundu watewe na iwo wai wasambuṟe nokoe nyi kiwechiwa.

²⁵ Ambuyenyi nyi ngawoka imtutuma.

²⁶ Kyasiang'u mkamkoya wembia, ‘A ulya kulya nuka! Nanyo ma mulawuke kanyi muhende-pfo. Acho ipfo shiṟihenyi sha mba sha kiidi, nanyo ma mlaidikye.’

²⁷ Nyi kipfa chando mbawa yewaṟuka kulya ora lo ruwehu lo ngamenyi lukawaṟuka waṟu fukakoya kulya ora lo kiukanyi, na ili kochishika iya macheyenyi ha Mana o mndu nyi wudo kechewa.

²⁸ Handu hai mnying'a na mamtonyi napfondo hekekuwumbia.”

Macheenyi ha Mana o Mndu

²⁹ “Indi kombona shiwiira shilya sha mafiri halya shamiida kukae handu hatutu nalyo mnengeṟi fuhaluke meema na meeri fulechikiloṟa-se ngela yafo na nyenyeri tsioloke tsiwuke ipfo ruwehu. Na pfinya tsi tsiirye alya ruwehu tsiwekupaya-paya.

³⁰ Mandi nalyo kiṟingishyo kya Mana o mndu kikuloṟe alya ruwehu. Na mbaṟi tsa wandu wa kunu orukenyi tsiwefihiṟa tsose. Nawo wawone Mana o mndu kecha akeri huya mapuchi ha ruwehu ai na pfinya ing'anyi na wusuṟi.

³¹ Nao naweduma wasu wake wa ruwehu wahende na ṟu ling'anyi lya membe na iwo wake akusambuṟye wawewasanya kundu kumu, wawawute kundu ko njotanu tso tsi tsiina wawoke ora lu lo ruwehu kundu lutsitsye washike lulya lungi kundu lutsitsye.”

Mfanano fo mkuyu

³² “Kyaindi mkuyu-fu mukuloshe nafo mfanano kindo kifananyi nafo. Mkamkoya oṟuwe lofo luwiriwiri nanyo mukakuwutya-ho imanya ke nyi ipaṟika-ng'u kui.

³³ Nanyo na wudo, mukamewona mbonyi tso tsiwe tsido tsose nanyo mumanye ke amshika kufui na oo mongo.

³⁴ Nyi kya lohi ngambia, mbaṟi ii ya wandu ikeri-ho yechisiapfo na kutane mbonyi tso tsawutika tsido tsose.

³⁵ Kulya ruwehu kukae kunyamaṟike na kunu orukenyi, kyaindi madedo hako hawode mandi hechinyamarṟikapfo.”

Kuipfo aichi mkonufo-pfo

³⁶ “Kyaindi kya mfiri na saa iya kuipfo mndu aichi mbonyi tsayopfo ma wasu wa kulya ruwehu, manya o Mana shile na Wande amonyi.

³⁷ Indi chando kiwekeri mandi halya ha Noe na ili kochishika iya macheyenyi ha Mana o mndu na wudo kechiwa.

³⁸ Nyi kipfa chando wawekeripfo mafiri halya mbele ya mfu fulya fo mṟinga wechilya shelya na inyo, na ikualikia na ikualikio, washika mfiri lilyandi Noe keida na kulya isandukunyi linene.

³⁹ Ma walamanye kindo mfu fulya fung'anyi fo mṟinga fukatana focha fukawakombetsa wose, na ili mandi kochishika iya macheyenyi ha Mana o mndu na wudo kechihenda iwa kido.

⁴⁰ Nalyo wawi wakoye nyi wai alya demehu ichu umu nairo-ho na ichu ungi nadeo.

⁴¹ Waka wawi wakoe nyi waisa mso na iseo, ichu umu nairoho na ichu ungi nadeo.

⁴² Kelaenyi-ng'u dembo, kipfa mulaichi mkonu fulya Mndumii echicha.

⁴³ Kindo mochikumbuo nyi le, mndu menyi kanyi nokoe nyi aweichi ke kamba lyeringa kio ke nyi lya indi mwiwi echicha nalyo nyi awechilaa dembo ma awechilekya mba yake isumopfo.

⁴⁴ Kyasia kyamba nyi wudo kii nawo kewekaenyi-ho mukusungusye. Nyi kipfa Mana o mndu echicha na saa ilindi mlechikumbuo.”

Mṟundi mhendeli na alai mhendeli

⁴⁵ “A nyi wu akeri-ho ai isinga lihendeli akeri na mṟango chu Mndumii ambikye mnene mokalya kulya kanyi koke nainengye na masinga wodoe shelya ili kiheri kishikye?

⁴⁶ Sia na ya isinga lilya lyechikoya Mndumii olyo ache kambona kewuta ado.

⁴⁷ Nyi kya lohi ngambia nyi echimbika mnene mokalya shichoṟe shake shose.

⁴⁸ Kyaindi isinga lilya liwicho kokoya nyi lyechideda mrimenyi kolyo likahamba, ‘Mndumii nyi akeleo.’

⁴⁹ Naho likawelya na ikapa masinga wodoe, likalya na shelya na inyo ashanganyi na iwo wananzi.

⁵⁰ Na Mndumii o isinga lilya nyi echicha na mfiri ilindi alakumbuo na saa ilindi alaichi.

⁵¹ Na ipaṟa nawempaṟa makiidi hawi na ohawi loke nawemnenga namsanze na wandu wo wai makulembetseṟe. Napfo nyi kochikaa-pfo ifihiṟa na imadya ngamru.”