MATAYO 23 - Bibilia Kui Mdedie fo Kimochi

Yesu adedia walosha wa wuwawaso na Mafarisayo

¹ Nalyo Yesu kadeda na wandu walya wakeri-pfo mamwingi na walya wa kiloshyonyi kyake.

² Kahamba, “Ipfo loṟike-hu lo Mose loloshya nyi kudamyepfo walosha wa mawawaso na Wafarisayo.

³ Kyasia-ng'u orio shindo wamembia shose mbeshiwuta na ishihendelya. Kyaindi ipfo mawutyonyi hawo mulawute musumuhane naho.

⁴ Nawo nyi wekepfunga maṟio malemeri wakahadika wandu makosohu. Kyaindi wo wawenyi walakunde ihapaanya manya na kimnyo kyo.

⁵ Mawuto hawo hose wakahawuta kundu wawono nyi wandu. Nyi ili wekelandaṟa shingowa shi sha ngumbu sheterewa nasho wakalesha na mambo tso tsa nguwo tsawo.

⁶ Wakakunda handu hedamya ha kusonguo ili wai walahye shelya nyi mndu na shidi shedamya isho shisongoru ipfo sinagoginyi.

⁷ Na shiiṟikiṟo sheiṟikiṟo nyi wandu handu halya halandari ha mṟinyi. Na ilaho nyi wandu wawalahe nyi Rabi.

⁸ Kyaindi nyo mulalekye wandu wamulahe nyi Rabi nyi kipfa nyi umu akeriho ai mlosha onu. Na nyo mukawa nyi wanawamka moose.

⁹ Ma mulawie ma wandu nyi wande wa kunu orukenyi. Nyi kipfa nyi umu akeripfo ai ndeyanu, nyi ichu o ipfo ruwehu.

¹⁰ Ma mlalekye wandu wamlahe nyi wasongoru wa njia. Nyi kipfa ichu ai msongoru onu nyi umu, nyi Kristo.

¹¹ Kyaindi ichu ai mnene konu nawe nyi mopfuṟukanya.

¹² Na mokudosa amonyi nyi echikaa nanyiiro. Na mokunyiiṟa amonyi nyi echikaa nadoso.”

Yesu adedia makulembetseṟe

¹³ “Ochia lonu nyo walosha wa mawawaso na Wafarisayo mui makulembetseṟe. Nyi ilindi mokepfunga mongo fo wumangi wo ruwehu sumhana na oshangunyi lo wandu. Nanyo ma mlechiida napfo ma wandu wawechiida napfo mlawalekye waide napfo. [

¹⁴ Ochia na lonu nyo walosha wa mawawaso na Wafarisayo mui makulembetseṟe. Nyii ilindi mokelya mba tsa waka wakusu mkamaa naho mukalembetseṟa-ho na madedo hafoi heterewa. Kyamekaa kido nanyo mukae muwone owingo luumu-umu.]

¹⁵ Ochia lonu nyo walosha wa mawawaso na Wafarisayo mui makulembetseṟe! Nyi ilindi moketengeta mukakyama ipalyipalyi na oruka luhadutsu kundu mochikuwonya mndu umu mokunda idikya. Na kombona amba, mukawuya imhaluo mana o kulya Gehena mbicho kamwida nyo kawi.

¹⁶ Ochia lonu mui wasongoru wa njia wapfu meso. Nyi muhambye, ke mndu molya nyamu kahamba, ‘So hekalu lya Ruwa, chi kindopfo.’ Indi molya nyamu kahamba, ‘So sahabu ya ipfo hekalunyi nyio awodo-ho.’

¹⁷ Mui matondo muwei na wapfu meso. Nyi kipfa iki kineneho nyi kiki ngesa, nyi sahabu-yo ang'u nyi hekalu lyo lya Ruwa linengye sahabu yo ikawa njiele?

¹⁸ Na molya nyamu kahamba, ‘So kitaṟa kedasya chi kindofo.’ Kyaindi molya nyamu kahamba, ‘So kindo kyedasa kii huyakyo nyio awodo nyi nyamu yake.’

¹⁹ Mui wandu wapfu meso. A iki kineneho nyi kiki? Ngesa nyi kilya kedasa ang'u nyi kitaṟa kedasya ikyo kiinengye kindo kedasa kikawa kyele?

²⁰ Kyasia nyi kikeri-ng'u ichu molya nyamu kehamba, so kitaṟa kyedasya nyi alya nyamu nakyo na shilya shii shihekye huyakyo kawelya nasho nyamu-da.

²¹ Na molya nyamu na hekalu lya Ruwa nyi alya nyamu nalyo na ichu awodepfo handu hake hekukaya kawelya nao nyamuda.

²² Na molya nyamu na ruwehu nyi alya nyamu na loṟika lo Ruwa lodamya na ichu adamye huyalo kawelya nao nyamu daa.”

²³ “Ochia lonu nyo walosha wa mawawaso na Wafarisayo mui makulembetseṟe, nyi kyailyi mokewesa wandu okamba lo shindo shilawaṟi mukada mawawaso ha wulohi, isaṟia na mwidikye, isho nsho shiwaṟi mushiwade mulechihadima isho shingi.

²⁴ Mui wasongoru wa njia ya wapfu meso, mokeshishina-ho shipanu mukawuya imeṟa ngamia.

²⁵ Ochia lonu nyo walosha wa mawawaso na Wafarisayo makulembetseṟe, nyi ilindi mokesania ora lo kya nja lo kirahu na kitela, kyaindi ipfo kiidi kikaichuo shindo shii shisoke sha pfinya na shii shyole sha wuseṟeṟi.

²⁶ Iyo Mfarisayo kui mndu a mpfu meso! Kesonguo isanja sha ipfo kiidi kya kirahu na kitela na ora lo patehu kundu luwewa nyi luusanje.

²⁷ Ochia lonu nyo walosha wa mawawaso na Wafarisayo mui makulembetseṟe, nyi ilindi mufananyi na shipfu kundo mnying'a yeṟiko shichope shikawada kiweṟe kyeambuya ipfo kya nja. Kyaindi ipfo kiidi shikaichuo mafuo ha mnying'a na shindo shiendye tsung'a orio mbaṟi yose.

²⁸ Nanyo na wudo iya kya nja nyi mokeloṟa wandu fana cha nyi mui wa wusumuhanyi, kyaindi ipfo kiidi mukaichuo ikulembetseṟa na orio wunyamaṟi wose.”

Ngapo ikeri iicha

²⁹ “Ochia lonu nyo walosha wa mawawaso na Wafarisayo mui makulembetseṟe. Nyi ilindi mokewika handu heṟika mnying'a ya waikimbi mukawechopa na shipfu sha wandu wa wusumuhanyi kundu mnying'a yawo imṟike yende kiweṟe.

³⁰ Mkahamba, ‘A kima lulekaawo mandi halya ha waku wadu nyi-ki?’ Nokoe so luwechisanza nawo lilyandi weola samu ya waikimbi walyapfo.

³¹ Mukatana mokuwutya owingo muwenyi ke na mukeri wana wa wewaha waikimbi walya.

³² Nahong'u keichuṟenying'u kiheo kya waku wanu!

³³ Mui manjoka, mui malea ha njoka muidime muda idicha mude mulahutsio owingo lo Gehena?

³⁴ Kyasia kyamba nyi wudo kii na inyi njiwe moduma konu waikimbi na wandu walaanyi na walosha wa mawawaso. Nanyo iwo maata muwawahe na iwawambia msalabenyi, na walya wengi muwakape na ngowa tsii njitochie msha ipfo kya mba kundo mokumbuhananya na iterengya mbewaterengya wawuke kunu mṟinyi ifu wadichye fulya fungi.

³⁵ Nanyo kundu mochicheo nyi samu yose ii nyiole kunu masangenyi ya wandu walawode kindo wanyamaṟye, iche huye yanu iwokia samu ya mndu ulya o wusumuhanyi Abeli ukoe samu iya ya Sakaria ai mana o Barakia ulya mulewaha o makiidi hawi ha hekalu lya Ruwa na kitaṟa kyedasia.

³⁶ Nyi kya lohi ngambia, ‘Ikyo kyose nyi kekaa kiche huye ya rika-li lya wandu.’”

Yesu afihiṟiya Yerusalemu

³⁷ “Iyo Yerusalemu, iyo Yerusalemu, kui mowaha waikimbi na iwo wai wadume kopfo kowakumbya maho, na sa kafoi da mbekundi isanya shiwana shapfo na chando nguku yekesanya malea hayo ipfo shi ya makungo hayo nanyo ma malakunde.

³⁸ Aii mba yanu momeideyo ilawode kindo.

³⁹ Nyi kipfa ngambia, ‘Kuwokia wulalu mochikiwonana-se na inyipfo na mtane mohamba, ona nyi lo ichu mocha kui rina lya Mndumii.’”