MATAYO 22 - Bibilia Kui Mdedie fo Kimochi

Mfanano fo Walyi

¹ Na Yesu kahaluo kawawia se lingi mbonyi tsa mfanano kahamba,

² “Wumangi wo ruwehu nyi wufananyi na mndu mangi alealikya mana oke wali.

³ Kaduma masinga halya hake hahende ilaha wai walahe na kulya walinyi. Nawo walakunde icha.

⁴ Kawuya kaduma masinga hengi kahamba, ‘Kehenda wienyi iwo wai walahe, ambuyenyi ngammaa isungusia shelya shako. Pung'a tsako tsamba ishinja na shuma sho shiike. Shose shamba. Kekucheenyi-ng'u na walinyi.’

⁵ Nawo wakammina. Wakahenda kundo kowo, umu owo kahenda demehu lyake, na ulya ungi kiṟundyonyi kyake.

⁶ Walya wadeo-ho wakawada masinga halya wakawalisa wukiwa, wakawawaha.

⁷ Kyasia mangi karihinyika nyashi. Kaduma siṟi tsake tsa shidenyi. Kaarisya wawahi walya wanda. Na mṟi fulya fowo kakoṟa na modo.

⁸ Nalyo kawia masinga halya hake, ‘Wali na wuwemewa, kyaindi nyi ili wandu wa walaheho walasumuhanyi-ho.

⁹ Kehendenyi kulya njienyi kundu tsitsahanyi, na chando mochiwona wandu muwewalaha na kunu walinyi wose.’

¹⁰ Na masinga halya hakahenda kulya njiehu hakaende napfo wandu wawona wose. Na ichu mbicho na ichu mcha. Mba iya yelia wali ikaichuo wahenu.

¹¹ Kyasia mangi kekiida napfo nache yambuya wahenu walya, kawona-pfo mndu alaṟee nguo ya walinyi.

¹² Nao kambia, ‘Mbuya yako, nyi wuda oida na kunu ulaṟee ma nguwo ya walinyi?’ Nao katsia ndiṟi.

¹³ Naho mangi kawia walya wepfuṟu-kanyiaho, ‘Kempfungenyi madende-ho na mawokoho. Mumkumbe ipfo meemenyi fushingie ipfo nja. Napfo nyi kochika-pfo ifihiṟa na imadya ngamru.

¹⁴ Nyi kipfa wandu walahe nyi wafoi, kyaindi iwo wawasambuṟe wakatutiya.’”

Itaa okamba lo Kaisari

¹⁵ Nalyo Wafarisayo wakahenda ideda kyama chando wemdeha na kidedo.

¹⁶ Wakamdumya wa kiloshyonyi kyawo warianyi na wa Herode wakahamba, “Maarya, na luweichi nyi ukeri mohamba sha lohi, na njia ya Ruwa kowelosha ya lohi, ma okesaṟa mndupfo, nyi kipfa ulekeambuya fana ya mndu ke nyi ida na ida.

¹⁷ Keluwieng'u-wo, nyi ohie-ho kuda. Iwikya Kaisari okamba na kindo kiwesumuhanyi ngesa ang'u ote?”

¹⁸ Kyasia Yesu aichi wuwicho wulya wowo kahamba, “Nki ili mocha inseenga mui makulembetseṟe!

¹⁹ Kenjiloṟenyi kindo ki kewika okamba!” Wakamendye dinari.

²⁰ Na Yesu kawawesa, “A sanamu i ikeri-ho nyi yawu na kiṟehyo-ki?”

²¹ Wakahamba, “Na sha Kaisari.” Nalyo kawawia, “Kewikyenyi-ng'u Kaisari iki kii kya Kaisari. Mbewikya na Ruwa iki kii kya Ruwa.”

²² Wekiicho wado wakaṟihio. Wakamdaho wakahenda.

Iṟuka lya wapfu

²³ Kyasia mfiri na fulya Wasadukayo wakamchea. Nyi wandu wekehamba ke nyi kulaipfo iṟuka lya wandu wapfu. Wakambesa kya keleluo.

²⁴ Wakahamba, “A lewo maarya, Mose nyi ahambye mndu kapfa alawode wana nyi manomae echialika mka oke nawedosya na mana o mae oshari.

²⁵ Kyasia kunu kodu kuwekeri-pfo wanawamka mfungade. Na ulya msongoru kaalika mka kawuya kapfa. Nao ili alawode oshari kadea manomae mka ulya oke.

²⁶ Na ulya o kawi na wudo na o kaṟaṟu. Wakatana wasia wose mfungade.

²⁷ Nawo wose mndu mofurumya-ho ipfa nyi mka ulya.

²⁸ Aka shika-ng'u-wo ili kochishika iya maṟukyonyi ha wapfu nyi echiwa nyi mka o wu o ipfo kidi kya walya mfugadde. Chi wawemrie wose?”

²⁹ Yesu kahaluo kawawia, “Nyi modeko kipfa ili mulaichi ma ishi shii shiṟehye ma pfinya ya Ruwa.

³⁰ Nyi kipfa ili kochishika iya maṟukyonyi ha wandu wapfu ma kochikaa-se wealika na wealikopfo. Nyi wechiwa cha wamalaika wa ruwehu.

³¹ Kyaindi kya ipfo maṟukyonyi ha wandu wapfu nyi mulasomye iki muwawie nyi Ruwa kehamba,

³² ‘Inyi nyio Ruwa o Abrahamu na Ruwa o Isaki na Ruwa o Yakobo.’ Ruwa chi akeri o wapfupfo shila na o iwo wai na moo.”

³³ Kyasia na mamwingi fulya fo wandu wamwicho wado wakawuko nyi madima kipfa kya mbonyi tsilya tsake alosha ado.

Iwawaso ling'anyie hengi

³⁴ Kyasia Wafarisayo wameicho nyi ahaluo Wasadukayo ndiṟi, nawo wakasanza handu hamu.

³⁵ Nawo ulya umu-ho akeri mndu aichi mawawaso kacha imbesa kemseenga kahamba,

³⁶ “Maarya na iwawaso inene ipfo kiidi kya mbonyi tsii njiwawase nyi lya iki ngesa?”

³⁷ Nao kambia, “Nyi ochikunda Mndumii opfo Ruwa, umkunde na ngoo yapfo handu hamu yose, na mrima fopfo fose na mahio hapfo hose.

³⁸ Nlyo iwawaso lisongoe hose.

³⁹ Na lya kawi lifananyi nalyo nyi likeri li-ile, kunda odoo chando ukukundi moo fopfo kumonyi.

⁴⁰ Mawawaso-ho hawi ipfo kiidi kyaho nyi harie-ho mbonyi tsii njiwawase tsose na waikimbi.”

Kristo Mana o Dawidi

⁴¹ Kyasia ili Wafarisayo wasanzie kundu kumu, Yesu kawawesa mbonyi.

⁴² Kahamba, “A iki kya Kristo nyi muhie-ho muda? Nyi akeri mana o wu?” Wakahamba, “Nyi o Dawidi.”

⁴³ Kawawia, “A ili Dawidi amlahye nyi Mndumii kededa kui Mumuyo kehamba,

⁴⁴ Mndumii alewia Mndumii oko, ‘Kedamya kunu ora loko lo kulyo na inyi njitane ngawika wakituwa wapfo ipfo shia madende hapfo.’

⁴⁵ Kyasia-ng'u komkoya Dawidi amlahye nyi Mndumii namanye-se iwa mana oke ada?”

⁴⁶ Naho ma kulakikae-pfo mndu moidima imhaluo ma kindo ma mokarya imbesa kindo kuwokia mfiri fulya.